Read Mandinka Kuma Kotoomaalu 20 Bible Online

Kuma Kotoomaalu 20 - Mandinka bible

Kuma Kotoomaalu 20

¹Doloo ka i bula ñaawalitoo kuu kewo le la, a ka moo dundi keloo le kono, a ye moo-wo-moo filindi, i maŋ ñaameŋ.

²Mansa la kamfaa ka munta le ko, niŋ jatoo be bumbuŋ kaŋ, niŋ meŋ ka a kamfandi, i ka i niyo le waafi.

³I ka ke buuñaa moo ti le, niŋ i ye i ñaa kaasi fitina kuwo la, bari i ye toolee-wo-toolee je, a ka tariyaa sonka wulindoo la le.

⁴Moo naafariŋo meŋ buka senoo ke a waatoo la, niŋ katiri waatoo siita, a buka feŋ soto a be meŋ kati la.

⁵Hadamadiŋo la miiroo ka jamfa le ko koloŋ diinondiŋo jiyo, moo meŋ ye fahaamuroo soto kendeke, wo le si a bondi noo.

⁶Moo jamaa ka i faŋ ke moolu ye moo tilindiŋo le ti, bari jumaa le si moo tilindiŋo loŋ noo?

⁷Moo tilindiŋo la baluwo kono, sootaari buka tara jee, neemoo be a diŋolu ye, mennu be seyi la a noo to.

⁸Mansa meŋ be siiriŋ a la mansasiiraŋo kaŋ ka kiitiyo kuntu, ka kuu jawoo bee bondi ñoo to le.

⁹Moo-wo-moo te ñiŋ fo la noo ko, “N ŋaniyoo seneyaata le, m maŋ junube soto.”

¹⁰Peesari kuruŋo niŋ sumandiri tilimbaloo muumee bee mu Yaawe* tanoo le ti.

¹¹Hani dindiŋolu faŋo maañaa ka a tinna le, moolu ye ì daajikoo loŋ, fo ì ye kuu kendoo niŋ kuu tilindiŋo le ke.

¹²Tuloo meŋ ka moyiroo ke aniŋ ñaa meŋ ka jeroo ke, Yaawe le ye ì bee daa.

¹³Niŋ siinoo diyaata i ye baake, a be i la fuwaareyaa lafaakuu la le, bari niŋ i maamanta, i be domoroo soto la le, i be meŋ domo la.

¹⁴Sandirilaa ka a fo le ko, “A daa maŋ beteyaa, a maŋ kaati.” Bari niŋ a dammaa fereta, a ka kontaani a kuwo la le.

¹⁵Sanoo siyaata, luuluwo buka yaatee noo, bari londitiyo sotoo maŋ feeyaa.

¹⁶I si moo la dendikoo taa, niŋ a ye luntaŋo sankayaa i yaa, aduŋ kana soŋ ka a la dendikoo seyi a ma, kaatu a ye tumarankewo le sankayaa.

¹⁷Feŋo meŋ sotota suuñaaroo kono, ka diyaa le, bari a koolaa, a maarii daa ka tara faariŋ bankoo le la.

¹⁸Yaamaroo ñini janniŋ i ka feeroo siti, niŋ i lafita keloo wulindi la, bula yaamaroo nooma.

¹⁹Koomakumarilaa ka jikoo bo moo koto le, wo to i niŋ diyaamulaa baa kana kuu kafu.

²⁰Niŋ i ye i baa niŋ i faa neŋ, i la lampoo be dubeŋ na le.

²¹Ka ke naafulutiyo ti tariyaa kono, a labaŋo buka barakoo soto.

²²Niŋ moo ye kuu jawoo ke i la, kana a fo ko, “M be n joo la le.” I si i batu Yaawe ye, ate le be ke la i ye julujoolaa ti.

²³Peesaroo meŋ maŋ tiliŋ mu Yaawe tanoo le ti, aduŋ sumandiri tilimbaloo maŋ beteyaa.

²⁴Hadamadiŋo taañaa bee be Yaawe le bulu, ate be a faŋo kalaŋo loŋ noo la ñaadii le?

²⁵Moo maŋ ñaŋ na ñaamootoo tawoo taa la Yaawe ye, a taariŋ koolaa, a ye naa nimisa.

²⁶Mansa ñaamendiŋo ka moo jawoolu keseŋ ne, a ye naa mantoora kuwo laa ì kaŋ.

²⁷Yaawe ye niyo meŋ duŋ hadamadiŋo kono, wo ka munta le ko lampoo, kuu-wo-kuu be a kono, a ka a bee loŋ ne.

²⁸Tiliŋo niŋ tooñaa le ka mansa tankandi, aduŋ tiliŋo le ka a la mansayaa bambandi.

²⁹Fondinkewolu ka kufaŋ ì semboo le la, bari keebaa kotoolu la feŋ ñiimaa ka ke ì kuntiña koyoo le ti.

³⁰Junkuroo meŋ ka moo barama, a si kuu jawoo bayi noo le, liparoo fanaa si moo kuluu noo le kendeke.