Read Mandinka Kuma Kotoomaalu 14 Bible Online

Kuma Kotoomaalu 14 - Mandinka bible

Kuma Kotoomaalu 14

¹Musu ñaamendiŋo le ka a la buŋo loo, bari musu kuntaŋo faŋo le ka a taa janjaŋ.

²Moo meŋ tilinta, wo le ka sila Yaawe* la, bari moo daajika jawoo, wo ka jutu a la le.

³Toolewo la faŋ wara maañaa le ka a daakumoo siyandi, bari moo ñaamendiŋo la kumoo le ka a tankandi.

⁴Niŋ ninsi senelaa te daameŋ, bomboloo ka tara kenseŋyaariŋ ne, kaatu tuuraa semboo, wo le ka katirifeŋo siyandi moo ye.

⁵Seede tilindiŋo buka faniyaa fo, bari seedenduroo, wo ka faniyaa doroŋ ne fo.

⁶Ñaawalilaa ka ñaameŋo ñini le, bari a buka a soto, londoo sotoo ka sooneeyaa moo bulu le, meŋ ye kuwolu bo noo ñoo to.

⁷I faŋo jamfandi kee kuntaŋo la, kaatu i te londi soto la, ka bo a daakumoo to.

⁸Hakilidiimaa la ñaameŋo, wo le ka a so miiroolu la a taañaa to, bari toolewo la kuntaŋyaa maañaa le ka a filindi.

⁹Toolewo maŋ junube kuwo muta feŋ ti, bari moo tilindiŋo ka seewoo soto Alla la maakoyiroo la le.

¹⁰Niŋ i seewoota i dammaa le taa mu, i la niikuyaa fanaa mu i taa le ti, i niŋ moo-wo-moo te deŋ noo la ì la.

¹¹Moo jawoo la buŋo be kasaara la le, bari moo kendoo taradulaa ka tara yiriwaariŋ ne.

¹²Sila le ka tara jee, meŋ ka tiliŋ moo fee, bari labaŋo la, a ka a samba saayaa le kaŋ.

¹³Hani niŋ i be jeloo la, i niyo si tara kuyaariŋ noo le, aduŋ seewoo si labaŋ noo niikuyaa la le.

¹⁴Moo kuruŋo be a la joo soto la a ñaama le a maañaalu to, aduŋ moo kendoo fanaa be a taa soto la le.

¹⁵Moo sooneeyaariŋ baa ka laa kuwolu bee la le, bari hakilimaa ka i miira a taañaa la le.

¹⁶Moo ñaamendiŋo ka a hakilitu le, aduŋ a ka a koo dii kuu kuruŋ kewo la le, bari toolewo ka tariyaa le ka kuu ke, aduŋ a buka a ke a ñaama.

¹⁷Moo meŋ kamfaa tariyaata, a ka kuu fuuriŋolu le ke. Moolu ka feere jawu sitilaa koŋ ne.

¹⁸Moo sooneeyaariŋ baa ka kuntaŋyaa le keetaa, bari hakilimaa ka ke londitiyo le ti.

¹⁹Moo kuruŋo be ñoyi la moo kendoo ñaatiliŋo la le, aduŋ moo jawoo, wo le be ñoyi la moo tilindiŋo la bundaa to.

²⁰Hani fuwaaroo siiñoo ka jutunnayaa tiliŋ a la le, a la fuwaareyaa kaŋ, bari fankamaa ka teeri jamaa le soto.

²¹Moo ka jutu a siiñoo la, wo mu junube kuwo le ti, bari barakoo be moo le ye, meŋ ka moolu maakoyi, mennu be suuloo kono.

²²Fo meŋ ka kuu kuruŋo feere maŋ tara filoo le kono? Bari meŋ ka tara kuu kendoo to, wo ka kanoo niŋ buuñaa soto le.

²³Dookuu-wo-dookuu tinewo be jee le, bari kuma kenseŋ foo ka fuwaareyaa le saabu.

²⁴Moo ñaamendiŋo la naafuloo le ka ke a la buuñaa ti, bari kuntaŋyaa le ka ke toolewo taa ti.

²⁵Seede tilindiŋo ka niyo tankandi le, bari seedenduroo mu jamfantuŋo le ti.

²⁶Moo meŋ silata Yaawe la, wo ye tankaraŋ tatoo le soto, aduŋ a be ke la a diŋolu ye tankaraŋo le ti.

²⁷Yaawe ñaasilaŋo le mu duniyaa sambaraŋo ti, fo a si moo tankandi saayaa kutindiŋo ma.

²⁸Niŋ moo siyaata mansa nooma, wo le ka a so semboo la, bari niŋ mansa maŋ moo soto, a si kasaara noo le.

²⁹Moo meŋ ka kamfaa juuna, a ka a la kuntaŋyaa le yitandi, bari moo meŋ buka kamfaa juuna ka ke fahaamurulaa baa le ti.

³⁰Hakili tenkuŋo ka balajaatoo ñiiñandi le, bari kiiliyaa, wo ka balajaatoo muluŋo jawuyandi le.

³¹Moo meŋ ka fuwaaroolu mantoora, a ka ì Daamansoo le sooki, bari moo meŋ ye balafaa soto ì ye, wo ka Alla le buuñaa.

³²Moo jawoo la kuu kuruŋ kewo le ka a kasaara, bari moo tilindiŋo la beteyaa, wo le ka a tankandi.

³³Ñaameŋo be moo le hakiloo kono, meŋ ye fahaamuroo ke, bari a maŋ tara toolewo sondomoo kono.

³⁴Tiliŋo ka bankoo samba ñaato le, bari junuboo mu malu kuwo le ti banku moolu ye.

³⁵Mansa ka kontaani a la dookuulaa la kuwo la le, meŋ ye ñaameŋo soto, bari a ka kamfaa dookuulaa bulu le, meŋ ka malubaliyaa maañaa ke.