Read Mandinka Suukuwo 1 Bible Online

Suukuwo 1 - Mandinka bible

Suukuwo 1

¹Suukuwolu la suukuwo, Sulemani le taa mu. Musoo ko:

²N sumbu, n sumbu i daa la! I la kanoo le diyaata wayinoo* ti.

³I la tulu seeralaa diyaata ñaameŋ! I too janjanta ko karabaanijiyo meŋ bonta, wo le ye a tinna sunkutoolu ye i kanu.

⁴N saba i nooma, ŋà m bambaŋ, n na mansa, n samba i yaa. M be seewoo la le,[1] n jusoo ye laa i la kanoo to. M be i la kanoo le jayi la ka tambi wayinoo la. Fo musoolu si i kanu doroŋ.

⁵Alitolu Yerusalaamu dimmusuriŋolu! M balafatoo finta le, bari n ñiiñaata, m be findiŋ ne ko Kedari tiriliisoo*, m be ñiiñaariŋ ko Sulemani la ridoo.

⁶Ali kana ali ñaa loo n kaŋ n jaatoo la fiŋo kaŋ, tiloo le ye m findi. M baamaa dinkewolu kamfaata n kamma, ì ye n ke wayini yiri kankaŋolu kantalaa ti, m fansuŋ kankaŋo, m maŋ wo kanta noo.

⁷N jusukuŋo, a fo n ye, i ka i la saajiyolu kanta daameŋ, ì ka i foñondiŋ daameŋ tilikuntewo. M maŋ lafi ka n ñaadaa muuri ko cakoo,[2] ka i ñini i mooñoo kantarilaalu la saajii koorewolu kono. Kewo ko:

⁸Musoolu bee musu ñiimaa, niŋ i maŋ wo dulaa loŋ, wo to saajiyolu sinnoo nooma, i ye i la baariŋolu daañini kantarilaalu la tiriliisoolu maafaŋ.

⁹N kanuntewo, i ka munta le ko suu ñiimaa, meŋ ka Firawoona la mansa sareetoo saba.

¹⁰Ñarandi feŋolu ye i tamadaa ñiiñandi, i kaŋo be ñarariŋ kantotaa ñiimaalu la.

¹¹M̀ be sani yooroolu dadaa la i ye le, a konoŋ kesoolu ye ke kodiforoo ti. Musoo ko:

¹²Biriŋ n na mansa be laariŋ a la laaraŋo kaŋ, n na karabaanijiyo seeroo janjanta.

¹³N jusukuŋo ka munta n sunjoolu teema le ko miiri* munku fudoo, meŋ ka seera.

¹⁴N jusukuŋo be n ye le ko fudani firoo seeroo, Eni-Kedi wayini yiri kankaŋo to. Kewo ko:

¹⁵Tooñaa, n kanuntewo, i ñiiñaata le, tooñaa, i ñiiñaata le, i ñaa be le ko puraa ñaa.[3] Musoo ko:

¹⁶N jusukuŋo, tooñaa-tooñaa, i ñiiñaata, i beteyaata. Ñaama keroo le mu ǹ na laaraŋo ti.

¹⁷Sedari* yiroo le mu ǹ na kankaraŋo ti, junipa yiroo keta a biloo ti.