Read Mandinka Kuma Kotoomaalu 15 Bible Online

Kuma Kotoomaalu 15 - Mandinka bible

Kuma Kotoomaalu 15

¹Jaabiri diimaa ka kamfaa bayi le, bari kuma kuumaa ka kamfandiroo le ke.

²Moo ñaamendiŋo la kumoo ka londoo la kuwo diyandi moolu ye le, bari toolewo daakumoo ka ke kuu kuntaŋo doroŋ ne ti.

³Yaawe* ka dulaalu bee le je, a ka a hakilitu moo jawoolu niŋ moo kendoolu to le.

⁴Moo meŋ ka kuma diimaa fo ka moolu maakoyi, mu baluwo yiroo le ti, bari meŋ daakumoo ka moolu jamfaa, wo ka jikilateyoo le ke.

⁵Toolewo buka soŋ a faamaa la kuluuroo la, bari moo-wo-moo sonta tilindiroo la, wo ye a kekuwo loŋ ne.

⁶Moo tilindiŋo la buŋo ka tara faariŋ naafuloo le la, bari moo jawoo sotofeŋo le ka mantooroo naati a ye.

⁷Moo ñaamendiŋo la kumoo le ka londoo janjandi, bari toolewo buka wo ke.

⁸Moo jawoo la sadaa* mu Yaawe tanoo le ti, bari a ka seewoo le, ka moo tilindiŋo la duwaa muta.

⁹Moo jawoo taañaa mu Yaawe tanoo le ti, bari a ka lafi moo la le meŋ ka bula tiliŋo nooma.

¹⁰Mantoora jawoo le be moo batu kaŋ, meŋ maŋ tiliŋ siloo la, moo meŋ maŋ lafi yitandiroo la, wo be faa la le.

¹¹Kaburoo niŋ laakira be laariŋ Yaawe ñaatiliŋo la le, moolu si ì sondomoo kono maabo a ma ñaadii le?

¹²Ñaawalilaa buka soŋ jalayiroo la, aduŋ a buka moo ñaamendiŋo ñininkaa.

¹³Jusulaa ka finti ñaadaa bala le, bari niŋ i jusoo diminnaata, i ka jiraŋ ne.

¹⁴Hakilidiimaa ka lafi londi ñinoo le la, bari toolewo ka kontaanoo soto lombaliyaa kuwo doroŋ ne to.

¹⁵Fuwaaroo la luŋolu bee ka koleyaa a fee le, bari nii laariŋo ka baluwo diyaa loŋ ne.

¹⁶I ye domandiŋ soto i ye sila Yaawe la, wo le fisiyaata i ye naafuloo soto, i niŋ bataa.

¹⁷I ye cuura kenseŋo miŋ kanunteeyaa kono, wo le fisiyaata subu kendiŋ domoo ti, konnanteeyaa be laariŋ meŋ kaŋ.

¹⁸Jusu tariyaa ka sonkoo le wulindi, bari moo sooneeyaariŋo ka sonkoo daa faa le.

¹⁹Katakolentewo la siloo ka tara faariŋ ŋaniŋolu le la, bari moo tilindiŋo la siloo ka ke sila diimaa le ti.

²⁰Diŋ kendoo ka seewoo kuwo le naati a faamaa kaŋ, bari diŋo meŋ tooleeyaata, wo ka jutu a baamaa la le.

²¹Tooleeyaa ka diyaa moo le ye meŋ maŋ hakiloo soto, bari moo meŋ ka fahaamuroo ke, wo ka tara tilindiŋ siloo le la.

²²Yaamarisotobaliyaa le ka feeroolu tiñaa, bari niŋ i ye yaamarilaa jamaa soto, a ka beteyaa le.

²³Moo ka seewoo soto kuma diimaa to le, a ye moo jaabi meŋ na, kuma kendoo meŋ fota a waatoo la, ka diyaa moo ye le.

²⁴Siloo meŋ si moo balundi noo, le ka moo ñaamendiŋo samba ñaato, a buka taa niŋ sila la, meŋ si moo samba saayaa kaŋ.

²⁵Yaawe ka faŋ wara moo la buŋo kasaara le, bari a ka furuyaamusoo la sotofeŋolu tankandi le.

²⁶Kuu jawu feeroo mu Yaawe tanoo le ti, bari kuma kende foo, wo beteyaata a fee le.

²⁷Moo meŋ ka hadumoo samba a la sotoo la karoo la, a ka a la dimbaayaa le batandi, bari moo meŋ ka balaŋ duku mutoo la, wo be baluu la le.

²⁸Moo tilindiŋo ka miirali ke a jaabiriñaa la le, bari moo kuruŋo daakumoo ka ke kuma jawuyaariŋo doroŋ ne ti.

²⁹Yaawe ka jamfa moo jawoolu la le, bari a ka moo kendoolu la duwaa jaabi le.

³⁰Niŋ i ye moo je meŋ ñaalantoo be diyaariŋ, i fanaa ka jusulaa le, aduŋ kibaari diimaa ka jaatoo bambandi le.

³¹Moo-wo-moo sonta moolu la yaamari kendoo la, a be tara la moo ñaamendiŋolu le kono.

³²Moo-wo-moo balanta kuluuroo la, a ka jutu a faŋo le la, bari moo meŋ sonta yitandiroo la, wo ka fahaamuroo soto le.

³³Yaawe ñaasilaŋo ka moo karandi ñaameŋo le la, janniŋ moo ka buuñaa soto, fo a ye a fammajii foloo.