Read Mandinka Kuma Kotoomaalu 17 Bible Online

Kuma Kotoomaalu 17 - Mandinka bible

Kuma Kotoomaalu 17

¹Ka mbuuru jaaroo ñimi kayiroo niŋ tenkuŋo kono, wo le fisiyaata domori diimaa domoo ti buŋo kono, sonkoo be daameŋ.

²Joŋo meŋ ñaamenta a la dookuwo kono, be dinkee fuuriŋo mara la le, aduŋ a niŋ a maarii la dimbaayaa be kaañaŋ na keetaafeŋo to le.

³Komeŋ dimbaa ka sanoo niŋ kodiforoo foroyandi ñaameŋ, Yaawe* ka moo sondomoo la kuwo kotobo wo le ñaama.

⁴Moo kuruŋo le ka i lamoyi kuma jawoo la, aduŋ faniyaa folaa le ka i lamoyi faniyaa kumoo la.

⁵Moo meŋ ka fuwaaroolu ñaawali, ka ì Daamansoo le sooki, meŋ ka seewoo maasiiba kuwo la, a te kana la maasiiboo ma.

⁶Mamariŋo ka ke mamoo ye ŋaañaaraŋo le ti, aduŋ dindiŋo fanaa ka kontaanoo soto, a la alifaalu la karoo le la.

⁷Kuma diimaa foo ka ke toolee baa fee kuu kuntaŋo le ti, bari feŋ ne maŋ jawuyaa mansa la faniyaa foo ti.

⁸Dukoo ka ke kundaanoo le ti moo ye, meŋ ye a dii, a taata daa-wo-daa a ka ke a ye ñaatotaa ti le.

⁹Moo meŋ ka yamfa moolu ye, ka teeriyaa le bambandi, bari meŋ ka kuma kotoo seyinkaŋo ke, ka teeri sutuŋolu la teeriyaa le tiñaa.

¹⁰Jalayiroo ka duŋ moo la le, meŋ ye kuwolu bo noo ñoo to, ka tambi junkuru kemoo la toolewo bala.

¹¹Moo kuruŋo ka tara balaŋ kuwo doroŋ ne to, kiilaa meŋ maŋ balafaa soto, ì be wo le kii la, ka taa a boyinkaŋ.

¹²Ka kata jata dimbaa la, ì ye meŋ diŋolu suuñaa a koto, wo le fisiyaata ka toolewo waliŋ, a la tooleeyaa maañaa kaŋ.

¹³Niŋ moo ye ñiiñaa joo jawuyaa la, jawuyaa buka bo a la karoo la muumeeke.

¹⁴Sonka wulindoo ka munta le ko, niŋ ì ye balaŋo sapoo bo, wo to kuwo daa faa, janniŋ sonkoo ka wuli.

¹⁵Yaawe tanoo le mu moo ti, meŋ niŋ a be kiitiyo kunna, a ka laa moo jawoo kaŋ, a ye bo moo tilindiŋo koto.

¹⁶Muŋ ne ye a tinna toolewo ñanta kodoo soto la ka ñaameŋo saŋ, niŋ a maŋ a ŋaniya ka karaŋo ke?

¹⁷I teeroo ka tara lafiriŋ i la le waati-wo-waati, aduŋ i niŋ i baadiŋo le ka deŋ niikuyaa la.

¹⁸Moo meŋ hakiloo maŋ kuwolu bo noo ñoo to, wo le be soŋ na ka a siiñoo la juloo ke a kunto dunoo ti.

¹⁹Moo meŋ lafita sonkoo la, a ka lafi junube kuwo le la, aduŋ moo meŋ ka faŋ wara maañaa ke, wo ka labaŋ boyoo le la.

²⁰Moo ŋaniya jawoo buka ñaatotaa soto, meŋ daakumoo ka neeneeroo ke, wo ka duŋ mantooroo le kono.

²¹Toolee baa wuluwo mu niitooroo doroŋ ne ti, a faamaa buka seewoo kuu soto a la karoo la.

²²Niilaa mu boori bete baa le ti balajaatoo ye, bari niŋ i niyo maŋ laa, i ka tara lamfuriŋ ne.

²³Moo kuruŋo ka dukoo muta kulloo le kono, ka jenke luwaa siloo la.

²⁴Moo meŋ ka kuwolu bo noo ñoo to, a ka ñaameŋ kuwolu le ke, bari toolewo hakiloo ka tara kuu jamaa le kaŋ, aduŋ a buka kututeyi ì to.

²⁵Toolewo ka niitooroo le naati a faamaa kaŋ, niikuyaa, a wuluu baa ye.

²⁶A maŋ ke siloo ti ka alimaanoo laa moo kaŋ, meŋ maŋ kuu ke, waraŋ ka moo kummaa buutee a la tiliŋo kaŋ.

²⁷Moo meŋ ka a fokumoo keseŋ, a mu londitiyo le ti, aduŋ moo meŋ na kamfaa maŋ tariyaa, wo ka fahaamuroo ke le.

²⁸Hani toolewo meŋ ka i deyi, ì ka a muta moo ñaamendiŋo le ti, niŋ a ye a neŋo muta, ì ka a bula moo hakilimaalu le kono.