Read Mandinka Kuma Kotoomaalu 23 Bible Online

Kuma Kotoomaalu 23 - Mandinka bible

Kuma Kotoomaalu 23

¹Niŋ i niŋ maralilaa be siiriŋ domoroo la, koroosiri ke feŋo la, meŋ be i ñaatiliŋo la,

²i si i domoriñaa loŋ fanaa, hani a ye a tara i be hameriŋ a la.

³Kana i hakiloo loo a la domori diimaa kaŋ, kaatu a la domoroo si moo mantoora noo le.

⁴Kana i faŋo dookundi kendeke, fo i si naafuloo soto, i ñanta ñaameŋo soto la a taamandiñaa to le.

⁵Jee niŋ jee naafuloo si naa, a ye taa kataba kiliŋ, a ka munta le ko a ye dampaŋolu le soto, a ye tii saŋo santo ko seeliŋo.

⁶Kana moo ŋaniya jawoo la domoroo domo, waraŋ ka i hakiloo loo a la domori diimaa kaŋ,

⁷kaatu ate mu moo le ti, meŋ ka tu la i miira la maafesoŋo la. A ka a fo i ye le ko, “Domoroo ke, i ye i miŋ,” bari a buka i ŋaniya a la.

⁸I ye domandiŋo meŋ domo, i be a foonoo la le, aduŋ i be i daakuma diimaa fayi la le.

⁹Kana i faŋo batandi ka ñaameŋ kumoolu fo toolewo ye, kaatu a te a muta la feŋ ti.

¹⁰I la alifaa foloolu ye naaneekuŋo meŋ laa, kana a bondi a noo to, waraŋ ka aliyatiimoolu la kunku kenoo doo taa ì bulu,

¹¹kaatu Alla le mu ì tankandirilaa bambandiŋo ti, ate le be kiitiyo ke la ì ye.

¹²I hakiloo tu yaamaroo to, aduŋ i ye i tuloo loo londoo la kuwo to.

¹³Kana balaŋ ka i diŋo kuluu, niŋ i ye a kuluu busoo la, a te faa la.

¹⁴A kuluu busoo la, fo i si a niyo tankandi saayaa ma.

¹⁵N diŋo, niŋ i ye ñaameŋo soto i sondomoo kono, m fanaa be kontaani la le,

¹⁶a be diyaa la n ye baake le, niŋ i daa ka tooñaa kumoo fo.

¹⁷Kana sondome kiiliyaa samba junubelaalu la kuwo to, bari waati-wo-waati, Alla ñaasilaŋo si ke i hame kuwo ti.

¹⁸Tooñaa-tooñaa saama nafaa be tara la i ye le, aduŋ i la jikoo te bo la i koto.

¹⁹N diŋo, i lamoyi, i ye ñaameŋ, aduŋ i ye tara sila tilindiŋo kaŋ.

²⁰Kana kafu moolu ma, mennu ka doloo miŋ baake, waraŋ ka habuhabu suboo kaŋ,

²¹kaatu siiratoo niŋ moo haburiŋ baa be naa fuwaareyaa la le, aduŋ katakolenteeyaa le ka a tinna, ì ye feŋ funtoolu duŋ.

²²I lamoyi i wuluu faa la meŋ ye i balundi, aduŋ i kana jutu i wuluu baa la, niŋ a kotoota.

²³Hame tooñaa la, aduŋ i kana soŋ a ye bo i bulu, i si ñaameŋo, kuluuroo aniŋ fahaamuroo ñini.

²⁴Moo tilindiŋo faamaa ka kontaani kuu baa le soto, moo meŋ ye diŋ ñaamendiŋo soto, ka seewoo a la kuwo to le.

²⁵Allamaa i faamaa niŋ i baamaa ye kontaanoo soto. Allamaa i baamaa meŋ ye i wuluu, ye seewoo.

²⁶N diŋo, i hakiloo tu n na kumoo to, aduŋ i si bula n na misaaloo nooma,

²⁷kaatu cakoo ka munta le ko dinka baa, aduŋ musu jeenelaa mu koloŋ dinkariŋo le ti.

²⁸A ka tara denderiŋ ne komeŋ ñapinkannaa, aduŋ a ka moo tilimbaloolu siyandi le.

²⁹Jumaa le ye kooroo kuwo soto? Jumaa le ye niikuyaa kuwo soto? Jumaa le ye sonkoo naati moolu ye? Jumaa le ye dewuŋ kuwo soto? Jumaa le ye a faŋo barama kensenke? Jumaa le ñaa be wuleeriŋ?

³⁰Wo le mu moolu ti, mennu lafita dolo miŋo la baake, aniŋ mennu ka dolo siifaa jamaa miŋ.

³¹Kana soŋ, doloo ye i marisa, hani a be wuleeriŋ ne tawu, aniŋ a ka fuusa mindaŋo kono, a kunuŋo ka diyaa.

³²Labaŋo la, a ka kindiroo ke le komeŋ daŋaroo, aduŋ a ka kunoo soto le komeŋ biidaa.

³³Ì ñaa be kuu manee je la le, aduŋ ì sondomoo be tara la piwuriŋ ne.

³⁴A be muluŋ na ì fee le ko, niŋ i be laariŋ kuluŋo le kono baa teema, a be sawuŋ-sawuŋ na ko, meŋ pareeta ka kupi.

³⁵Ì be a fo la le ko, “Ì ye m fadi le, bari m maŋ barama! Ì ye n lipa le, bari a maŋ duŋ n na! Muŋ tuma le n ñaa be yele la, fo n si taa doloo doo ñini?”