Read Mandinka Kuma Kotoomaalu 19 Bible Online

Kuma Kotoomaalu 19 - Mandinka bible

Kuma Kotoomaalu 19

¹Ka ke fuwaaroo ti, i ye ke moo tilindiŋo ti, le fisiyaata, ka ke toolewo ti meŋ ka tu faniyaa fo la.

²Ka kuwo hame, i maŋ a londoo soto, maŋ ke kuu kendoo ti, aduŋ moo meŋ ñaa kandita, kekuwo ka bo a kono le.

³Moo faŋo la tooleeyaa le ka a duŋ kasaaroo kono, bari hani wo, a ka a laa Yaawe* le kaŋ.

⁴Naafuloo ka teeri jamaa le kumandi naŋ, bari fuwaaroo teeroo ka bori a la le.

⁵Seedenduroo te tu la jee, a maŋ toora, faniyaa folaa fanaa te kana la.

⁶Jamaa ka maakoyiroo ñini moo kummaalu le bulu, aduŋ moo bee teeri ka ke moo le ti, meŋ ka moolu so soorifeŋolu la.

⁷Niŋ fuwaaroo baadiŋo faŋo keta a konnaa ti, wo to a teeroolu la konnanteeyaa be ke la a kaŋ ñaadii le? Niŋ a suuloo be ì kaŋ, ì buka a maakoyi.

⁸Niŋ i ye i faŋo kanu, wo to i be ñaameŋo le nooma. Ka fahaamuroo tu i kono, wo le mu i la ñaatotaa ti.

⁹Seedenduroo te kana la, a maŋ toora, aduŋ faniyaa folaa be kasaara la le.

¹⁰A maŋ jari toolewo ye tara kayira kono, sako joŋo ye mansariŋolu mara.

¹¹Hakilimaa buka kamfaa juuna, aduŋ a ka horomoo soto le, ka a ñaa kaasi, niŋ i ye kuu ke a la.

¹²Mansa la kamfaa ka munta le ko, niŋ jatoo be bumbuŋ kaŋ, bari a la maakoyiroo ka muluŋ ne ko, niŋ komboo jiita fiifeŋolu kaŋ.

¹³Diŋ fuuriŋo mu a faamaa la tiñaa le ti, aduŋ musu fitinalaa ka munta le ko buŋo meŋ ka tu suleŋ na.

¹⁴Buŋolu niŋ naafuloo ka keetaa wuluulaalu le bulu, bari musoo meŋ ka a kekuwo loŋ, wo ka bo Yaawe le bulu.

¹⁵Naafoo ka moo siinondi le, aduŋ moo meŋ buka finti, ka taa ñinindiroo la, a ka konko le.

¹⁶Moo meŋ bulata yaamaroo nooma, a be baluu la le, bari moo meŋ buka a hakilitu a taañaalu to, wo be faa la le.

¹⁷Moo-wo-moo beteyaata fuwaaroo fee, a ka Yaawe le julu duŋ, aduŋ a be a joo la a kebaaroo la le.

¹⁸I diŋo kuluu a waatoo la, kana a juubee fo a ye kasaara.

¹⁹Fitinamoo ka fitinoo nafaa je le, niŋ i ye a tankandi, i be tu la a ke la le.

²⁰Ka i lamoyi dandalaaroo la, i ye soŋ yaamarimutoo la, labaŋo la i be ke la moo ñaamendiŋo le ti.

²¹Moo ka kuu jamaa feere a sondomoo kono le, bari Yaawe taa le ka ke kuu looriŋo ti.

²²Moo ñanta ñiŋ ne hame la, ka ke moo tilindiŋo ti, aduŋ ka ke fuwaaroo ti, le fisiyaata faniyaa folaa ti.

²³Yaawe ñaasilaŋo le mu baluwo sambaraŋo ti, wo to i si tara seewoo kono, i te bataa la.

²⁴Moo naafariŋo ka a buloo bula domoroo kono le, bari ka a ke a daa kono, ka ke a fee dookuwo le ti.

²⁵Ñaawalilaa lipa kendeke, fo moo sooneeyaariŋ baa si a kekuwo loŋ, moo meŋ ka kuwolu bo noo ñoo to, kalamutandi, aduŋ a be londoo soto la le.

²⁶Moo meŋ ka a faamaa la feŋolu sika a koto, aniŋ ka a baamaa bayi banta, mu diŋ ne ti, meŋ ka maloo niŋ horomantaŋyaa naati.

²⁷N diŋo, niŋ i ye i foño yaamari lamoyoo la, i ye meŋ karaŋ koomanto, i be ñina la a la le.

²⁸Seedenduroo buka tiliŋo muta feŋ ti, aduŋ faniyaa foo ka diyaa moo kuruŋo le ye.

²⁹Halakoo be ñaawalilaalu batu kaŋ ne, toolewolu fanaa koofaataa si tara pareeriŋ liparoo ye.