Read Mandinka Kuma Kotoomaalu 21 Bible Online

Kuma Kotoomaalu 21 - Mandinka bible

Kuma Kotoomaalu 21

¹Mansa sondomoo la kuwo be Yaawe* le bulu, a ka a taamandi le ko jiiboroo, daa-wo-daa diyaata a ye, a ka a tilindi jee le to.

²Hadamadiŋo maañaa ka muluŋ a fee le ko a tilinta le, bari Yaawe le ka sondomoo kisikisi.

³Ka kuu tilindiŋo ke aniŋ ka luwaa muta, Yaawe sonta wo le la, ka tambi beeyaŋ sadaa* ti.

⁴Faŋ wara mooyaa aniŋ sisi wulindoo mu moo jawoolu le taa ti, ka ke ì ye junuboo ti.

⁵Moo saayiriŋo la feeroolu ka naa ke nafaa le ti, bari kuwo meŋ korontotoo keta, wo ka labaŋ fuwaareyaa le la.

⁶Ka faniyaa fo, fo i ye ke naafulutiyo ti, a naafuloo be muluŋ na le ko yeemaŋ feŋo niŋ saayaa kutindiŋo.

⁷Moo jawoolu la fitinoo le be ì kasaara la, kaatu ì balanta le ka kuu tilindiŋo ke.

⁸Moo kuruŋo la siloo mu sila jenkeriŋo le ti, bari moo meŋ maŋ feŋ ke tilinta le.

⁹Ka tara sabatiriŋ buŋo jimbaŋo to, wo le fisiyaata i niŋ musu fitinalaa ye tara buŋ kiliŋ.

¹⁰Moo kuruŋo ŋaniyoo ka ke kuu jawoo doroŋ ne ti, a buka balafaa soto hani a siiñoo ye.

¹¹Niŋ ì ye ñaawalilaa mantoora, moo sooneeyaariŋ baa ka ñaameŋ ne, aduŋ moo ñaamendiŋo ka a la londoo lafaa le, niŋ ì ye a yaamari.

¹²Alla meŋ tilinta, a ka a hakiloo tu moo kuruŋolu la kuwo to le, aduŋ a ka naa ì kasaara le.

¹³Niŋ moo ye a tuloo kaasi fuwaaroo woosii kaŋo la, a fanaa be woosii la le, aduŋ moo te a danku la.

¹⁴Soorifeŋo i ye meŋ dii kulloo kono, ka kamfaa bayi le, aduŋ i ye dukoo meŋ dii suturoo kono, ka jusoo sumayandi le.

¹⁵Niŋ tiliŋo taamata, a ka seewoo le naati moo tilindiŋolu ye, bari a ka ke kijaboo kuwo le ti moo kuruŋolu ye.

¹⁶Moo meŋ ye a koo dii fahaamuroo siloo la, a be kafu la furewolu ma kaburoo kono le.

¹⁷Moo-wo-moo lafita niidiyaa kuu kewo la, a be fuwaareyaa la le, moo-wo-moo lafita domori diimaa niŋ miŋo la, wo te fankamaayaa la muumeeke.

¹⁸Ì ka moo kuruŋo toorandi le, fo moo kendoo si tanka, tilimbaloolu fanaa ka ke tilindiŋo ye wo le ñaama.

¹⁹I ye sabati keñewuloo* kono, wo le fisiyaata, i niŋ musu fitinalaa meŋ jusoo sutiyaata, ye sabati ñoo kaŋ.

²⁰Moo ñaamendiŋo ka a la naafuloo muta kuu le, bari toolewo, wo ka a taa bee kasaara le kataba kiliŋ.

²¹Moo-wo-moo ka bula tiliŋo nooma aniŋ beteyaa, a be siimaayaa la le, aduŋ a be horomoo soto la le.

²²Moo ñaamendiŋo ka jarintewolu la saatewo boyinkaŋ ne, aduŋ ì be jikiriŋ ì la tatoo meŋ na, a ka a janjaŋ ne.

²³Moo meŋ ka a fokumoo loŋ, a ka a neŋo mara, a ka a faŋo tanka maasiiba kuwo ma le.

²⁴Moo meŋ faratita aniŋ meŋ ka a faŋ wara, ñaawalilaa le mu a too ti, a ka kuu landatambiriŋolu le ke.

²⁵Katakolentewo la hadumoo le be a faa la, kaatu a buka soŋ dookuwo la.

²⁶Tiloo muumewo a ka lafi le ka jamaa soto, bari moo tilindiŋo buloo buka jaa.

²⁷Moo kuruŋo la beeyaŋ sadaa* konta le, sako niŋ a maŋ a bondi niŋ ŋaniya senuŋo la.

²⁸Seedenduroo be kasaara la le, bari lamoyilaa kendoo le ka tooñaa fo.

²⁹Moo kuruŋo ka a faŋ fatiyandi le, bari moo tilindiŋo ka i miira le, janniŋ a ka kuu ke.

³⁰Ñaameŋ te jee, fahaamuru te jee, aduŋ feere te jee meŋ si taamandi noo Yaawe kaŋ.

³¹Suwoo ka tara pareeriŋ ne kele luŋo, bari kañeeroo be Yaawe le bulu.