Read Mandinka Kuma Kotoomaalu 13 Bible Online

Kuma Kotoomaalu 13 - Mandinka bible

Kuma Kotoomaalu 13

¹Diŋ kendoo ka bula a faamaa la yaamaroo nooma le, bari ñaawalilaa buka soŋ yitandiroo la.

²Moo be joori betoo soto la a fokuma kendoolu to le, bari moolu mennu tilimbaliyaata, ka tara hameriŋ fitina kuwo doroŋ ne la.

³Moo meŋ ka a fokumoo loŋ, ka a niyo le tankandi, bari moo meŋ ka kumoo fo a kuŋ fee, ka kasaara le.

⁴Katakolentewo si hame ñaa-wo-ñaa, a buka feŋ soto noo, bari moo soobewo ka feŋ-wo-feŋ ñini, a ka sooneeyaa a ye le.

⁵Moo tilindiŋo tanoo le mu faniyaa kuwo ti, bari moo kuruŋo ka maloo niŋ niitoora kuwo le naati.

⁶Tiliŋo le ka moo kendoo kanta, bari jawuyaa le ka junubelaalu kasaara.

⁷Doo ka a faŋo ke naafulutiyo ti le, a ye a tara a maŋ feŋ soto, doo ka a faŋo fuwaareyandi, a ye a tara fankamaa baa le mu.

⁸Moo la naafuloo si a niyo kumakaa noo le, bari fuwaaroo te tara la nii dewuŋ kono, kaatu a maŋ feŋ soto ka a niyo tankandi.

⁹Moo tilindiŋo ka mala le ko tiloo, bari moo jawoo la lampoo be dubeŋ na le.

¹⁰Faŋ waroo ka sonkoo doroŋ ne saabu, bari ñaameŋo ka tara moolu le kono, mennu ka soŋ yaamaroo la.

¹¹Naafuloo meŋ sotota tariyaake, a ka kasaara katabake le, bari moo meŋ ka a kafuŋ-kafuŋ, a ka siyaa wo bulu le.

¹²Ka moo fayiŋ-fayiŋ ka a sondomoo toora le, bari niŋ jikoo timmata, wo mu baluwo yiroo le ti.

¹³Moo-wo-moo balanta yaamaroo la, be a tinewo je la le, aduŋ moo meŋ sonta kuluuroo la, be joo soto la le.

¹⁴Moo ñaamendiŋo la karandiroo le mu duniyaa sambaraŋo ti, i si a je moo si tanka saayaa kutindiŋo ma.

¹⁵Hakilimaa ka buuñaa soto le, bari tilimbaloo taaraŋ siloo le ka a kasaara.

¹⁶Moo meŋ ye a kekuwo loŋ, ka a la londoo taamandiñaa loŋ ne, bari toolewo ka a la tooleeyaa le kankulaa.

¹⁷Kiilaa kuruŋo ka bataa kuwo le samba naŋ, bari kiilaa tilindiŋo, wo ka kayiroo le naati.

¹⁸Moo meŋ buka soŋ yaamaroo la, fuwaareyaa niŋ maloo mu a taa le ti, bari moo meŋ sonta kalamutandiroo la, ka buuñaa soto le.

¹⁹Niŋ moo la jikoo timmata, a ka a seewoo le, bari toolewo buka soŋ a ñaa kaasi la kuu kuruŋ kewo la.

²⁰Moo meŋ niŋ moo ñaamendiŋo ka taa, fanaa be ñaameŋo soto la le, bari toolewo taañooyaa mu bataa le ti.

²¹Junubelaa harijewo ka tu sitiriŋ ne, bari firiŋo le ka ke moo tilindiŋo la joo ti.

²²Moo kendoo ka keetaafeŋo tu a diŋolu ye le hani a mamariŋolu fanaa ka a soto le, bari junubelaa la naafuloo ka tara maaboriŋ moo tilindiŋo le ye.

²³Fuwaaroo si siimaŋ jamaa soto noo a la kunkoo to le, bari tilimbaliyaa le ka a bee kasaara.

²⁴Moo meŋ buka a diŋo kuluu busoo la, wo ye a diŋo koŋ ne, bari meŋ ye a diŋo kanu, wo ka saayi kuluuroo la le.

²⁵Moo tilindiŋo ka domoroo soto le, meŋ be a konoo faa la, bari moo jawoo ka tu konkoriŋ ne.