Read Mandinka Kuma Kotoomaalu 2 Bible Online

Kuma Kotoomaalu 2 - Mandinka bible

Kuma Kotoomaalu 2

¹N diŋo, niŋ i sonta n na kumoolu la, i ye n na yaamaroolu tu i kono,

²ka i tuloo tu ñaameŋo la kuwo to, i ye i hakiloo tu fo i si fahaamuroo ke,

³niŋ i hameta kuwo kesoo soto la, ka i kaŋo sikandi ka fahaamuroo ñini,

⁴niŋ i ye a ñini, komeŋ i ka kodiforoo ñini ñaameŋ, niŋ i ye a muta, komeŋ i ka naafuloo muta ñaameŋ,

⁵wo to i be Yaawe* ñaasilaŋo kalamuta la le, i be Alla loŋ na le.

⁶Kaatu Yaawe le ka moo so ñaameŋo la, londoo niŋ fahaamuroo bee ka bo ate le bulu.

⁷A ka ñaatotaa dii moo tilindiŋolu le la, a ka ke tankaraŋo ti moo kendoolu ye.

⁸Kaatu a ka moo tilindiŋolu la siloolu kanta le, aduŋ a ka tankandiri ke a la tooñaa moolu la.

⁹Wo to i be sila betoolu loŋ na le, mennu tilinta, ì soobeeyaata, aniŋ ì foroyaata.

¹⁰Kaatu ñaameŋo be duŋ na i sondomoo kono le, aduŋ londoo be diyaa la i ye le.

¹¹Kekuu loŋo le be i tankandi la, fahaamuroo fanaa be i kanta la le.

¹²Ñaameŋo le be i tankandi la moo kuruŋolu la siloolu ma, ka bo moolu bulu mennu la kumoo buka ke tooñaa ti,

¹³mennu ka i koo dii sila tilindiŋolu la, ka tara diboo le kono,

¹⁴kuu jawu kewo ka mennu kontaani, aniŋ mennu ka seewoo, niŋ kuu kuruŋo be keriŋ,

¹⁵mennu la siloolu be jenkeriŋ, aniŋ mennu buka sila kende taama.

¹⁶A be i tankandi la musu jeenelaa ma le, aniŋ musu tulunnaa, meŋ na kumoo ka neeneeroo ke.

¹⁷A ye a fansuŋ kee bula jee le, a ye a ñaa kaasi ì la futuu kambeŋo la, a ye meŋ ke Alla ñaatiliŋo la.

¹⁸Kaatu a la buŋo mu saayaa dinkiraa le ti, a la siloolu ka moo samba fureeduu.

¹⁹Moolu mennu ka taa a yaa, buka muruŋ kotenke ka baluu.

²⁰Wo kamma la, taama niŋ moo kendoolu la siloo la, aduŋ i ye bula moo tilindiŋolu nooma.

²¹Kaatu moo tilindiŋolu be sabati la laahidi bankoo kaŋ ne, mennu maŋ sootaari soto fanaa si tara jee.

²²Bari moo kuruŋolu be wafati la le ka bo ñiŋ bankoo kaŋ, aduŋ ì be tilimbaloolu fintindi la jee le.