Read Mandinka Kuma Kotoomaalu 29 Bible Online

Kuma Kotoomaalu 29 - Mandinka bible

Kuma Kotoomaalu 29

¹Ì ka moo meŋ yaamari waati-wo-waati, hani wo a buka i lamoyi, jee niŋ jee a si kasaara, a la haajoo te jaara noo la kotenke.

²Niŋ moo tilindiŋolu ye maraloo ke, moolu ka seewoo le, bari niŋ moo jawoolu be maraloo la, moolu ka ŋuntaŋ ne.

³Moo meŋ lafita ñaameŋo la, ka seewoo le naati a faamaa kaŋ, bari ka cakoo ke kafuñoo ti, wo ka moo la naafuloo le kasaara.

⁴Tiliŋo le ka a tinna, mansa ka tenkuŋo sabatindi bankoo kaŋ, bari meŋ ka naamu koleŋo laa moolu kaŋ, wo ka bankoo kasaara le.

⁵Moo-wo-moo ka a siiñoo yooti, ka jaloo le laa a ye.

⁶Moo jawoo la junuboo le ka muruŋ a faŋo kaŋ, bari moo tilindiŋo si denkiloo laa, a ye seewoo.

⁷Moo tilindiŋo ka a hakilitu fuwaaroo ye tiliŋo la kuwo to le, bari moo jawoo maŋ wo hakiloo soto.

⁸Ñaawalilaalu ka saatewo le duŋ ñoo to, bari moo ñaamendiŋolu ka kamfaa bayi le.

⁹Niŋ moo ñaamendiŋo niŋ toolewo taata luwaa ñaatiliŋo la, sariŋ-sariŋo niŋ moo ñaawali bambaloo le ka tara keriŋ.

¹⁰Moofaalaalu ka moo kendoo koŋ ne, aduŋ ì ka lafi le ka moo tilindiŋo faa.

¹¹Toolewo ka a la kamfaa muumee le fintindi, bari hakilimaa ka a faŋ muta le.

¹²Niŋ maralilaa ka i lamoyi faniyaa kumoo la, a la dookuulaalu muumee ka naa jawuyaa le.

¹³Fuwaaroo niŋ mantooralaa bee denta ñiŋ kuu kiliŋo la le, Yaawe* le ye ñaalu dii ì bee la ka jeroo ke.

¹⁴Niŋ mansa ye fuwaaroolu kiitindi tiliŋo kono, a la mansayaa be tara la bambandiŋ ne fo abadaa.

¹⁵Busoo niŋ yitandiroo ka ñaameŋo dii le, bari niŋ dindiŋo be a faŋo bulu, wo ka a baa malundi le.

¹⁶Niŋ moo jawoo ye maraloo ke, junuboo ka siyaa le, bari moo tilindiŋolu be a la boyoo je la le.

¹⁷I diŋo kuluu fo a si dahaa dii i la, a be i niyo seewondi la le.

¹⁸Niŋ Alla la yitandiroo te daameŋ, meŋ diyaata moo ye, a ka wo le ke, bari neemoo be moo le ye, meŋ ka luwaa muta.

¹⁹Diyaamoo dammaa buka dookuulaa tilindi noo, hani a ye a fahaamu, a buka i danku.

²⁰Fo i ye moo le je meŋ ka korontotoo diyaamoo ke? Jiki baa ka tara toolewo le ye ate ti.

²¹I ye joŋo meŋ tiñaa biriŋ a dindiŋ, a ka labaŋ tiñaa la baake le.

²²Moo meŋ ka kamfaa juuna, a ka sonkoo le jambandi, aduŋ moo jusu sutuŋo ka junube kuu jamaa le saabu.

²³Moo la faŋ waroo le ka a jindi, bari moo meŋ ye a fammajii, a ka buuñaa soto le.

²⁴Suŋo taañoo le mu a faŋo jawu baa kataŋo ti, niŋ ì ye a kalindi, a ka sila le ka tooñaa fo.

²⁵Ka sila moo la si moo duŋ noo kuu kono le, bari moo-wo-moo laata Yaawe la, wo ka tara tankoo le kono.

²⁶Moo jamaa ka lafi maralilaa la maakoyiroo la le, bari Yaawe le ka tiliŋo dii hadamadiŋo la.

²⁷Moo tilindiŋo ka moo kuruŋo koŋ ne, aduŋ moo jawoo fanaa ka moo tilindiŋo koŋ ne.