Read Mandinka Kuma Kotoomaalu 11 Bible Online

Kuma Kotoomaalu 11 - Mandinka bible

Kuma Kotoomaalu 11

¹Tilimbaliyaa peesaroo mu Yaawe* tanoo le ti, bari sumandiroo meŋ tilinta, wo ka a seewoo le.

²Niŋ i ye i faŋ wara, maloo ka naa le, bari fammajiyo, ñaameŋo ka soto wo le kono.

³Moo tilindiŋolu la beteyaa le ka ì kanta, bari jamfaamoolu la jamfaa maañaa le ka ì kasaara.

⁴Naafuloo te nafaa soto la Alla la kamfaa luŋo, bari tiliŋo si moo tanka noo saayaa ma le.

⁵Moo meŋ maŋ sootaari soto, la tiliŋo le ka sila kendoo yitandi a la, bari moo kuruŋo ka bula a faŋo la jawuyaa le kono.

⁶Tiliŋ maañaa le ka moo kendoo tanka, bari tilimbaloo la hame kuu jawoo ka ke a faŋo ye kutindiŋo le ti.

⁷Niŋ moo kuruŋo faata, a la jikoo ka tiñaa le, aduŋ a hame kuwo ka ke a ye kenseŋo le ti.

⁸Moo tilindiŋo ka tanka kataa ma le, wo kataa ye naa muruŋ moo kuruŋo kaŋ.

⁹Alla lombaloo ka a siiñoo tiñaa a daakumoo le la, bari londoo, wo le ka moo tilindiŋo kanandi.

¹⁰Saatee moolu ka seewoo le, niŋ moo tilindiŋo la kuwolu beteyaata, aduŋ maadiyaa fanaa le ka tara keriŋ, niŋ moo kuruŋo kasaarata.

¹¹Ka bo niŋ moo kendoolu la neemoo la, wo le ka saatewo yiriwandi, bari moo kuruŋolu daakumoolu le ka a kasaara.

¹²Moo-wo-moo ka moo malundi, buka hakilimaayaa kuu ke, hakilimaa ka a siiñoo la malu kuwo tu a kono le.

¹³Moo daa siyaariŋo ka kulloo waañaaroo le ke, bari lannamoo ka kulloo maabo le.

¹⁴Niŋ bankoo maŋ yaamarilaa soto, a ka seyi kooma le, bari niŋ yaamarilaalu siyaata, ñaatotaa buka baayi.

¹⁵Ka luntaŋo sankayaa juloo to, ka bataa le samba naŋ, bari niŋ i balanta, wo le mu kuu koyiriŋo ti.

¹⁶Musu ŋaniya kendoo ka buuñaa soto le, bari kee hadumeriŋo ka naafuloo doroŋ ne soto.

¹⁷Moo ŋaniya kendoo ka a faŋo nafaa le, bari moo ŋaniya jawoo ka mantooroo le naati a faŋo ye.

¹⁸Moo kuruŋo buka a halaaloo soto, bari meŋ ka kuu betoo baara, a la joo ka ke kuu kendoo le ti.

¹⁹Moo-wo-moo wakiilita ka ke moo tilindiŋo ti, be baluu la le, bari moo-wo-moo ka bula fitina kuwo nooma, be faa la le.

²⁰Ŋaniya jawuyaa mu Yaawe tanoo le ti, bari mennu maŋ sootaari soto, a ka seewoo wolu la kuwolu la le.

²¹I si ñiŋ loŋ ko, moo kuruŋo te kana la mantoora kuwo ma, bari meŋ tilinta, wo be kana la le.

²²Ko sani konnaa ka mulunjawuyaa seewoo nuŋo bala ñaameŋ, wo le mu musu ñiimaa ti, meŋ maŋ a taañaa loŋ.

²³Moo tilindiŋo ye meŋ ŋaniya, a labaŋo ka ke kuu kendoo le ti, bari moo kuruŋo hame kuwo, wo labaŋo ka naa ke kamfaa kuwo le ti.

²⁴Doo ka sooroo ke le waati-wo-waati, hani wo, a la naafuloo ka tu siyaariŋ, bari doo buka sooroo ke muumeeke, a ka naa labaŋ fuwaareyaa la.

²⁵Sooroo feeyaata meŋ bulu, wo be fankamaayaa la le, aduŋ moo-wo-moo ye moo so jiyo la, ate fanaa be jiyo soto la le.

²⁶Moolu ka moo danka le, meŋ ka siimaŋo maabo niŋ a mankita, bari neemoo be moo le ye, meŋ ka a waafi wo waatoo.

²⁷Niŋ i ye a kata kendeke ka kuu kendoo ñini, i be maakoyiroo soto la le, bari kuu jawoo ka naa moo le kaŋ meŋ ka a ñini.

²⁸Moo-wo-moo ye a jikoo loo a la naafuloo kaŋ, a be kasaara la le, bari moo tilindiŋolu be firiŋ na le ko teŋ firoo.

²⁹Moo meŋ ka mantoora kuwo samba a baadiŋolu kaŋ, wo te feŋ keetaa la fo foño kenseŋo, aduŋ toolewo le be ke la moo ñaamendiŋo la joŋo ti.

³⁰Moo tilindiŋo sotofeŋo mu baluwo yiroo le ti, bari fitinoo ka moofaa le saabu.

³¹Niŋ moo tilindiŋo la baaroo ka joo ñiŋ duniyaa kono, wo to tooñaa-tooñaa, moo kuruŋo niŋ junubelaa fanaa be ì taa soto la le.