Read Mandinka Kuma Kotoomaalu 30 Bible Online

Kuma Kotoomaalu 30 - Mandinka bible

Kuma Kotoomaalu 30

¹Ñinnu le mu Yake dinkewo Akuru Masankoo la kuma kotoomaalu ti. Ñiŋ keendiŋo ko: “Alla, m bataata le, Alla, n korita le, aduŋ n te feŋ ke noo la.

²Nte le hakiloo kuyaata moolu bee ti. M maŋ hadamadiŋolu la fahaamuroo soto noo.

³M maŋ ñaameŋo karaŋ, sako ka londi soto Mansa Senuŋo la kuwo to.”

⁴Jumaa le taata fo Arijana, a muruta naŋ? Jumaa le nene ye foñoo muta noo a buloo kono? Jumaa le ye jiyo fudi noo a la dendikoo kono? Jumaa le ye duniyaa tonkoŋ naanoo bee loo? A too ndii, aniŋ a dinkewo fanaa too ndii? A fo n ye, niŋ i ye a loŋ!

⁵Alla la kumoo bee mu tooñaa le ti, a mu koteeroo* le ti moolu ye, mennu ka tankoo ñini a bulu.

⁶Kana feŋ lafaa a la kumoo kaŋ, niŋ wo nte a be i jalayi la le, a ye a yitandi i la ko, faniyaa folaa le mu i ti.

⁷M Maarii, ŋa kuu fula le daani i bulu, kana balaŋ n ye wolu la, janniŋ m be faa la:

⁸Tilimbaliyaa niŋ faniyaa jamfandi n na, kana m fuwaareyandi, aduŋ i kana n ke naafulutiyo ti, bari i si n na baluwo dammaa dii n na.

⁹Niŋ wo nte, a si siyaa m bulu noo le, ŋa ñina i la kuwo la, ŋa a fo ko, “Jumaa le mu Yaawe* ti?” Waraŋ n si ke noo fuwaaroo ti le, ŋa suuñaaroo ke, aduŋ n te n na Alla too horoma la.

¹⁰Kana dookuulaa too tiñaa a la keebaa ye, niŋ wo nte a be i danka la le, aduŋ i be duŋ na bataa le kono.

¹¹Doolu be jee le, mennu ka ì faañolu danka, ì buka neema ì baañolu ma.

¹²Doolu be jee, mennu ye a miira ko, ì maŋ sootaari soto, wo ye a tara, ì be nooriŋ ì la kuu jawoo kono.

¹³Doolu be jee, mennu ka ì faŋo wara, aniŋ mennu ka jutu moolu la.

¹⁴Doolu be jee, mennu ñiŋolu mu hawusaroolu* ti, aniŋ mennu ŋaaŋaalu ka munta ko muroolu, ka fuwaaroolu bondi duniyaa kono, aniŋ mennu ka fentaŋolu bondi moolu kono.

¹⁵Nuuroo ye dimmusu fula le soto, ì ko: “A dii ǹ na! A dii ǹ na!” Kuu naani le be jee mennu buka wasa muumeeke, ì buka a fo ko, a kaañanta:

¹⁶Kaburoo, musoo meŋ maŋ diŋo soto, bankoo meŋ jiyo buka sii, aniŋ dimbaa meŋ buka daañini noo.

¹⁷Moo meŋ ka a faamaa ñaawali, aniŋ ka balaŋ a baamaa horoma la, kaanaalu le be a ñaa copiŋ-copiŋ na, aduŋ duwoolu le be a domo la.

¹⁸Kuu naani le be jee mennu ye nte jaakali, m maŋ ì fahaamu noo:

¹⁹Seeliŋo ka maañaa meŋ ke, niŋ a be yaayoo kaŋ santo, saa ka kuruntu beroo kaŋ ñaameŋ, kuluŋo ka bori noo fankaasoo kono ñaameŋ, aniŋ kambaanoo niŋ sunkutoo ka ñoo kanu ñaameŋ.

²⁰Ñiŋ ne mu musu jeenelaa daajikoo ti: A ka kuwo ke le, a ye a daa moosi, a ye a fo ko, “M maŋ kuu jawu ke.”

²¹Kuu naani le ka bankoo jarajarandi, a buka ì muña noo:

²²Joŋo meŋ keta mansa ti, toolee baa meŋ ye domoroo ke fo a konoo faata,

²³moolu ye musoo meŋ daajikoo koŋ, a ye kewo soto, aniŋ dookuulaa sunkutoo meŋ ye a maarii musu noo taa.

²⁴Feŋ naani le be ñiŋ duniyaa kono mennu dooyaata, hani wo ì ñaamenta baake le:

²⁵Menemeneŋo mu niilamaa feŋ sembe dooyaariŋo le ti, hani wo a ka a la domoroo maabo le, sanjaanoo kono.

²⁶Konkokono saŋo mu niilamaa feŋ ne ti, meŋ semboo maŋ wara, hani wo a ka a la suwo loo berehuwo kono.

²⁷Kuntiŋolu maŋ mansa soto, bari ì ka a loŋ ne ì ka taa ñoo la ñaameŋ.

²⁸Moo si taaliŋo muta noo niŋ a buloo la le, bari hani wo a ka tara mansabuŋolu kono le.

²⁹Feŋ naani le be jee mennu taamañaa ñiiñaata, ì la taamoo, mansakeemaa le mu:

³⁰Jatoo meŋ saŋarata daafeŋolu bee kono, aduŋ a buka bori feŋ na,

³¹baakotoŋo, siiseeduntuŋo meŋ ka a dampaŋolu kosi, aniŋ mansa meŋ ka tara a la moolu ñaato.

³²Niŋ i ye i faŋo tooleeyandi, ka i faŋo sikandi, waraŋ i ye kuu jawoo feeroo siti, i buloo biti i daa kaŋ.

³³Niŋ i ye feenewo kosi, a ka yelema ninsituloo ti ñaameŋ, aniŋ niŋ i ye nuŋo ñopoti, yeloo ka bo ñaameŋ, kamfaa meŋ jawuyaata, ka fitinoo saabu wo le ñaama.