Read Mandinka Kuma Kotoomaalu 1 Bible Online

Kuma Kotoomaalu 1 - Mandinka bible

Kuma Kotoomaalu 1

¹Dawuda dinkewo Sulemani, Banisirayila mansa la kuma kotoomaalu:

²Ñiŋ kuma kotoomaalu be moolu maakoyi la le, ka londoo ñini ñaameŋo niŋ yaamaroo la kuwo to, aniŋ ka kalamutari ke ñaameŋ kumoolu la kendeke.

³Moolu si yaamari betoo soto noo maañaa kendoo to, ka kuu soobewolu ke mennu tilinta, aniŋ ì foroyaata.

⁴Kuma kotoomaalu ka moo sooneeyaariŋ baalu karandi kekuu loŋo le la, londoo niŋ taañaa loŋo fondinkewolu ye.

⁵Ì ka kalamutari ke kuma kotoomaalu niŋ misaaloolu la le, aniŋ moo ñaamendiŋolu la kumoolu niŋ ì la mansaaloolu. Moo ñaamendiŋolu fanaa si ì lamoyi, fo ì si londi lafaa ì la karaŋo to, mennu ye kuwolu bo noo ñoo to, si yaamaroo soto.

⁷Yaawe* ñaasilaŋo le mu londoo kuŋo ti, bari toolewolu ka jutu ñaameŋo niŋ yaamaroo la le.

⁸N diŋo, i lamoyi i faamaa la yaamaroo la, aduŋ i kana balaŋ i baamaa la karandiroo la.

⁹Ì be ke la i ye ñara ñiimaa le ti i kuŋo bala, aniŋ kantotaa, ka i kaŋo ñarandi.

¹⁰N diŋo, niŋ junubelaalu lafita i marisa la, kana bula ì nooma.

¹¹Ì si a fo noo ko, “Ŋà taa dende dulaa to ka moo faa, waraŋ ka taa moo sooneeyaariŋo boyinkaŋ,

¹²ŋà ì kende kunuŋ, ŋà ì saareŋ, ŋà ì bumburuŋo ke kaburoo kono.

¹³M̀ be feŋ daa jawu siifaalu bee soto la le, ŋà ǹ na buŋolu fandi suuñaari feŋolu la.

¹⁴Naa kafu m̀ ma, fo ǹ niŋ i si suuñaari feŋolu talaa ŋà kaañaŋ.”

¹⁵N diŋo, kana taama niŋ wolu la siloo la, i siŋo bondi ì siŋo koto,

¹⁶kaatu ì ka sila kuruŋo le nooma, aduŋ ì ka tariyaa le ka yeloo boŋ.

¹⁷Hani a ye a tara kunoo ye kutindiŋo je, ì ye meŋ laa a kamma, a ka duŋ a kono le.

¹⁸Moo kuruŋolu be pareeriŋ wo le ñaama ka ì faŋolu faa, ì ye feeroo siti ì faŋolu niyo kamma le.

¹⁹Ñiŋ ne ka ke moo saayaañaa ti, meŋ ka a la naafuloo soto tapaleeyaa kono. Wo suuñaari feŋolu, wolu le ka ke ì la saatoo ti.

²⁰Ñaameŋo be kumandiroo la mbeedoolu kaŋ, a ye a kaŋo sikandi moolu bendulaalu to.

²¹Maakaŋo ka wara mbeedoolu mennu kono, a ye kumandiroo ke jeelu le to, a ye a la kumoolu fo bantabaalu to,

²²“Janniŋ waati jumaa le, alitolu moo sooneeyaariŋ baalu be lafi la sooneeyaa la? Janniŋ waati jumaa le, alitolu ñaawalilaalu be tu la ali la ñaawaliroo la, aniŋ alitolu toolewolu be londoo koŋ na?

²³Niŋ ali sonta, ŋa ali dandalaa, feŋ-wo-feŋ be n sondomoo kono, a te ali kumpa la, aduŋ m be n na miiroolu koyindi la ali ma le.

²⁴Bari kabiriŋ ŋa kumandiroo ke, ali maŋ n danku, ali maŋ hani m maafaŋo juubee, kabiriŋ ŋa m buloo tiliŋ ali la.

²⁵Bayiri ali maŋ soŋ, ŋa ali londi siloo la, ali ye ali ñaa kaasi n na dandalaaroo la le,

²⁶nte faŋo le be naa jele la ali la maasiiba kuwo la. M be ali ñaawali la le, niŋ ali dunta silaŋo kono,

²⁷niŋ silaŋo naata ali kaŋ komeŋ foño baa, maasiiboo komeŋ saafoñotoo, niitooroo niŋ bataa kuwo ye ali taki.

²⁸Wo to le ali be n kumandi la, bari n te ali danku la, ali be n ñini la le, bari ali te n je la.

²⁹Ali ye londoo koŋ ne, ali maŋ paree ka sila Yaawe la,

³⁰ali balanta n na dandalaaroo la le, ali ye ali ñaa kaasi n na yitandiroo la,

³¹wo to ali ye meŋ fii, wo le be faliŋ na ali ye, ali faŋo daajikoo, wo le be ali toora la.

³²Ka siloo bula, wo le ka moo sooneeyaariŋ baa faa. Toolewolu ka laa meŋ ke ì faŋo daajikoolu la, wo le ka ì kasaara.

³³Bari moo-wo-moo ye i lamoyi n na, a be tanka la le, aduŋ a be tara la kayiroo kono le, a te sila la kooroo kuwo la.”