Read Mandinka Kuma Kotoomaalu 27 Bible Online

Kuma Kotoomaalu 27 - Mandinka bible

Kuma Kotoomaalu 27

¹Kana kibiri saama kamma, kaatu i maŋ a loŋ, saama niŋ meŋ be naa.

²Moo doo le ñanta i tentu la, bari a maŋ ñaŋ na bo la i faŋo daa, moo koteŋ ñanta a ke la, bari a maŋ ñaŋ na ke la i faŋo ti.

³Beroo kuliyaata, bankoo mu dunoo ti, bari niŋ toolewo ye i ñaawali, wo le kuliyaata ñiŋ fuloo ti.

⁴Kamfaa jawuyaata le, jusuboo ka kasaaroo le ke, bari jumaa le niŋ kiiliyaa si tu noo?

⁵Niŋ i ye tooñaa fo moo ye, wo le fisiyaata kanoo ti meŋ be maaboriŋ.

⁶Niŋ i teeroo ye kuu dimindiŋolu ke i la, i si a muña noo, bari niŋ i jawoo ye i sumbu, i si i hakilitu.

⁷Niŋ moo ye domoroo ke fo a konoo faata, liyo buka diyaa a ye, bari moo konkoriŋo, hani domoroo kuniyaata, a ka diyaa a daa le.

⁸Komeŋ kunoo, meŋ caarita a la ñaŋo to, wo le mu kewo ti, meŋ wudaayita a la suwo kono.

⁹Karabaanijiyo niŋ cuuraayoo ka niyo seewondi le, teeriyaa fanaa diyaa mu ñoo yaamaroo le ti.

¹⁰Kana i koo dii i teeroo la, aniŋ i faamaa teeroo, aduŋ i kana taa i kotoo la buŋo to, niŋ kooroo boyita i kaŋ. I siiñoo meŋ be i daala, wo le si i maakoyi noo tariyaake, ka tambi i kotoo la meŋ be jamfariŋ.

¹¹N diŋo, ñaameŋ, fo i si seewoo dundi n sondomoo kono, wo to le n si moo-wo-moo jaabi noo, meŋ lafita ka kuma fo m ma.

¹²Hakilimaa ka kuu koyibaloo je le, a ye tankoo ñini, bari moo sooneeyaariŋ baa ka duŋ a kono le, a ye bataa.

¹³Moo la dendikoo taa, niŋ a ye luntaŋo sankayaa i yaa, aduŋ kana soŋ ka a la dendikoo seyi a ma, niŋ a ye a ke musu jeenelaa ye.

¹⁴Niŋ moo wulita soomandaa juunoo, a be sari la, a ko a ka a siiñoo le kontoŋ, a siiñoo si a fo noo le ko, a ka a danka le.

¹⁵Musu fitinalaa ka munta le ko, niŋ samaa keta tiloo muumewo la, a maŋ soŋ teyi la.

¹⁶A mutoo ka munta le ko, niŋ i lafita foñoo le muta la, waraŋ niŋ i lafita tuloo ñafu la i buloo kono.

¹⁷Ko newolu ka ñoo diyaa ñaameŋ, teeroolu ka ñoo so hakiloo la wo le ñaama.

¹⁸Moo-wo-moo ka sooto yiroo topatoo, a be a diŋo domo la le, aduŋ dookuulaa meŋ ka a maarii la kuwo hati, a be buuñaa soto la le.

¹⁹Ko i ka i ñaadaa je jiyo kono ñaameŋ, i ka i sondomoo kono kuwo loŋ wo le ñaama.

²⁰Kaburoo niŋ laakira buka wasa, sako ntolu hadamadiŋ hadumeriŋolu.

²¹Komeŋ dimbaa ka sanoo niŋ kodiforoo foroyandi ñaameŋ, moo ka kotobo tenturoo la wo le ñaama.

²²Hani i ye toolewo tuu kuluŋo le kono, ko i ka ñoo koci ñaameŋ, i te a la tooleeyaa bondi noo la.

²³I ñanta i la beeyaŋ meseŋolu kalaŋo loŋ na le, aduŋ i si i hakilitu i la ninsoolu fanaa to,

²⁴kaatu naafuloo buka tu fo abadaa, aduŋ mansayaa te tu la fo jamaanoolu ye baŋ.

²⁵Niŋ i ye ñaamoo kuntu ka a maabo i la beeyaŋolu ye, doo falinta, aduŋ meŋ bota konkoolu kaŋ, i ye a kafu ñoo ma,

²⁶i si dendikoo dadaa noo le, ka bo i la saajiitii kunturiŋo[1] to, i ye i la baa doolu mennu waafi, i si kenoo saŋ niŋ wo kodoo la.

²⁷Baa toomaalu mennu be tu la jee, i si kali wolu la keekewo dii i la dimbaayaalu niŋ i la dookuulaa sunkutoolu la.