Read Mandinka Kuma Kotoomaalu 12 Bible Online

Kuma Kotoomaalu 12 - Mandinka bible

Kuma Kotoomaalu 12

¹Moo-wo-moo sonta kuluuroo la, i lafita londi ñinoo le la, bari meŋ maŋ lafi yitandiroo la, wo mu hakilintaŋo le ti.

²Moo kendoo ka maakoyiroo soto Yaawe* bulu le, bari a ka feere jawu sitilaa halaki le.

³Jawuyaa te moo tankandi noo la, bari moo tilindiŋolu te buruka la muumeeke.

⁴Musoo meŋ ye daajika kendoo soto, a mu kewo ye sapuraŋo le ti, bari musu malubaloo ka muluŋ a fee le ko kuuraŋ jawoo a balajaatoo kono.

⁵Moo tilindiŋolu la feeroo ka ke kuu tilindiŋo le ti, bari moo kuruŋolu la yaamaroo ka neeneeroo le ke.

⁶Moo kuruŋolu la diyaamoo ka moofaa le saabu, bari moo tilindiŋolu la kumoolu le ka ì tanka.

⁷Moo kuruŋolu be kasaara la le, ì te tara la keriŋ kotenke, bari moo tilindiŋolu niŋ ì la dimbaayaalu ka tara bambandiŋ ne.

⁸Ì ka moo jayi le, niŋ a ye ñaameŋ kuwo ke, bari moo ŋaniya jawoo ka tara jutunnayaa le kono.

⁹I faŋo kaañandi, i la baluwo si sooneeyaa, wo le fisiyaata ka i faŋo warandi, feŋ te i bulu.

¹⁰Hani moo tilindiŋo la beeyaŋo, a ka a suulafeŋo dii a la le, bari moo kuruŋo, hani a la beteyaa ka ke jawuyaa siloo doroŋ ne ti.

¹¹Moo meŋ ka dookuwo ke kendeke a la kunkoo to, be siimaŋ jamaa soto la le, bari meŋ ka tara kuu kuntaŋo bayindi kaŋ, wo mu hakilintaŋo le ti.

¹²Moo kuruŋo ka hame le, ka nafaa soto a la kuu kuruŋ kewo to, bari moo tilindiŋo ka ñaatotaa le soto.

¹³Moo kuruŋo la junube kumafoo le ka a duŋ bataa kono, bari moo tilindiŋo ka kana mantoora kuwo ma le.

¹⁴Nafaa kuu jamaa ka soto hadamadiŋo daakumoo le to, a ye kuu-wo-kuu dookuu, wo le ka ke a la joo ti.

¹⁵Toolewo ka a miira le ko, a la siloo le mu sila tilindiŋo ti, bari moo ñaamendiŋo ka soŋ yaamaroo la le.

¹⁶Toolewo ka a la kamfaa yitandi juuna le, bari hakilimaa ka a ñaa kaasi nendiroo la le.

¹⁷Seedoo meŋ be tooñaa kaŋ ka kuu tilindiŋo le fo, bari seedenduroo ka faniyaa doroŋ ne fo.

¹⁸Ka kuma fo i maŋ i miira, ka munta le ko niŋ hawusaroo* ye moo soo, bari moo ñaamendiŋo daakumoo si moo jaara noo le.

¹⁹Daa meŋ ka tooñaa kumoo fo, ka siimaayaa le, bari faniyaa folaa siyo buka jamfa.

²⁰Neeneeroo ka tara moolu le hakiloo kono, mennu pareeta kuu kuruŋ kewo la, bari mennu ka tara kayira kuwo to, ka seewoo soto le.

²¹Mantoora kuu buka ke moo tilindiŋo la, bari moo kuruŋo baloo bee ka tara faariŋ kataa kuwo le la.

²²Faniyaa foo mu Yaawe tanoo le ti, bari meŋ ka kuu tilindiŋo ke, a ka seewoo wo la kuwo la le.

²³Hakilimaa buka a la londoo kankulaa, bari toolewo ka tara a la tooleeyaa kankulaa la le.

²⁴Soobeeyaa le ka maraloo sii moo la, bari moo hamentaŋo ka labaŋ joŋyaa dookuwo le la.

²⁵Jaakaloo si moo niyo toorandi noo le, bari kuma diimaa ka a niyo seewondi le.

²⁶Moo tilindiŋo ka a teeroolu yaamari kuu kendoo le la, bari moo kuruŋo ka taa niŋ siloo meŋ na, wo ka moo filindi le.

²⁷Katakolentewo ka suboo muta wuloo kono le, bari a buka a tabi noo, bari moo saayiriŋo ka a la sotofeŋo nafaa je le.

²⁸Ka sila tilindiŋo nooma, wo le mu baluwo sambaraŋo ti, aduŋ saayaa te wo siloo kaŋ.