Read Mandinka Suukuwo 2 Bible Online

Suukuwo 2 - Mandinka bible

Suukuwo 2

¹Nte mu firindiŋo doroŋ ne ti Saroni tundoo kaŋ, firi ñiimaa wulumbaŋo kono. Kewo ko:

²Ko firi ñiimaa, ŋaniŋolu kono, n kanuntewo be musoolu kono wo le ñaama. Musoo ko:

³Ko pomu suŋo, wuloo yiroolu teema, n jusukuŋo be kewolu kono wo le ñaama. N niŋ seewoo le ka sii a dubeŋo koto, a diŋo ka timiyaa n kaŋo kono.

⁴A ye n samba a la buŋ baa kono, a ye m muuri kanoo la.[4]

⁵M bambandi wayini* yiridiŋ jaaroo la, i ye n kereyandi pomoo la, kaatu kanoo meeyaa ye n saasandi le.

⁶A ka munta ko, a maraa buloo ye tara n kuŋo koto, a bulubaa buloo ye tara minindiŋ n na.

⁷Alitolu Yerusalaamu dimmusuriŋolu, ali i kali n ye wulakono minaŋo too la, waraŋ daakoyoo, niŋ n niŋ n jusukuŋo be fereriŋ ka ǹ na kanoo yita ñoo la, moo kana futa m̀ ma, waraŋ ka m̀ batandi, fo janniŋ m̀ be kaañaŋ na. Musoo ko:

⁸N jusukuŋo kaŋo moyi baŋ, a naatoo fele baŋ, a be bori kaŋ konko baalu kaŋ, a be konkoriŋolu sawuŋ kaŋ.

⁹N jusukuŋo be le ko minaŋo, waraŋ daakoyindiŋo, a hayinaŋ looriŋ n na buŋo kooma, a be juubeeroo kaŋ palanteeroo to, a be yoofiiroo kaŋ palanteeri huwo la.

¹⁰N jusukuŋo ko n ye ko: “Wuli, n kanuntewo, n na musu ñiimaa, naa ŋà taa.

¹¹Sumayaa waatoo banta le, sanji te keriŋ.

¹²Firoolu ye bankoo muuri, denkili waatoo siita, puraalu niŋ seewoo be kiliroo la, bankoo karoo bee la.

¹³Sooto diŋolu be moo kaŋ, wayini yiroolu be firi kaŋ, ì firoolu be seera kaŋ. Wuli, n kanuntewo, n na musu ñiimaa, naa ŋà taa.” Kewo ko:

¹⁴I be n ye le ko puraa, meŋ be maaboriŋ bere konkoo to, a be bitiriŋ berehuwo kono. Soŋ ŋa i ñaadaa je, ŋa i kaŋo moyi, kaatu i kaŋo diyaata le, i alihaaloo ñiiñaata.

¹⁵Ali kunkuwuloolu muta n ye, ñiŋ kunkuwulundiŋolu, itolu le ka wayini yiri kankaŋolu tiñaa, ǹ na wayini yiroolu be firi kaŋ ne. Musoo ko:

¹⁶N jusukuŋo mu n taa le ti, nte fanaa mu a taa ti. A ka a faŋ seewondi firi ñiimaalu le kono.

¹⁷N kanuntewo, janniŋ fanoo ka ke, janniŋ diboo ka yeemaŋ, i tariyaa Beteri Konkoo[5] kaŋ ka seyi, ko minaŋo, waraŋ daakoyindiŋo.