Read Mandinka Kuma Kotoomaalu 6 Bible Online

Kuma Kotoomaalu 6 - Mandinka bible

Kuma Kotoomaalu 6

¹N diŋo, niŋ i ye i siiñoo sankayaa, i ye luntaŋo la dunoo taa,

²niŋ i fokumoo ye i duŋ kuu to, waraŋ i daa ye i duŋ,

³n diŋo, i ye i faŋ duŋ i siiñoo bulu, wo to ñiŋ ke, fo i si i faŋo tankandi, i ye i fammajii, i ye tariyaa i ye taa a daani.

⁴Kana siinoo, i ñaa jandi, i kana jinkoo,

⁵fo niŋ i ye i faŋo kanandi, komeŋ minaŋo ka kana deemalaa ma ñaameŋ, komeŋ kunoo ka kana kaliŋo daa ñaameŋ.

⁶Ite katakolentewo, taa menemeneŋo yaa, i ye a la kuwolu koroosi, fo i si ñaameŋ!

⁷A maŋ ñaatonka soto, a maŋ karafarilaa soto, waraŋ maralilaa.

⁸Hani wo, a ka a la domoroo yoronna le katiri waatoo la, a ka domoroo maabo sanjaanoo kono.

⁹Ite katakolentewo, i be tu la laariŋ jee fo waati jumaa le? Muŋ tuma le i be wuli la siinoo la?

¹⁰Ka siinoo domandiŋ, aniŋ ka jinkoo domandiŋ, ka i buloolu laa ñoo kaŋ domandiŋ, ka i foñondiŋ,

¹¹fuwaareyaa be naa i kaŋ ne komeŋ ñapinkannaa, fentaŋyaa, komeŋ boyinkannaa.

¹²Moo nafantaŋo niŋ moo kuruŋo, ì ka tu yaayi la le ka faniyaa fo,

¹³ì ka ì ñaalu kati moolu ye le, ì ka taamanseeroo ke niŋ ì siŋolu la, aniŋ ka ì bulukondiŋolu tiliŋ moolu la.

¹⁴Ì ka kuu kuruŋo feeroo siti, neeneeroo ye tara ì sondomoo kono, wolu ka tu naafikiyaa doroŋ ne ke la.

¹⁵Bari maasiiboo ka boyi ì kaŋ wo loo le to, jee-niŋ-jee ì si kasaara, ì buka maakoyiri soto.

¹⁶Feŋ woorowula le be jee, Yaawe* ye mennu koŋ, wolu mu a tanoo le ti:

¹⁷ka i faŋ wara, ka faniyaa fo, aniŋ ka moolu faa kensenke,

¹⁸moo meŋ sondomoo ka tu la i miira la kuu jawu kewo la, moo meŋ ka tariyaa ka duŋ kuu kuruŋo kono,

¹⁹moo meŋ ka seedenduriyaa ke, aniŋ moo meŋ ka tu naafikiyaa la baadiŋolu teema.

²⁰N diŋo, i lamoyi i faamaa la yaamaroo la, aduŋ i kana balaŋ i baamaa la karandiroo la.

²¹Waati-wo-waati ì si tara i sondomoo kono, i si ì siti i kaŋo bala.

²²Niŋ i be taama kaŋ, ì be siloo yitandi la i la le, niŋ i siinoota, ì be i kanta la le, niŋ i kuninta, ì be i yaamari la le.

²³Kaatu ñiŋ yaamaroolu mu lampoo le ti, karandiroo mu maloo ti, aduŋ yitandiroo kuluuroo to, le mu duniyaa sambaraŋo ti.

²⁴Ì be i tanka la musu jeenelaa ma le, aniŋ musu tulunnaa, meŋ ka moolu neenee niŋ a la kumoolu la.

²⁵Kana a la ñiiñaa muta i sondomoo kono, aduŋ a la ñaakese koyoo kana i bondi i noo to.

²⁶Kaatu cakoo la joo mu mbuuru kuŋo dammaa le ti, bari moo koteŋ na musoo, wandi kewo be a joo la a niyo le la.

²⁷Fo moo si dimbaa bii noo, a ye a laa a wutoo kaŋ, a maŋ a la duŋ feŋolu jani?

²⁸Fo moo si taama noo dimbaa keñemboo kaŋ, a maŋ a siŋolu jani?

²⁹Ñiŋ ne mu wo moo ti, meŋ niŋ wandi musoo ka i laa, moo-wo-moo maata a la, fo a si bula bataa kuwo kono.

³⁰Moolu buka ì ñaa kaasi suŋo la, hani niŋ a ye suuñaaroo ke, kaatu a maŋ domori soto, a be meŋ domo la.

³¹Niŋ ì ye a muta, a si a joo ko siiñaa woorowula, hani a ye a tara a be foo la a la bunkono jooraŋolu bee la.

³²Moo meŋ ka jeenoo ke, mu hakilintaŋo le ti, moo meŋ ka a ke, a ka a faŋo le kasaara.

³³A ka tu liparoolu niŋ malu kuwolu le kono, a la maloo buka bo muumeeke.

³⁴Kiiliyaa ka kewo la kamfaa jawuyandi le, aduŋ a buka balafaa soto, niŋ a be i joo la.

³⁵A buka soŋ joori-wo-joori la, dukoo siyaata ñaa-wo-ñaa, a buka soŋ a la.