Read Mandinka Kuma Kotoomaalu 31 Bible Online

Kuma Kotoomaalu 31 - Mandinka bible

Kuma Kotoomaalu 31

¹Masa mansa Lemuweli baamaa ye a yaamari kumoolu mennu la:

²N diŋo, ŋa meŋ wuluu, ŋa meŋ laahidi Alla ye, n ñanta muŋ ne fo la i ye?

³Kana i semboo bee baŋ musoolu la karoo la, aduŋ i kana bula moolu nooma, mennu ka mansoolu kasaara.

⁴Hee Lemuweli, a maŋ ke mansoolu ti, mansoolu maŋ ñaŋ na wayinoo* miŋ na, maralilaalu maŋ ñaŋ na hame la ka dolo fatiŋo miŋ.

⁵Niŋ ì ye doloo miŋ, ì ka ñina luwaa taamandiñaa la le, aduŋ ì ka moo bataariŋolu bee bali ì la hakoo la le.

⁶Doloo dii moolu la mennu pareeta kasaara la, wayinoo dii moolu la, mennu sondomoolu bota i noo to.

⁷Ì si i miŋ, fo ì si ñina ì la fuwaareyaa la, aduŋ ì hakiloo te bula la i la niitoora kuwo la kotenke.

⁸Loo moolu ye, mennu buka diyaamu noo i faŋo ye, aniŋ i ye misikiinoolu la hakoo kele ì ye.

⁹Diyaamu, i ye kiitiyo kuntu tiliŋo kono i ye fuwaaroolu niŋ fentaŋolu la kuwo kele ì ye.

¹⁰Jumaa le si musu kendoo soto noo? Musu kendoo le jarita ka tambi luuluwo la.

¹¹A keemaa ka jiki baa le soto a la kuwo to, aduŋ kewo te foo la sotofeŋo la.

¹²Musoo ka kuu betoo le ke a ye, a buka kuu jawu ke a la, a la baluwo bee kono.

¹³A ka saajiitiyo[2] niŋ fulakisi* kaloolu le ñini ka dendikoo dadaa, aduŋ a ka dookuu baa le ke.

¹⁴A ka muluŋ ne ko safaarilaalu la kuluŋolu, a ka a la domoroo bondi naŋ dulaa jamfariŋolu le to.

¹⁵A ka wuli juuna le, a ye a tara banta maŋ fanu, a ye domoroo tabi a la dimbaayaa ye, aniŋ ka a fo a la dookuulaa sunkutoolu ye, ì ñanta meŋ ke la.

¹⁶A ka kunkoo koroosi kuu le a ye a saŋ, a faŋo la sotofeŋo, a ka wayini yiri kankaŋo fii wo le la, a ye a topatoo.

¹⁷Teesitilaa le mu, aduŋ a bambanta.

¹⁸A ka a je le ko, a la safaaroo ye kañewo bondi, a ka dookuwo ke le, fo suutoo ye jamfa.

¹⁹A ka kotondoo ñafu a buloo la le, a ye tara wurindiroo la.

²⁰A ka siloo dii fuwaaroolu la le, aduŋ a ka a buloo fayi fentaŋolu kaŋ ne.

²¹Niŋ sumayaa warata, a buka silandaa soto a la dimbaayaa ye, kaatu dendika kuliŋo le ka tara ì bee bala.

²²A ka laarankaŋ faanoolu dadaa a faŋo ye le, a la sitifaanoo ka ke bayi daa koleŋo le ti, aniŋ wuluyele kulooroo.

²³Moolu ye a keemaa suutee saatee moolu bendulaa to le, a ka sii bankoo alifaalu kono jee le to.

²⁴Musoo ka daarifaani dendikoolu dadaa le, a ka ì waafi, aduŋ a ka teesitiraŋolu waafi safaarilaalu ma le.

²⁵A ye semboo niŋ horomoo soto le moolu bulu, saama siniŋ a be tara la seewoo le kono.

²⁶A ka ñaameŋ kumoolu le fo, aduŋ a ka moolu yaamari kuma kendoo le la.

²⁷A ka a la dimbaayaa la kuwolu koroosi le, aduŋ a buka feŋ domo, meŋ maŋ ke a halaaloo ti.

²⁸A diŋolu ka a kumandi seewooriŋo le la, a keemaa fanaa, aduŋ a ka a jayi le.

²⁹A ko, “Musu jamaa ye baara kendoo ke le, bari ite mu ñontaŋo le ti.”

³⁰Ñiiñaa si bo noo moo koto le, kuma diimaa si moo neenee noo, bari musoo meŋ silata Yaawe* la, wo ñanta le ka jayi.

³¹A ye meŋ dookuu, a la joo dii a la a ñaama, aduŋ a la dookuwo jayiroo si taa ke bantabaa to.