Read Mandinka Kuma Kotoomaalu 3 Bible Online

Kuma Kotoomaalu 3 - Mandinka bible

Kuma Kotoomaalu 3

¹N diŋo, kana ñina n na karandiroo la, aduŋ i si n na yaamaroolu muta i sondomoo kono.

²Kaatu a be baluu tili jamaa le dii la i la, aniŋ kayiroo meŋ maŋ dandulaa soto.

³Kana soŋ kanu bambaloo niŋ tooñaa ye ì koo dii i la, ì ke kantotaa ti, i ye ì tu i sondomoo kono.

⁴Wo to le i be maakoyiroo niŋ too diyaa soto la, Alla niŋ moolu la karoo la.

⁵Laa Yaawe* la niŋ i sondomoo bee la, kana jiki i fansuŋ miiroolu la.

⁶Niŋ i be sila-wo-sila taama la, i si soŋ a ma, a be i londi la sila tilindiŋo le kaŋ.

⁷Kana i faŋo muta moo ñaamendiŋo ti, sila Yaawe la, i ye fata kuu kuruŋ kewo la.

⁸Wo be ke la i ye kendeyaa le ti, a ye ke i ye booroo ti ka i bambandi.

⁹I si Yaawe buuñaa i la sotofeŋolu to, ka taa i la fiifeŋ kuŋ foloolu bee to,

¹⁰wo to le i la buntuŋolu be faa la tep, aduŋ i la barikoolu be tara la fuusariŋ niŋ wayinoo* le la.

¹¹N diŋo, kana jutu Yaawe la kuluuroo la, waraŋ ka pasi a la dandalaaroo la,

¹²kaatu Yaawe ye mennu kanu, a ka wolu le kuluu, komeŋ faa ka a kanu diŋo kuluu ñaameŋ.

¹³Barakoo be moolu le ye, mennu ye ñaameŋo ñini, ì ye a soto, aniŋ moolu mennu ye kalamutaroo ke.

¹⁴Kaatu ka a soto, wo le kummaayaata ka tambi kodiforoo la, a tinewo fisiyaata sanoo ti.

¹⁵Ate le kummaayaata ka tambi luuluwo la, aduŋ i lafinna feŋ te jee, a niŋ meŋ si tembe.

¹⁶Siimaayaa be a bulubaa buloo kono, naafuloo niŋ buuñaa be a maraa buloo kono.

¹⁷A la siloolu diyaata le, aduŋ ì bee ka ke kayira siloolu le ti.

¹⁸Moolu mennu ye a muta kuu, a ka ke wolu ye baluwo yiroo le ti, mennu ye a muta kendeke, be neemoo soto la le.

¹⁹Ka bo niŋ ñaameŋo le la, aniŋ fahaamuroo, Yaawe ye saŋo niŋ bankoo daa.

²⁰A la londoo le ka bankoo duuma jiyo fintindi, minaayoo ka komboo jindi.

²¹N diŋo, kana soŋ fahaamuroo niŋ kekuu loŋo ye kana i ma.

²²Ì be ke la i ye duniyaa sambaraŋo le ti, aniŋ kantotaa i kaŋo bala.

²³Wo to i be tara la kantariŋ i la siloolu kaŋ ne, aduŋ i siŋo te taki la.

²⁴Suutoo niŋ i be laariŋ, i te sila la, aduŋ i si siinoo diyaariŋo soto.

²⁵Kana sila barambarantoo maasiiboo la, waraŋ mantooroo, meŋ laata moo kuruŋo kaŋ.

²⁶Kaatu Yaawe le be ke la i jikoo ti, aduŋ a te soŋ na kutindiŋo ye i siŋo muta.

²⁷Kana balaŋ ka moo maakoyi, meŋ jarita ka deemaaroo soto, niŋ i ye semboo soto.

²⁸Niŋ feŋ be i bulu wo loo to, kana a fo i siiñoo ye ko, “Taa fo ñaato, saama m be a dii la i la le.”

²⁹Kana feere jawoo siti i siiñoo kamma, meŋ laata i la, ali bee be sabatiriŋ ñoo daala.

³⁰I niŋ moo kana sonka daliila te a la, niŋ a maŋ feŋ ke i la.

³¹Kana fitinamoo kiiliyaa, aduŋ kana taama a la sila-wo-sila la,

³²kaatu Yaawe tanoo le mu moo kuruŋo ti, bari moo tilindiŋo ka tara a la jiki moolu le kono.

³³Yaawe la dankoo be moo kuruŋo la buŋo kono le, bari a ka neemoo jindi moo kendoo ye le.

³⁴Ñaawalilaalu, a ka jutunnayaa samba wolu le kaŋ, bari mennu ye i fammajii, a ka hiina wolu ma le.

³⁵Ñaamendiŋolu be horomoo keetaa la le, bari toolewolu, wolu taa mu maloo le ti.