Read Mandinka Kuma Kotoomaalu 26 Bible Online

Kuma Kotoomaalu 26 - Mandinka bible

Kuma Kotoomaalu 26

¹Niŋ saŋ beroo si boyi tili kandoo kono, waraŋ samaa ye naa katiri waatoo kono, toolewo si jari ka buuñaa soto.

²Komeŋ jaataliŋo buka sabati ñaameŋ, waraŋ naanaa ka yaayoo santo ñaameŋ, dankoo te moo muta noo la wo le ñaama, meŋ maŋ danka kuwo ke.

³Catoo suwoo ye, karafewo faloo ye, dokoo toolewo koo diisoo ye.

⁴Kana toolewo jaabi niŋ tooleeyaa kumoo la, fo i faŋo ye naa ke ko a be ñaameŋ.

⁵Toolewo jaabi a la tooleeyaa kumoo la, niŋ wo nte a be a miira la le ko, a ñaamenta le.

⁶Ka toolewo bula, a ye taa i ye kiilaariyaa la wo ka munta le ko, niŋ moo ye a siŋo kuntu, waraŋ ka fitinoo maamandi.

⁷Komeŋ lanjuurutoo siŋo ka tara faariŋ ñaameŋ, kuma kotoomaa ka tara toolewo daa kono wo le ñaama.

⁸Ka toolewo horoma ka munta le ko, niŋ i ye beroo siti kampuraŋo bala.

⁹Komeŋ ŋaniŋ dokoo ka tara siiratoo buloo kono ñaameŋ, kuma kotoomaa ka ke toolewo daa to wo le ñaama.

¹⁰Moo meŋ ka toolewo luwaasi, waraŋ tambilaa, a ka munta le ko kalabeñe fayilaa meŋ ka moo jamaa barama.

¹¹Wuloo ka a la foonoo seyinkaŋ domo ñaameŋ, toolewo ka a la tooleeyaa maañaa seyinkaŋ wo le ñaama.

¹²Fo i ye moo je le, meŋ ye a miira ko, a ñaamenta le? Jiki jamaa be tara la toolewo le ye, bari ate nte.

¹³Katakolentewo ka a fo le ko, “Jatoo le be siloo kaŋ, jata saŋarariŋo le ka yaayi mbeedoolu kaŋ!”

¹⁴Ko bundaa ka muruŋ-muruŋ koncoo bala ñaameŋ, katakolentewo ka yelemaŋ-yelemaŋ a la laaraŋo kaŋ wo le ñaama.

¹⁵Katakolentewo ka a buloo ñuuka domoroo kono le, a ye naa ŋooma ka domoroo ke a daa kono.

¹⁶Katakolentewo ka ñaameŋ a faŋo fee le, ka tambi moo woorowula la, mennu si jaabiroo ke noo a ñaama.

¹⁷Ko moo meŋ ye wuloo muta a tuloo to ka a saba, tambilaa be wo le ñaama, meŋ ka a daa bula sonkoo to, meŋ maŋ ke a taa ti.

¹⁸Ko niŋ ñaamaatoo be taalamaa kuntoo, waraŋ moofaaraŋ kalabeñoo fayi kaŋ,

¹⁹wo le mu moo ti, meŋ ka a siiñoo tapaleeyaa, a ka a fo ko, “M be sanaaroo le la.”

²⁰Niŋ loo maŋ soto, dimbaa ka faa le, niŋ koomakumaroo maŋ ke, sonkoo ka baŋ ne.

²¹Ko kemboo ka dimbaa keñemboo kendi ñaameŋ, loo fanaa ka dimbaa kendi ñaameŋ, kewo meŋ lafita fitinoo la, ka ke wo le ñaama.

²²Koomakumaroo ka munta le ko domori diimaa, a ka diyaa moo daa kono le.

²³Daandiŋo meŋ muurita kodiforoo la, wo mu moo le ti, meŋ ka kuma diimaa fo, a maŋ futa a kono.

²⁴Moo jawoo ka a faŋo la jawuyaa maabo niŋ a daakumoo le la, bari neeneeroo le ka tara a sondomoo kono.

²⁵Hani a la diyaamoo diyaata, kana laa a la, a sondomoo be faariŋ kuu kondiŋolu le la.

²⁶A si a la jawuyaa maabo noo le fo waati, bari labaŋo la, moo bee le ka a la jawuyaa loŋ.

²⁷Niŋ moo ye dinkoo siŋ a mooñoo kamma, a faŋo le be bula la a kono. Niŋ moo ye beroo birimintiŋ, a be muruŋ na a faŋo le kaŋ.

²⁸Faniyaa folaa ka moolu koŋ ne, a ye mennu dimindi niŋ a la faniyaa kumoo la, aduŋ yootiroo ka tiñaaroo le saabu.