Read Mandinka Jabuuroolu 97 Bible Online

Jabuuroolu 97 - Mandinka bible

Jabuuroolu 97

¹Yaawe* mu Mansa le ti, duniyaa moolu, ali kontaani! Hani fankaasoo daŋo to siilaalu, ali seewoo!

²Minaayoolu ye a kuru, diboo ye a muru. Tiliŋo niŋ tooñaa, a la mansasiiraŋo be looriŋ wo le kaŋ.

³Dimbaa ka taa a ñaato, ka a jawoolu kasaara a karoo bee la.

⁴A la saŋ ŋalasoo ka duniyaa fanundi, duniyaa ka a je, a ye jarajara.

⁵Konkoolu ka yeluŋ Yaawe ñaatiliŋo la le komeŋ kandiyoo, duniyaa bee Maariyo ñaatiliŋo la.

⁶Saŋ fatoolu ka a la tiliŋo kankulaa, aduŋ duniyaa moolu bee ka a la semboo niŋ waroo je.

⁷Moolu mennu ka jalaŋ kenseŋolu batu, ì ka kibiri ì la, wolu be malu la le. Jalaŋolu bee ka boyi Yaawe ñaatiliŋo la le.

⁸Siyoni* moolu ye ite Yaawe la kiitindiroolu moyi le, ì kontaanita, Yahuuda saatewolu fanaa seewoota.

⁹Yaawe, ite le mu maralilaa baa ti duniyaa kunto. Ite warabaata le ka tambi alloolu bee la.

¹⁰Yaawe ye moolu le kanu mennu ye kuu jawoo koŋ, a ka a la moolu niyo kanta le, a ka ì tankandi moo jawoolu bulu.

¹¹A la beteyaa tilimaa le ka mala moo tilindiŋolu kaŋ, aduŋ seewoo be moolu le ye, tiliŋo be mennu sondomoo kono.

¹²Ali seewoo Yaawe la kuwo to, moo tilindiŋolu, ali ye a tentu niŋ a too senuŋo la!