Read Mandinka Kuma Kotoomaalu 24 Bible Online

Kuma Kotoomaalu 24 - Mandinka bible

Kuma Kotoomaalu 24

¹Kana i ñaa loo moo jawoolu kaŋ, aduŋ i kana hame i niŋ ì ye kuu kafu,

²kaatu ì hakiloo ka tara fitina kuwo le kaŋ, aduŋ ì ka tu kuruŋyaa diyaamoo le la.

³Buŋo ka loo ñaameŋo le la, ka bo niŋ fahaamuroo la, a ka bambaŋ,

⁴ka bo niŋ londoo la, a bunkonoolu ka faa niŋ feŋ kummaalu niŋ feŋ ñiimaalu la.

⁵Moo ñaamendiŋo ye sembe baa le soto, aduŋ londitiyo semboo ka lafaa le.

⁶Niŋ i lafita keloo wulindi la, fo i si yaamaroo soto, aduŋ niŋ i lafita ka ke noorilaa ti, fo i ye yaamarilaa jamaa soto.

⁷Ñaameŋo la kuwo warabaata toolewo ye le, saatee beŋo to, a buka feŋ soto, a be meŋ fo la.

⁸Moo-wo-moo lafita kuu jawoo feeretoo ke la, ì be a kumandi la naafikoo le la.

⁹Toolewo ka i miira kuu-wo-kuu la, a bee mu junube kuwo le ti. Moolu ka moo koŋ ne, meŋ mu ñaawalilaa ti.

¹⁰Niŋ i buka loo noo koleyaa waatoo kono, wo to i semboo dooyaata le.

¹¹Moolu tankandi, mennu be saayaa siloo kaŋ, moolu maakoyi, ì ka mennu kuruntu ka taa ì faa.

¹²Bari niŋ i ko, “Hee, ntolu maŋ ñiŋ loŋ!” Fo meŋ ka sondomoo la kuwo kisikisi, maŋ i la kuwo loŋ baŋ? Fo ate meŋ ka i la baluwo kanta, maŋ a loŋ baŋ? Fo a te moo-wo-moo joo la a la baaroo la?

¹³N diŋo, liyo miŋ, kaatu a beteyaata le, liyo meŋ bota kaañoo bala, be diyaa la i ye le.

¹⁴A loŋ fanaa ko, ñaameŋo be i fee wo le ñaama, niŋ i ye a soto, ñaato siniŋ jiki be tara la i ye le, aduŋ i la jikoo te bo la i koto.

¹⁵Kana dende ka suuñaaroo ke moo tilindiŋo yaa, waraŋ ka taa a sabatidulaa boyinkaŋ.

¹⁶Hani niŋ moo tilindiŋo boyita ko siiñaa woorowula, a be wuli la le kotenke, bari moo jawoo, maasiiba kuwo le ka wo kasaara.

¹⁷I kana seewoo, niŋ i jawoo la kuwo tiñaata, aduŋ i kana jusulaa, niŋ a takita,

¹⁸kaatu niŋ i seewoota, a te diyaa la Yaawe* ye, aduŋ a te tenteŋ na, ka i jawoo mantoora.

¹⁹Moo jawoolu kana i bondi i noo to, waraŋ ka i ñaa loo moo jawoolu kaŋ,

²⁰kaatu ñaato siniŋ moo jawoo maŋ jiki soto, aduŋ a la lampoo be dubeŋ na le.

²¹N diŋo, sila Yaawe la, i ye mansa buuñaa, i niŋ moolu kana haaji soto, mennu ka balaŋo tiliŋ ì ma.

²²Ñiŋ moo siifaalu si kasaara noo le kataba kiliŋ, fo i ye a loŋ ne baŋ, Alla waraŋ mansa si maasiiba kuwo meŋ naati noo?

²³Ñinnu fanaa mu moo ñaamendiŋolu la kuma kotoomaalu le ti: Ka faasaaroo ke, niŋ i be kiitiyo kuntu la, maŋ beteyaa.

²⁴Moo-wo-moo ko moo boyiriŋo ye ko, a maŋ feŋ ke, moolu be a danka la le, bankoolu ye a haraamu.

²⁵Bari a be beteyaa la kiitiikuntulaa fee le, niŋ a ye moo boyiriŋo tuumi, aduŋ neema jamaa le be naa la a kaŋ.

²⁶Niŋ i ye moo jaabi tooñaa kumoo la, a ka munta le ko sumburoo.

²⁷Dookuwo ke foloo, niŋ i buloo ye i koo beŋ, i si naa i la buŋo loo.

²⁸Kana i siiñoo seedeyaa, daliila te a la, waraŋ ka i neŋ kolomoo ke neeneerilaŋo ti.

²⁹Kana a fo ko, moolu ye meŋ ke i la, i fanaa be wo le ke la ì la. Ì ye i julu duŋ meŋ na, i be ì joo la wo le la.

³⁰N tambita niŋ moo naafariŋo la kunkoo la le, n tambita niŋ moo doo la wayini* yiri kankaŋo kono la, meŋ mu hakilintaŋo ti,

³¹a juubee, a bee be faariŋ ŋaniŋ suŋo le la, coŋo be faariŋ a bankoo kaŋ, aduŋ a biriki sansaŋo boyita.

³²Bituŋ ŋa a kuwo koroosi, ŋa a miira, aduŋ n naata yaamaroo soto le:

³³Ka siinoo domandiŋ, aniŋ ka jinkoo domandiŋ, ka i buloo laa ñoo kaŋ domandiŋ, ka i foñondiŋ,

³⁴fuwaareyaa be naa i kaŋ ne komeŋ ñapinkannaa, fentaŋyaa, komeŋ boyinkannaa.