Read Mandinka Kuma Kotoomaalu 9 Bible Online

Kuma Kotoomaalu 9 - Mandinka bible

Kuma Kotoomaalu 9

¹Ñaameŋo ye a la buŋo loo le, aduŋ samasiŋ woorowula, a ye wo le ke a bala.

²A ye a la beeyaŋolu kanateyi le, a ye ì tabi, a ye a la wayinoo* dadaa, a ye taabuloo bee parendi.

³A ye a la dookuulaa sunkutoolu kii le, a faŋo ye kumandiroo ke saatewo teema.

⁴A ko hakilintaŋolu ye ko, “Alitolu moo sooneeyaariŋ baalu, ali naa jaŋ.

⁵Ali naa domoroo la, ali ye n na wayini diyaariŋo miŋ.

⁶Ali sooneeyaa baa tu jee, fo ali si baluu. Ali bula fahaamuroo la siloo nooma.

⁷“Moo-wo-moo ka siloo yitandi ñaawalilaa la, ka nendiroo le saabu a faŋo ma. Moo-wo-moo ka moo kuruŋo jalayi, i ka i faŋo le dooyaa.

⁸Niŋ i ye ñaawalilaa jalayi, a be i koŋ na le. I si moo ñaamendiŋo jalayi, wo be i kanu la le.

⁹Niŋ i ka moo ñaamendiŋo yaamari, a la ñaameŋo si lafaa kuu. Niŋ i ye moo tilindiŋo karandi, a si a lafaa a la londi ñiniŋo kaŋ.

¹⁰“Yaawe* ñaasilaŋo le mu ñaameŋo kuŋo ti, aduŋ ka Mansa Senuŋo loŋ, wo le mu fahaamuroo ti.

¹¹Ali la siimaayaa be suŋ na nte le la, aduŋ sanji jamaa si lafaa ali siyolu kaŋ.

¹²Niŋ i ñaamenta, i ñaamenta i faŋo le ye, niŋ i ka moolu ñaawali, i dammaa le be bataa la.”

¹³Musu toolewo maakaŋo ka wara le, a maŋ kuluu, aduŋ a maŋ kuu loŋ.

¹⁴A ka sii a la buŋo bundaa daa le to, siiraŋo kaŋ meŋ be saatewo teema.

¹⁵A be silakaŋ tambilaalu kumandi la, mennu ka taa ì la haajoolu la.

¹⁶A ko hakilintaŋolu ye ko, “Alitolu moo sooneeyaariŋ baalu, ali naa jaŋ.

¹⁷Suuñaari jiyo ka diyaa le, domoroo meŋ ka domo kulloo kono, a ka timiyaa le.”

¹⁸Bari moolu mennu ka taa a la buŋo kono, wolu maŋ a loŋ ko saayaa le be jee, aduŋ a la luntaŋolu be kaburoo kono le.