Read Mandinka Kuma Kotoomaalu 18 Bible Online

Kuma Kotoomaalu 18 - Mandinka bible

Kuma Kotoomaalu 18

¹Moo meŋ ye a faŋo bondi moolu kono, ka tara a faŋo la kuwo dammaa le to, a buka fahaamuru soto.

²Fahaamuroo buka diyaa toolewo ye, bari a ka lafi le ka a fansuŋ miiroolu fo.

³Niŋ jawuyaa naata, jutunnayaa fanaa ka naa le, aduŋ horomantaŋyaa, maloo ka soto wo le to.

⁴Moo fokumoo diinonta baake le, aduŋ ñaamentoo kumoo mu woyoo le ti, meŋ jiyo ka tu bori la.

⁵A maŋ ke sila ti, ka laa moo jawoo kaŋ, waraŋ ka boloo buusi moo bulu meŋ maŋ feŋ ke.

⁶Toolewo daakumoo le ka sonkoo naati a ye, aduŋ a fokumoo le ka buuteeroo saabu a ma.

⁷Toolewo diyaamuñaa le ka a kasaara, aduŋ a neŋo le mu a faŋo ye kutindiŋo ti.

⁸Koomakumaroo ka munta le ko domori diimaa, a ka diyaa moo daa kono le.

⁹Moo meŋ katoo koleyaata a fee a la dookuwo to, a niŋ tiñaarilaa bee be konti kiliŋ ne.

¹⁰Yaawe* too mu tata bambandiŋo le ti, moo tilindiŋolu ka bori jee le, aduŋ ì ka tanka le.

¹¹Fankamaalu fee, ì la naafuloo mu saatee bambandiŋo le ti, aduŋ ì ye a miira le ko, a ka muluŋ sansaŋ jaŋo le la.

¹²Janniŋ moo ka duŋ kasaaroo kono, a ka a faŋo wara le, janniŋ moo ka buuñaa soto, fo a ye a fammajii foloo.

¹³Moo meŋ ka jaabiroo ke a maŋ i lamoyi, wo mu wo maarii la tooleeyaa niŋ a la maloo le ti.

¹⁴Niŋ moo niyo be laariŋ, a ka a maakoyi le niŋ a saasaata, bari niitooroo muñoo koleyaata le.

¹⁵Moo meŋ ye kuwolu bo noo ñoo to, wo ka lafi londi ñinoo le la, aduŋ moo ñaamendiŋo le ka lafi a moyi la.

¹⁶Soorifeŋo ka siloo le yele a diilaa ye, aduŋ a be a maakoyi la le, ka moo kummaa je.

¹⁷Moo meŋ foloo ye kumoo saata kiitiyo kono, ka muluŋ ne ko, a ye tooñaa le fo, bari fo niŋ a mooñoo fanaa diyaamuta.

¹⁸Alikuuri* fayoo si sonkoo daa faa noo le, aduŋ ate le ka sembemaalu la kuwolu bo ì ye ñoo to.

¹⁹Niŋ i ye kuu dimindiŋo ke i baadiŋo la, a ka munta le ko, tatoo le be ali teema, sonkoo ka talaañaa jawu le naati moolu teema.

²⁰Niŋ i daa ye i duŋ ka kuma-wo-kuma fo, i be a tinewo soto la le.

²¹Niŋ i ye kumoo fo, a si ke noo kuma kendoo ti le, waraŋ moofaa kuwo. Wo to niŋ i fokumoo ye a tinna i ye kuu soto, i ñanta soŋ na a la le.

²²Musu sotoo mu kewo fee kuu kendoo le ti, aduŋ a ka maakoyiroo soto Yaawe bulu le.

²³Fuwaaroo ka yamfoo daani le, bari fankamaa, wo ka moo jaabi saŋarake le.

²⁴Moo meŋ teeroo siyaata, a ka labaŋ kasaara la le, bari teeroo ka tara jee le, meŋ sutiyaata i la ka tambi i baadiŋo la.