Read Mandinka Kuma Kotoomaalu 16 Bible Online

Kuma Kotoomaalu 16 - Mandinka bible

Kuma Kotoomaalu 16

¹Hadamadiŋo ka a fansuŋ miiroolu soto a sondomoo kono le, bari Yaawe* le mu kerilaa ti.

²Hadamadiŋo taañaa ka munta a fee le ko, a maŋ sootaari soto, bari Yaawe le ka sondomoo kono kuwolu bee kisikisi.

³I be feŋ-wo-feŋ to, i si i la kuwo tu Yaawe bulu, i la natoolu bee be timma la le.

⁴Yaawe ye feŋolu bee daa daliiloo le kamma, hani moo jawoo be a fansuŋ luŋo soto la le.

⁵Yaawe te moo-wo-moo tu la jee meŋ ka a faŋ wara, kaatu a tanoo le mu wo ti.

⁶Ka bo kanu bambaloo niŋ tiliŋo la, junube kafaroo si soto noo wo le kono, niŋ moo silata Yaawe la, a te hame la kuu kuruŋ kewo la.

⁷Niŋ moo taañaa ye Yaawe seewoo, kayiroo ka tara a niŋ a jawoolu teema le.

⁸I ye domandiŋ soto tiliŋo kono, wo le fisiyaata jamaa ti jenkoo kono.

⁹Hadamadiŋo ka a la feeroolu siti a sondomoo kono le, bari Yaawe le ka a la kuwolu bee taamandi.

¹⁰Mansa daakumoo ka ke moolu fee kuma kummaa le ti, wo to a la kumoo ñanta tiliŋ na tooñaa le la.

¹¹Sumandiroo niŋ peesari tilindiŋo ka bo Yaawe le bulu, feŋ-wo-feŋ ka sumaŋ, a la dookuwo le mu.

¹²Mansoolu tanoo le ñanta ke la kuu jawu kewo ti, kaatu mansakundaa buka bambaŋ noo tiliŋo kooma.

¹³Tooñaa folaa la kuwo ka mansa seewoo le, aduŋ a ka lafi moo la le meŋ ka tooñaa fo.

¹⁴Mansa la kamfaa mu saayaa taamanseeroo le ti, bari moo ñaamendiŋo le ka a la kamfaa jindi.

¹⁵Niŋ mansa ñaalantoo be diyaariŋ, wo mu baluwo le ti, aduŋ a la beteyaa ka muluŋ ne ko tawaloo meŋ ka samaa naati.

¹⁶Ka ñaameŋo soto, le fisiyaata ka ke sanitiyo ti, aduŋ fahaamuroo le be kodiforoo ñaato.

¹⁷Moo kendoo ka taa niŋ sila betoo le la, meŋ buka a duŋ kuu kuruŋo kono, meŋ ka a hakiloo tu a taañaa to, wo ka a niyo le tankandi.

¹⁸Faŋ waroo ka moo samba kasaaroo le kaŋ, aduŋ faŋ wara moo la kuwolu buka labaŋ kuu.

¹⁹I ye i fammajii, i ye ke fuwaaroo ti, wo le fisiyaata, i niŋ faŋ wara moo ye suuñaari feŋolu talaa.

²⁰Moo-wo-moo sonta yaamarimutoo la, a be ñaatotaa soto la le, aduŋ neemoo be moo le ye meŋ laata Yaawe la.

²¹Moo ñaamendiŋo le ka kuwolu bo noo ñoo to, aduŋ kuma diimaa ka yaamaroo bambandi le.

²²Fahaamuroo mu baluwo sambaraŋo le ti moo ye, meŋ ye a soto, bari tooleeyaa ka bataa le naati toolewo kaŋ.

²³Moo ñaamendiŋo ka a fokumoo loŋ ne, aduŋ a daakumoo ka yaamaroo le ke.

²⁴Kuma diimaa ka munta le ko liyo, niŋ i ye a nene, a ka diyaa le, aduŋ a ka jaatoo kendeyandi le.

²⁵Sila le ka tara jee meŋ tilinta moo fee, bari labaŋo la, a ka a samba saayaa le kaŋ.

²⁶Lebereesoo konoo le ka a duŋ sembe la dookuwo to, konkoo le ka a duŋ a la.

²⁷Moo kuntaŋo ka feere jawoo le siti, aduŋ a la diyaamoo ka muluŋ ne ko, niŋ dimbaa ye kasaaroo ke.

²⁸Moo jawoo ka fitinoo le maamandi, aduŋ naafikoo ka teeroolu la teeriyaa le tiñaa.

²⁹Fitinamoo ka a siiñoo marisa le, aduŋ a buka a tilindi niŋ sila kendoo la.

³⁰Moo meŋ ka a ñaa kati moolu ye, a ka feere jawoo le siti, aduŋ meŋ ka purucaroo ke, wo ka tara fitina kuwo le nooma.

³¹Tii koyoo mu siimaayaa taamanseeroo le ti, aduŋ a ka soto noo le, niŋ i tilinta i la baluwo kono.

³²Ka ke muñalaa ti, le fisiyaata ka ke kelejawaroo ti, moo meŋ ka a jusoo ñabu, wo le fisiyaata saatee taalaa ti.

³³Moolu ka alikuuroo* ke le, bari Yaawe faŋo le ka kuwolu koyindi.