Read Mandinka Kuma Kotoomaalu 8 Bible Online

Kuma Kotoomaalu 8 - Mandinka bible

Kuma Kotoomaalu 8

¹Ali i lamoyi! Ñaameŋo le be kumandiroo la. Kalamutaroo ye a kaŋo sikandi.

²A be looriŋ dulaalu le to siloo daala, aniŋ silafatoolu to.

³A be kumandiroo la bantabaalu to, aniŋ kacaa dulaalu to ko:

⁴“Duniyaa moolu, ŋa alitolu le kumandi, n woosiita hadamadiŋolu bee le ye.

⁵Moo sooneeyaariŋ baalu, ali ali kekuwo loŋ, toolewolu fanaa ye feere ke ka kalamutaroo soto.

⁶Ali i lamoyi n na kuma sahariŋolu la, m be tooñaa doroŋ ne fo la.

⁷N daa ka tooñaa kumoo le fo, faniyaa foo mu n tanoo le ti.

⁸N daakumoo bee tilinta le, feŋ te jee meŋ jenketa ì kono.

⁹Ì bee tilinta moo fee le, meŋ ka fahaamuroo ke, ì koyita moolu fee le, mennu ka londoo ñini.

¹⁰N na yaamaroo taa ka tambi kodiforoo la, i ye londoo ñini ka tambi saniforoo la.

¹¹Kaatu ñaameŋo le fisiyaata luuluwo ti, aduŋ i lafinna feŋ te jee, a niŋ meŋ si tembe.

¹²Nte ñaameŋo niŋ kekuu loŋo le ka taa ñoo la, aduŋ ŋa londoo soto le, ŋa m fokumoo loŋ.

¹³Yaawe* ñaasilaŋo le mu kuu jawu koŋo ti. Ŋa faŋ waroo niŋ horomantaŋyaa koŋ ne, aduŋ jawuyaa niŋ faniyaa foo mu n tanoo le ti.

¹⁴Dandalaari kendoo niŋ sondome kuniŋo mu n taa le ti, ŋa fahaamuroo niŋ semboo soto le.

¹⁵Nte le ka mansoolu maakoyi ka maraloo ke, aduŋ n ka maralilaalu maakoyi le ka luwaa tilindiŋolu dadaa.

¹⁶Nte le ka maralilaalu maakoyi ka maraloo ke, aniŋ ñaatonkoolu mennu bee ka maraloo ke ñiŋ duniyaa kono.

¹⁷Moolu mennu ye n kanu, m fanaa ŋa wolu le kanu, aduŋ mennu ka n ñini, ì be n je la le.

¹⁸Naafuloo niŋ horomoo be nte le fee, aduŋ n na fankoo niŋ ñaatotaa buka dandulaa soto.

¹⁹N ka meŋ dookuu, wo le fisiyaata sanoo ti, hani saniforoo, aduŋ n na sotofeŋo le ye nafaa soto kodiforo piiroo ti.

²⁰N ka taama niŋ sila tilindiŋo le la, n ka bula tooñaa siloo le nooma,

²¹ka n na naafuloo dii moolu la, mennu lafita n na, aduŋ n ka ì la kunewolu fandi le.”

²²Ñaameŋo tententa ka a fo ko: “Ka bo waati jaŋ na, Yaawe ye daaroo foloo nte le la,

²³A ye n daa le kabiriŋ foloodulaa to, janniŋ duniyaa be loo la.

²⁴N wuluuta le, wo waatoo fankaasoo te keriŋ, n wuluuta le, kabiriŋ woyoolu maŋ soto.

²⁵N wuluuta le, janniŋ konkoolu be loo la, janniŋ konkoriŋolu be finti la,

²⁶janniŋ Alla ka duniyaa daa aniŋ a kenoolu, hani banku kesoo faŋo.

²⁷N tarata nuŋ jee le, biriŋ a be saŋ fatoolu dadaa kaŋ, kabiriŋ a be baajiyo feenee kaŋ fo ñaadaŋo to.

²⁸N tarata nuŋ jee le, biriŋ a be minaayoo ke la saŋo bala, kabiriŋ a be baa fandi kaŋ niŋ jiyo la.

²⁹Kabiriŋ a ye dandulaa dii fankaasoo la, fo baajiyo kana tambi naanewo la, biriŋ a ye duniyaa la fondamaŋo laa,

³⁰m be looriŋ nuŋ a daala le, komeŋ dookuunoolaa baa. Tili-wo-tili n ka a seewondi le, waati-wo-waati n niŋ seewoo doroŋ ne mu a ñaatiliŋo la.

³¹A la duniyaa ye n seewondi le, ŋa kontaanoo soto hadamadiŋolu la kuwo to le.

³²“Wo to saayiŋ, n diŋolu, ali i lamoyi n na, seewoo be moolu le ye, mennu bulata n na siloolu nooma.

³³N na yaamaroo muta, fo i si ñaameŋ, aduŋ i kana i ñaa kaasi a la.

³⁴Seewoo be moo ye, meŋ ka i lamoyi n na, aniŋ meŋ ka m fintitoo kanta luŋ-wo-luŋ, a ka n duntoo batu.

³⁵Moo-wo-moo ye n je, i ye baluwo le je, aduŋ i be maakoyiroo soto la Yaawe bulu le.

³⁶Bari moo-wo-moo maŋ n ñini, i ye i faŋo le toora, aduŋ moo-wo-moo ye n koŋ, i lafita saayaa le la.”