Read Mandinka Kawandilaa 10 Bible Online

Kawandilaa 10 - Mandinka bible

Kawandilaa 10

¹Ko sii furewolu ka tulu seeralaa seeroo tiñaa ñaameŋ, tooleeyaa, hani a domandiŋ, a ka ñaameŋo tiñaa le, aniŋ horomoo.

²Moo ñaamendiŋo sondomoo ka a tilindi bulubaa le la, toolewo taa ka a tilindi maraa la.

³Hakili buka tara toolewo la, hani niŋ a be taamoo la siloo kaŋ, a keñaa le ka a yitandi moolu la, a la tooleeyaa be ñaameŋ.

⁴Niŋ maralilaa kamfaata i kamma, tu i be daameŋ. Niŋ i tuta tenkundiŋ, wo le be kuwolu sumayandi la.

⁵Ŋa kuu dimindiŋo doo le je ñiŋ duniyaa tiloo koto, jenkoo meŋ siifaa ka finti maralilaalu la karoo la:

⁶Toolewolu le ka tara palaasi baalu to, moo kummaalu ye tara palaasindiŋolu to.

⁷Ŋa joŋolu je seleriŋ suwoolu koo to le, mansariŋolu be taama la ì siŋo la ko joŋolu.

⁸Moo-wo-moo ye dinkoo siŋ, i faŋo le be boyi la a kono, aduŋ moo-wo-moo ye sansaŋo boyi, saa si i kiŋ noo le.

⁹Moo-wo-moo ka dookuwo ke beredinkoo to, si barama noo le, moo-wo-moo ka loo kuntu, si dimindi noo le.

¹⁰Niŋ teeraŋo daa kuyaata, i maŋ a daa diyaa, a dookundoo ka sembe boyi baa le ñininkaa, bari ñaameŋo, wo le ka tinewo naati.

¹¹Niŋ saa ye i kiŋ janniŋ saa daa sitilaa be a moso la, wo to a la saa daa sitoo te nafaa soto la i ye.

¹²Moo ñaamendiŋo la kumakaŋo ka hiinoo le saabu a faŋo ma, bari toolewo faŋo neŋo le ka a kasaara.

¹³A daakumoo ka dati niŋ tooleeyaa le la, a la diyaamoo ye labaŋ fuuriŋyaa la,

¹⁴toolewo daakumoo le ka siyaa. Moo buka saama loŋ noo. Jumaa le si a fo noo, ate faariŋ koolaa, meŋ be naa ke la?

¹⁵Toolewo la kata kuwolu, wolu le ka a batandi, hani a taaraŋ siloo ka taa saatewo kono, a buka a loŋ.

¹⁶Kooroo be i ye, ite bankoo, meŋ na mansakewo mu dindiŋo le ti, mansariŋolu ka tara bidaŋo la soomandaa.

¹⁷Seewoo be i ye, ite bankoo, meŋ na mansakewo wuluuñaa ñiiñaata, mansariŋolu ka domoroo ke a waatoo la, ka semboo soto, ì buka ke siiratoo ti.

¹⁸Naafoo ka a tinna le, buŋo ye suleŋ, katakolenteeyaa ka kankaraŋo boyindi duuma le.

¹⁹Domori kendoo ka dadaa faŋ seewondoo le kamma, wayinoo* ye niyo seewondi, kodoo, wo ka ñinnu bee le ke.

²⁰Kana mansa neŋ, hani i la miiroolu to, aduŋ i kana fankamaalu neŋ, hani i dammaa be i la laabuŋo kono. Kunoolu si i la kumakaŋolu samba noo le, waraŋ dampammaa feŋ koteŋolu ye i la kumakaŋo seyinkaŋ saata.