Read Mandinka Kawandilaa 1 Bible Online

Kawandilaa 1 - Mandinka bible

Kawandilaa 1

¹Kawandilaa la kumakaŋolu fele, Dawuda dinkewo, mansa meŋ be Yerusalaamu.

²A ko, “Feŋ te, feŋ na feŋ te. A bee le maŋ ke feŋ ti.”

³Hadamadiŋo ka muŋ nafaa le soto, a la kata kuwolu bee to, a ka tara mennu katariŋ duniyaa tiloo koto?

⁴Jamaanoo le ka taa, jamaanoo ye naa. Duniyaa wo be tu la a ñaama le fo fawu.

⁵Tiloo ka bo le, a ye boyi, A ye muru katabake, ka taa a bodulaa.

⁶Foñoo ka fee bulubaa la le, a ye muru naŋ wo la maraa la. A ka muruŋ-muruŋ wo le ñaama, fo a ye muru naŋ a noo to.

⁷Boloŋolu bee ka bori le ka taa baa baa kono, bari hani wo, a nene maŋ faa. Boloŋolu ka bori ka bo naŋ daameŋ, ì ka bori ka muru wo dulaa kiliŋo le to.

⁸Kuu-wo-kuu, bataa le mu, moo te meŋ daŋo fo noo la. Ñaa buka jeroo ke fo a ye kaañaŋ, tuloo buka moyiroo ke fo a ye kaañaŋ.

⁹Meŋ tarata keriŋ nuŋ, wo le ka ke kotenke. Meŋ dalita ke la, wo le be ke la kotenke. Feŋ ne maŋ kutayaa ñiŋ duniyaa tiloo koto.

¹⁰Fo feŋ ne be keriŋ baŋ, moo si meŋ na kuwo fo noo ko, “Ñiŋ feŋo wo de, ate mu kutamaa le ti?” Wo feŋo, a tarata keriŋ ne biriŋ, janniŋ ntolu faŋo ka soto.

¹¹I maŋ a je, moo foloolu la kuwo bota hakiloo la miira to, aduŋ hani mennu ka naa, ì la kuwo be fili la wo le ñaama moolu ma, mennu be naa itolu koolaa.

¹²Nte Kawandilaa, nte le keta Banisirayila mansa ti Yerusalaamu.

¹³N ka ñaameŋo le taa ka n hakiloo taamandi, ka ñinindiroo ke, ka kisikisiroo ke kuwolu bee la, mennu ka ke ñiŋ duniyaa kono. Alla le ye duni koleŋo laa hadamadiŋo kaŋ, ka tara a faŋ batandi la doroŋ.

¹⁴Ŋa a je le kuwolu mennu bee ka ke ñiŋ duniyaa tiloo koto. Ñiŋ bee maŋ ke feŋ ti, a ka munta le ko foño bayindoo.

¹⁵Meŋ jenketa, wo buka tilindi noo, aduŋ feŋ sotobaloo, wo buka bula noo kontiri kono.

¹⁶N ko m faŋ ye ko, “N na kuwo semboo warata ñaameŋo la karoo la le, ka tambi moo-wo-moo la meŋ nene ye maraloo ke Yerusalaamu, janniŋ nte la waatoo. N hakiloo fanuta ñaameŋo niŋ londoo la kuwo to le famfaŋ.”

¹⁷Bituŋ n naata bula siloo nooma, ka a loŋ meŋ faŋo mu ñaameŋo ti, tooleeyaa aniŋ fuuriŋyaa. Bari n naata a je le ko, ñiŋ fanaa ka munta le ko foño bayindoo.

¹⁸Ñaameŋ koleŋo be daa-wo-daa, niitoora koleŋo le ka tara a nooma, londi fuumariŋo, niikuyaa koleŋo.