Read Mandinka Kuma Kotoomaalu 10 Bible Online

Kuma Kotoomaalu 10 - Mandinka bible

Kuma Kotoomaalu 10

¹Ñinnu le mu Sulemani la kuma kotoomaalu ti: Diŋ kendoo ka seewoo kuwo le naati a faamaa kaŋ, bari diŋ fuuriŋo mu a baamaa ye niitooroo le ti.

²Naafuloo meŋ sotota tilimbaliyaa kono, maŋ nafaa soto, bari tiliŋo si moo niyo tankandi noo le.

³Yaawe* buka moo tilindiŋo konkoriŋo tu jee, bari a buka moo kuruŋo lafinna kuwo ke a ye.

⁴Niŋ i katakolenteeyaata, a ka i fuwaareyandi le, bari niŋ i ka dookuwo ke kendeke, i be fankamaayaa la le.

⁵Diŋo meŋ ka siimaŋo fankanta katiri waatoo, mu diŋ ñaamendiŋo le ti, bari diŋo meŋ ka tara siinoo la katiri waatoo, wo ka maloo le naati a la moolu kaŋ.

⁶Neemoo be moo tilindiŋo le ye, bari moo kuruŋo la kumoo, fitinoo le ka tara wo kooma.

⁷Niŋ moo kendoo faata, a too be ke la neemoo le ti, bari moo kuruŋo too be buruka la le.

⁸Moo ñaamendiŋo ka yaamaroo tu a sondomoo kono le, bari toolee daa siyaariŋo ka labaŋ kasaara la le.

⁹Moo meŋ maŋ sootaari soto ka tara tankoo le kono, moo jenkeriŋo wo ka waañaari le.

¹⁰Moo-wo-moo ka a ñaa kati moolu ñaa la, a ka kuyaa le saabu, aduŋ toolee daa siyaariŋo ka labaŋ kasaara la le.

¹¹Moo tilindiŋo la kumoo mu duniyaa sambaraŋo le ti, bari moo kuruŋo la kumoo, fitinoo le ka tara a kooma.

¹²Konnanteeyaa ka sonkoo le kurukuru, bari kanoo ka a ñaa laa kuu kuruŋolu kaŋ ne.

¹³Ñaameŋ kumoo ka bo moo le daa kono, meŋ ye kalamutaroo ke, bari hakilintaŋo wo taa mu busoo le ti.

¹⁴Moo ñaamendiŋolu ka londoo kafuŋ-kafuŋ ne, bari toolewo daakumoo ka tiñaaroo le saabu.

¹⁵Fankamaalu la naafuloo le mu ì la tatoo ti, fuwaaroolu la fuwaareyaa le ka ì kasaara.

¹⁶Moo tilindiŋo la joo mu baluwo le ti, bari moo kuruŋo ka mantooroo le soto.

¹⁷Moo meŋ sonta kuluuroo la, wo be baluu kendoo soto la le, bari moo-wo-moo balanta tilindiroo la, a ka fili le.

¹⁸Moo meŋ lafita ka a la konnanteeyaa maabo, a ka faniyaa le fo, aduŋ meŋ ka koomakumaroo ke, wo mu toolewo le ti.

¹⁹Niŋ i daa siyaata, junuboo buka foo i la kumoo kono, bari moo meŋ ka a neŋo mara, wo ñaamenta le.

²⁰Moo kendoo la kumoo niŋ kodiforoo le mulunta, bari moo kuruŋo la sondome jawuyaa maŋ nafaa soto.

²¹Moo tilindiŋo la kumoo ka moo jamaa le nafaa, bari hakilintaŋyaa le ka toolewolu faa.

²²Yaawe la neemoo le ka naafuloo samba naŋ, bari kata baa buka feŋ ne lafaa a kaŋ.

²³Toolewo ka niidiyaa soto kuruŋyaa le kono, bari moo meŋ ye fahaamuroo soto, ñaameŋ kuwo ka wo seewoo le.

²⁴Moo kuruŋo silata kuwo meŋ na, a be bula la a kono le, bari moo kendoo ye meŋ ŋaniya, wo le be ke la a ye.

²⁵Niŋ foño baa feeta, a ka moo kuruŋolu samba le, bari moo tilindiŋolu ka tara bambandiŋ ne fo abadaa.

²⁶Ko bineekaroo* ka kumu ñiŋo bala ñaameŋ, aniŋ siisiyo ka ñaa mantoora ñaameŋ, katakolentewo ka ke a kiilaalu ye wo le ñaama.

²⁷Yaawe ñaasilaŋo ka moo so siimaayaa le la, bari moo kuruŋolu ka sii dooyaa le soto.

²⁸Moo tilindiŋolu la jikoo ka labaŋ ì ye seewoo le la, bari moo kuruŋolu la jikoo ka ke ì ye kenseŋo le ti.

²⁹Yaawe la siloo mu tankoo le ti moo tilindiŋolu ye, bari a mu kasaaroo le ti kuu kuruŋ kelaalu ye.

³⁰Moo tilindiŋolu be tu la tankoo le kono, bari moo jenkeriŋolu be buruka la le.

³¹Moo tilindiŋolu ka ñaameŋ kumoolu le fo, bari moo meŋ neŋo ka tu kuma jawu fo la, wo te baluu la.

³²Moo tilindiŋolu ka a loŋ ne, kumoolu mennu diyaata moolu ye, bari moo kuruŋolu ka kuma jawoolu doroŋ ne fo.