Read Mandinka Kawandilaa 7 Bible Online

Kawandilaa 7 - Mandinka bible

Kawandilaa 7

¹Too diyaa, wo le be tulu seeralaa ñaato, aduŋ faa luŋo, wo le be wuluu luŋo ñaato.

²Saŋa bunkono duŋo, wo le ye fisa bidaŋ bunkono duŋo ti. Hadamadiŋo bee labaŋo mu saayaa le ti, moo-wo-moo be baluwo to, wo si tara i sondomoo kono.

³Niikuyaa le ye fisa jeloo ti, kaatu niikuyaa ka fahaamuroo le fanundi.

⁴Moo ñaamendiŋo sondomoo ka tara niikuyaa buŋ ne, bari toolewo, wo sondomoo ka tara niiseewoo buŋ ne to.

⁵Moo ñaamendiŋo la jalayiroo lamoyoo, wo le ye fisa toolewo la denkiloo lamoyoo ti.

⁶Ko ŋaniŋo ka fetifeti dimbaa kono ñaameŋ, toolewo la jeloo ka tara wo le ñaama. Ñiŋ fanaa maŋ ke feŋ ti.

⁷Moo toorandoo, ka moo ñaamendiŋo ke moo kuntaŋo le ti, aduŋ dukoo, a ka sondomoo jenkendi tiliŋo la le.

⁸Kuwo labaŋo, wo le ka fisa a foloo ti, muñoo le ye fisa faŋ waroo ti.

⁹I jusoo kana sutiyaa, kamfaa daakaadulaa ka tara toolewolu le jusoo to.

¹⁰Kana a fo ko, “Muŋ ne ye a tinna nunto kuwolu beteyaata saayiŋ ti?” Ñiŋ ñininkaari siifaa, wo maŋ ke ñaameŋo ti.

¹¹Ñaameŋo beteyaata le ko keetaafeŋo, aduŋ a ka moolu nafaa le, mennu be ñiŋ duniyaa tiloo koto.

¹²Ñaameŋo mu tankaraŋo le ti, ko kodoo mu tankaraŋo ti ñaameŋ. A kummaayaata le ka a loŋ ko, ñaameŋo, meŋ ye a soto, a ka wo maarii niyo le tanka.

¹³Alla la keroo juubee: Niŋ a ye meŋ jenkendi, jumaa le ka wo tilindi noo?

¹⁴Kuwolu beteyaa waatoo, kontaani, koleyaa waatoo, ñiŋ miira ko: Alla le ye ñiŋ doo daa, a ye ñiŋ doo fanaa daa. Wo to hadamadiŋo te feŋ fo noo la, meŋ be naa ke la, ate faariŋ koolaa.

¹⁵N na ñiŋ baluu nafantaŋo kono, ŋa moo tilindiŋo je le, a maŋ siimaayaa a la tiliŋo kaŋ. Ŋa moo kuruŋo fanaa je, a siimaayaata a la kuruŋyaa kaŋ. Ŋa ñiŋ kuu fuloo bee je n ñaa la le.

¹⁶Kana tiliŋo landatambindi, aduŋ i kana ñaameŋ kolenke. Muŋ ne be a tinna la i be i faŋ tiñaa la?

¹⁷Kana tilimbaliyaa landatambindi, aduŋ i kana ke toolewo fanaa ti. Muŋ ne be a tinna i be faa la, i la waatoo maŋ sii?

¹⁸A si beteyaa, niŋ i maŋ landatamboo ke niŋ sila-wo-sila la. Alla ñaasilannaa, wo le ka tara sila betoo kaŋ.

¹⁹Ñaameŋo ka semboo meŋ dii hakilimaa la, wo le ka tambi kantii taŋ na saatewo kono.

²⁰A be koyiriŋ ne lewu ko, moo tilindiŋo maŋ soto ñiŋ duniyaa kono, meŋ ka kuu betoo doroŋ ke, a nene maŋ junube kuu ke.

²¹Kana i lamoyi kumoo bee la, moolu be mennu fo la, niŋ wo nte, i si i nendiri kaŋo moyi hani i la dookuulaa la.

²²Bari ñiŋ si tara i fanaa kono ko, i nene ka moo neŋ ne, siiñaa jamaa.

²³Ŋa n na ñaameŋo le taa ka ñiŋ kuwolu bee kotobo a la. N hameta baake ka ñaameŋo soto, bari a be jamfariŋ n na le.

²⁴Feŋolu mennu bee be sotoriŋ, moo buka ì keñaa fahaamu noo, a kuwo daŋo dinkata baake. Jumaa le si a daŋo bondi noo?

²⁵Ŋa n hakiloo tu le, ka kuwolu karaŋ, ka kisikisiroo ke, aniŋ ka ñinindiroo ke ñaameŋo la kuwo la, aniŋ kuwolu daliiloo. N naata a loŋ ko, kuruŋyaa mu hakili dooyaa le ti, aduŋ tooleeyaa mu sondome kuuraŋo le ti.

²⁶Ŋa feŋ ne je, meŋ jawuyaata saayaa ti: musoo meŋ ka munta ko kutindiŋo, a sondomoo mu jaloo ti, a buloolu mu nee joloo ti. Kee meŋ be Alla ye, wo be kana la ñiŋ musoo ma le. Bari junubelaa, a be wo duŋ na a la jaloo kono le.

²⁷Kawandilaa ye ñiŋ ne fo ko, “Ali a juubee ŋa ñiŋ ne je, biriŋ ŋa a dati ka kuu kesoolu tomboŋ, ka ì kafu ñoo ma domandiŋ-domandiŋ ka kuwolu koyindi.

²⁸N tuta meŋ na kuwo ñini la, m maŋ wo je. Ka bo niŋ n sondomoo bee la, n tarata hadamadiŋo le la kuwo kisikisi kaŋ, hadamadiŋo meŋ tilinta. Bari wuli kiliŋ kono, ŋa kiliŋ doroŋ ne soto, bari a maŋ ke musu ti.

²⁹Ŋa meŋ je doroŋ, wo le mu, Alla ye hadamadiŋo niŋ tiliŋo le daa, bari hadamadiŋo ka taa bula a fansuŋ siloolu le nooma.”