Read Mandinka Kawandilaa 4 Bible Online

Kawandilaa 4 - Mandinka bible

Kawandilaa 4

¹Ŋa koroosiroo ke kotenke, ŋa a je toorandi kuwo meŋ be taama kaŋ ñiŋ duniyaa tiloo koto: Ŋa moo toorariŋolu ñaajiyo je le, ì maŋ sabarindilaa soto. Semboo be ì toorandilaalu le bulu, moo maŋ soto ka ì sabarindi.

²N naata m miira furewo la, meŋ faata fokabaŋ, mantaa benta wo le ye, ka tambi moo la, meŋ be baluwo to, a maŋ faa foloo.

³Bari meŋ fanaa fisiyaata ñinnu bee ti, wo le mu moo ti, meŋ maŋ wuluu foloo, a maŋ kuu kuruŋ je a ñaa la, meŋ ka ke ñiŋ duniyaa tiloo koto.

⁴Ŋa a je le moolu ka kata kuu baalu mennu ke, ka dookuwo ke fo ì buloo ye koyi a to. Kaatu ì ka tara lafiriŋ ñiŋ ne la ka tara ñoo ñaato. Ñiŋ fanaa maŋ ke feŋ ne ti, a ka munta le ko foño bayindoo.

⁵Toolewo ka a buloolu laa ñoo kaŋ ne, a ye a faŋ kasaara.

⁶Kayiroo bulu faa kiliŋ aniŋ tenkuŋo, wo le fisiyaata kata kuu baa fula ti, aniŋ foño bayindoo.

⁷Ŋa kuwo meŋ je kotenke ñiŋ duniyaa tiloo koto, a maŋ ke feŋ ti:

⁸Kewo doo le mu, a kiliŋ doroŋ ne be a faŋ ye. A maŋ diŋ soto, a maŋ baadiŋ soto. A la katoo warata, dandulaa te meŋ na. Bari hani wo, a la sotoo maŋ a ñaa faa. A ye a faŋ ñininkaa ko, “Nte be ñiŋ kata kuwo bee ke kaŋ jumaa le ye? Muŋ ne ye a tinna ŋa n koo dii niidiyaa kuwolu la?” Ñiŋ fanaa maŋ ke feŋ ti, bataa doroŋ ne mu.

⁹Moo fula le fisiyaata kiliŋ ti, ì fuloo la katoo le be nafaa soto la kiliŋo taa ti.

¹⁰Niŋ doo boyita, doo si a wulindi. Bari balafaa be moo la kuwo to, meŋ niŋ a boyita, moo te jee meŋ si a wulindi.

¹¹Niŋ moo fula ye i laa laaraŋ kiliŋo kaŋ, ì finjaloo si laa noo ñoo kaŋ ne, bari moo kiliŋo si sumayaa bo noo a faŋ na ñaadii le?

¹²Boyinkannaa si i kutu noo moo kiliŋo le la, bari moo fula, wolu si ì faŋ tankandi noo le. Niŋ i ye julu saba fuwa ñoo bala, a buka tariyaa ka kuntu.

¹³Fondinkee fuwaare ñaamendiŋo, wo le fisiyaata mansakee toolewo ti, meŋ ka balaŋ yaamaroo la a keebaayaa waatoo la.

¹⁴Ñiŋ fondinkeeriŋo wuluuta fuwaareyaa kono ñaa-wo-ñaa wo mansamarali bankoo kaŋ, a si bo noo bunjawoo to le, a ye naa ke mansakewo ti.

¹⁵Ŋa a je le moolu mennu bee be ì niyo la, ì be taama kaŋ ñiŋ duniyaa tiloo koto, bulata ñiŋ fondinkeeriŋo le nooma meŋ seyita mansa noo to.

¹⁶A tarata moolu mennu mara kaŋ, wolu maŋ daŋ soto. Bari a jamaanoo labaŋo la, wo moolu maŋ seewoo ñiŋ fondinkeeriŋo la kuwo la, meŋ seyita mansa noo to. Ñiŋ fanaa maŋ ke feŋ ne ti, a ka munta le ko foño bayindoo.