Read Mandinka Kuma Kotoomaalu 28 Bible Online

Kuma Kotoomaalu 28 - Mandinka bible

Kuma Kotoomaalu 28

¹Moo kuruŋo ka bori le, hani moo maŋ tara a nooma, bari moo tilindiŋo ka fatiyaa le ko jatoo.

²Niŋ moolu keta balannaalu ti, bankoo ka maralilaa jamaa le soto, bari niŋ hakilimaa ye maraloo ke, tenkuŋo ka soto le.

³Niŋ maralilaa ye fuwaaroolu mantoora, a ka muluŋ ne ko, samaa meŋ lipata, a ye fiifeŋolu bee kasaara.

⁴Moolu mennu ka ì koo dii luwaa la, ka moo jawoolu le jayi, bari moolu mennu ka luwaa muta, ka balaŋ ì ma le.

⁵Moo kuruŋolu buka tiliŋo la kuwo fahaamu noo, bari moolu mennu ka Yaawe* ñini, wolu ka a fahaamu kendeke le.

⁶Ka ke fuwaaroo ti, i ye ke moo tilindiŋo ti, wo le fisiyaata i ye ke naafulutiyo ti, meŋ ka tara sila jenkeriŋo kaŋ.

⁷Diŋo meŋ ye luwaa muta, ñaamenta le, bari niŋ a niŋ kafuñoo haburiŋo ka taa, a ka a faamaa le malundi.

⁸Moo meŋ ka a la naafuloo siyandi niŋ lankaŋ tambiriŋo la, a la naafuloo be duŋ na moo le bulu, meŋ be hiinoo soto la fuwaaroolu ye.

⁹Moo-wo-moo balanta ka luwaa nooma, hani a la duwaa faŋo konta le.

¹⁰Moo meŋ ka moo tilindiŋolu samba sila kuruŋo kaŋ, a be duŋ na a faŋo la kutindiŋo daa le, bari moo meŋ maŋ sootaari soto, wo be nafaa feŋo le keetaa la.

¹¹Fankamaa si ñaameŋ noo a faŋo fee le, bari fuwaaroo meŋ ye kuwolu bo ñoo to, ka a la feere kuwolu loŋ ne.

¹²Niŋ moo tilindiŋolu ye nooroo ke, seewoo baa le ka ke, bari niŋ moo jawoo ye maraloo ke, moolu ka ì kuŋ kedulaa le ñini.

¹³Moo meŋ ka a la junube kuwo maabo, te ñaatotaa soto la, bari moo-wo-moo sonta a la junuboo la, a ye a koo dii a la, a be yamfoo soto la le.

¹⁴Neemoo be moo le ye, meŋ ye Yaawe ñaasilaŋo soto, bari moo meŋ ka a faŋo jusoo jandi, a ka duŋ bataa le kono.

¹⁵Ko jatoo meŋ be bumbuŋ kaŋ, waraŋ daafeŋ saŋarariŋo*, meŋ pareeta boyinkandiroo la, mu moo jawoo le ti, meŋ ka sembentaŋolu mara.

¹⁶Maralilaa meŋ mu moo mantooralaa baa ti, maŋ fahaamuroo soto, bari moo meŋ ye naafuloo koŋ, meŋ sotota jenkoo kono, be siimaayaa la le.

¹⁷Niŋ moo ye moo faa, a kuwo ye a niyo toora, a ka ke borilaa le ti, a la baluwo bee kono, moo-wo-moo kana a maakoyi.

¹⁸Moo meŋ ka taama sila tilindiŋo la, ka tara tankoo le kono, bari moo meŋ ka tara sila kuruŋo kaŋ, wo ka tariyaa boyi la le.

¹⁹Moo meŋ ka dookuwo ke a la kunkoo to kendeke, be siimaŋ jamaa soto la le, bari meŋ ka tara kuu kuntaŋo nooma kaŋ, fuwaareyaa ka a kuŋo sii le.

²⁰Moo tilindiŋo be neemoo jamaa le soto la, bari moo meŋ korontota ka ke naafulutiyo ti, a te kana la, a maŋ toora.

²¹Fataŋ-fansoo maŋ beteyaa, hani wo, mbuuru kuntoo ka a saabu le, doolu ye kuu jawoo ke.

²²Moo hadumeriŋo ka koronto le ka ke naafulutiyo ti, a buka ñiŋ kalamuta ko, fuwaareyaa le ka a batu.

²³Moo meŋ ka tooñaa kumoo fo moo ye kenebaa to, labaŋo la, a ka naa ke buuñaa moo baa le ti, ka tambi moo la, meŋ ka yootiroo ke.

²⁴Moo meŋ ka a baa niŋ a faa suuñaa, a ko, wo maŋ ke kuu jawu ti, a niŋ tiñaarilaa bee be konti kiliŋ ne.

²⁵Moo meŋ hadumeta, ka sonkoo le jambandi, bari moo meŋ laata Yaawe la, be taa ñaato le.

²⁶Moo meŋ laata a faŋo la fo a tambita, mu toolewo le ti, bari moo meŋ ka kuwo samba niŋ ñaameŋo la, ka tanka le.

²⁷Moo meŋ ka fuwaaroolu so, a te foo la feŋ na, bari moo meŋ ka a ñaa kaasi ì la, ka dankari jamaa le soto.

²⁸Niŋ moo jawoolu ye maraloo ke, moolu ka ì kuŋo kedulaa le ñini, bari niŋ moo jawoolu kasaarata, moo tilindiŋolu ka ñaatotaa soto le.