Read Mandinka Kuma Kotoomaalu 25 Bible Online

Kuma Kotoomaalu 25 - Mandinka bible

Kuma Kotoomaalu 25

¹Ñinnu mu Sulemani la kuma kotoomaa doolu le ti, Yahuuda mansa Hesekiya la dookuulaalu le ye ì safee:

²Alla la kallankeeyaa*, wo le mu ka kulloo maabo. Mansa la horomoo, wo le mu ka kuwo kisikisi.

³Ko saŋ fatoolu be jamfariŋ ñaameŋ, aniŋ bankoo be dinkariŋ ñaameŋ, kuwo meŋ be mansoolu sondomoo kono, buka loŋ noo wo le ñaama.

⁴Newo meŋ niŋ kodoo ñaamita bondi, kodiforo numoo si kodiforo piiroo soto.

⁵Moo kuruŋo bondi mansa ñaatiliŋo la wo ñaama, a la mansasiiraŋo ye bambaŋ niŋ tiliŋo la.

⁶Kana i faŋo sikandi mansa ñaatiliŋo la, aduŋ i kana siidulaa kaniŋ moo kummaalu be daameŋ.

⁷Ñiŋ ne be fisiyaa la, niŋ a ko i ye ko, “Naa jaŋ,” janniŋ a ka i malundi moo kummaalu ñaatiliŋo la. I ye kuwo meŋ je i ñaa la,

⁸kana tariyaa ka a ke kiitiyo ti, labaŋo la, i be ke la ñaadii le, niŋ i siiñoo ye i malundi?

⁹Niŋ i niŋ i siiñoo ye ñoo saba i la kuwo la, kana moo doo la kulloo waañaari, meŋ laata i la.

¹⁰Niŋ moo ye a moyi, a be i ñaawali la le, aduŋ horomantaŋyaa te bo la i la karoo la muumeeke.

¹¹Niŋ i la kumoo laakuuta, a ka muluŋ ne ko, niŋ ì ye sanoo laakuu kodiforoo bala ka a ñiiñandi.

¹²Komeŋ sani tulutotaa waraŋ saniforo ñaroo, wo le mu moo ñaamendiŋo la jalayiroo ti, a lamoyilaa ye.

¹³Komeŋ jii sumaa ka diyaa ñaameŋ, niŋ tiloo be kandiriŋ, kiilaa soobeeyaariŋo la kuwo ka diyaa moo ye wo le ñaama, meŋ ye a kii.

¹⁴Komeŋ tawaloo niŋ foñoo mennu maŋ samaa naati, wo mu moo le ti, meŋ ka kibiri soorifeŋo la, a nene te meŋ dii la.

¹⁵Ka bo niŋ muñoo la, moo si maralilaa neenee noo, aduŋ kuma diimaa si moo binoo kati noo le.

¹⁶Niŋ i ye liyo soto, i si a domoo kaañaŋ, niŋ i ye a landatambi domo, i be foonoo la le.

¹⁷I siŋo kana siyaa i siiñoo la buŋo kono, niŋ i ka taa jee baake, a be i koŋ na le.

¹⁸Komeŋ doko kuliŋo, hawusaroo*, waraŋ kalabeñe daa melundiŋo, wo le mu moo ti, meŋ ka seedenduriyaa ke a siiñoo la kuwo to.

¹⁹Komeŋ ñiŋ kaatibaloo waraŋ siŋ lanjuururiŋo, wo le mu teeri tilimbaloo ti, i be i jikoo loo la meŋ kaŋ bataa waatoo.

²⁰Ka i la dendikoo bondi, niŋ nenoo be keriŋ luŋo meŋ na, waraŋ ka bineekaroo* boŋ baramoo kaŋ, a ka ke wo le ñaama, niŋ i ye denkiloo laa moo ye, meŋ niyo be toorariŋ.

²¹Niŋ konkoo be i jawoo la, domoroo dii a la, a ye a domo, niŋ mindoo ye a muta, jiyo dii a la, a ye i miŋ.

²²Niŋ i ka ñiŋ ke, a be muluŋ na le ko, niŋ i ye dimbaa keñemboo le juruma a kuŋo kaŋ, aduŋ Yaawe* be i joo la le.

²³Ko foñoo ka samaajiyo naati ñaameŋ samaa kono, koomakumaroo ka kamfaa wulindi wo le ñaama.

²⁴I ye tara sabatiriŋ i la buŋo jimbaŋo to, wo le fisiyaata i niŋ musu fitinalaa ye tara buŋ kiliŋ.

²⁵Ko jii sumaa ka diyaa moo ye ñaameŋ, niŋ mindoo be a la, jamfa jaŋ kibaari diimaa ka ke wo le ñaama.

²⁶Komeŋ woyoo meŋ ye potoo soto, waraŋ koloŋo meŋ be nooriŋ, wo le mu moo tilindiŋo ti, meŋ ka siloo dii moo jawoo la.

²⁷A maŋ beteyaa ka lii jamaa domo, waraŋ ka tu buuñaa ñini la i faŋo ye.

²⁸Komeŋ ì ye saatewo meŋ sansaŋolu boyi, wo le mu moo ti, meŋ buka a faŋo muta noo.