Read Mandinka Kuma Kotoomaalu 22 Bible Online

Kuma Kotoomaalu 22 - Mandinka bible

Kuma Kotoomaalu 22

¹Too diyaa le fisiyaata ka ke naafulutiyo ti, ka ke buuñaa moo ti, le fisiyaata kodiforoo niŋ sanoo ti.

²Fankamaa niŋ fuwaaroo denta ñiŋ kuwo la le, Yaawe* ì Daamansoo le ye ì bee daa.

³Hakilimaa ka kuu koyibaloo je le a ye tankoo ñini, bari moo sooneeyaariŋ baa ka duŋ a kono le, a ye naa bataa.

⁴Fammajiyo aniŋ Yaawe ñaasilaŋo le ka naafuloo, horomoo aniŋ baluwo naati moo ye.

⁵Moo jenkeriŋo la siloo kaŋ, ŋaniŋolu niŋ kutindiŋolu le be laariŋ jee, bari moo meŋ ye a kekuwolu loŋ, wo ka jamfa ì la le.

⁶Dindiŋo kuluu sila kendoo la, i si a je niŋ a keebaayaata, a te jenke la.

⁷Fankamaa ka fuwaaroo mara le, aduŋ dontorilaa ka ke a diilaa ye joŋo le ti.

⁸Moo-wo-moo ka tilimbaliyaa turoo fii, kooroo le be faliŋ na a ye, aduŋ tilimbaliyaa busoo si kati.

⁹Moo bulu feemaa be neemoo soto la le, bayiri a niŋ fuwaaroo le ka a la domoroo talaa.

¹⁰Niŋ i ye ñaawalilaa bayi, ñoosaboo ka taa le, sonkoolu niŋ nendiroolu ka daŋ wo le ñaama.

¹¹Moo meŋ ŋaniyoo seneyaata, aniŋ meŋ ka a diyaamuñaa loŋ, mansa le be ke la a teeroo ti.

¹²Yaawe ka a je le ko tooñaa ye loŋ, bari a ka tilimbaloolu la kumoolu ke ì ye kuma kenseŋo le ti.

¹³Katakolentewo ka a fo le ko, “Jatoo le be banta! A be m faa la mbeedoolu kono le.”

¹⁴Musu jeenelaa daa mu dinka baa le ti, Yaawe be kamfaariŋ moo-wo-moo kamma, wo le be duŋ na jee.

¹⁵Dindiŋo dalita le ka a faŋo ke toolewo ti, bari niŋ i ye busoo tiliŋ a la, wo ka a jamfandi a la le.

¹⁶Moo-wo-moo ka fuwaaroo mantoora, ka a la naafuloo buyindi, aniŋ meŋ ka soorifeŋo dii fankamaalu la, bee be labaŋ na fuwaareyaa le la.

¹⁷I tuloo loo, i ye i lamoyi moo ñaamendiŋolu la kumoolu la. N ka meŋ karandi i si a tu i sondomoo kono,

¹⁸kaatu a be ke la kuu kende baa le ti, niŋ i ye ì tu i sondomoo kono, fo i hakiloo si bula ì la, niŋ i be diyaamoo la.

¹⁹Fo i jikoo si tara looriŋ Yaawe kaŋ, ŋa ite faŋo le kalamutandi ñiŋ na bii.

²⁰Fo m maŋ kuma kotoomaa taŋ saba le safee i ye, yaamaroo niŋ londoo kumoolu,

²¹ka i karandi tooñaa niŋ kuma kendoolu la, fo i si jaabiri kendoo murundi moolu kaŋ, mennu ye i kii?

²²Kana fuwaaroolu tiñaa, bayiri ì maŋ feŋ soto, aduŋ kana boyi moolu kaŋ mennu suulata maakoyiroo la, niŋ ì be kiitiyo kono,

²³kaatu Yaawe le be loo la ì ye, aduŋ moo-wo-moo ye ì la feŋolu taa, a be i niyo taa la le.

²⁴I niŋ moo jusu sutuŋo kana teeriyaa ke, aduŋ moo meŋ na kamfaa tariyaata, i niŋ a kana kuu kafu,

²⁵niŋ wo nte i be bula la a la kuwolu nooma le, a la kataa ye miniŋ i la.

²⁶Kana ke moo ti meŋ ka moolu sankayaa, waraŋ ka moolu tankandi juloo la kuwo to.

²⁷Niŋ i maŋ feŋ soto ka a joo, i be laariŋ laaraŋo meŋ kaŋ, ì be wo le wafu la i koto.

²⁸I la alifaa foloolu ye naaneekuŋo meŋ laa, kana a bondi a noo to.

²⁹Fo i maŋ moo je meŋ buloo koyita a la dookuwo to? A be dookuwo ke la mansoolu le ye, bari a te ke la moo koteŋ kenseŋolu ti.