Read Mandinka Suukuwo 6 Bible Online

Suukuwo 6 - Mandinka bible

Suukuwo 6

¹Musoolu ko: Musoolu bee musu ñiimaa, i jusukuŋo taata mintoo le? I jusukuŋo ye sila jumaa le taa, fo ǹ niŋ i si a ñini ñoo la? Musoo ko:

²N jusukuŋo taata a la naakoo le to, seerandi feŋ bambewolu be daameŋ. A be a faŋ seewondi kaŋ a feŋ betoolu la, a be firi ñiimaalu kafu kaŋ ñoo ma.

³Nte mu n jusukuŋo taa le ti, n jusukuŋo mu n taa ti, a ka a la saajiyolu daañini firi ñiimaalu le kono. Kewo ko:

⁴N kanuntewo, i be ñiiñaariŋ ne ko Tirisa saatewo, i ñiiñaata ko Yerusalaamu, i la kuwo be warariŋ, a kaawakuuyaata ko kelediŋ kafoo niŋ ì la bandeeroo.[13]

⁵I ñaa bo looriŋ n kaŋ, a ye n kalaŋo bondi n kono le. I kuntiñoo be le ko, niŋ baa koorewo niŋ boroo be Kileyadi Konkoo jii kaŋ.

⁶I ñiŋolu be koyiriŋ ne ko perekaanoo,[14] ì bee be temberiŋ i daa kono, hani kiliŋ maŋ dasa.

⁷I kenteŋo ka muluŋ ne ko roomaani* yiridiŋ talantewo i la kuŋ bitiraŋo koto.

⁸Musu taŋ wooro si tara noo mansa bulu le, kaŋ foroyandi musu* taŋ seyi ye tara a bulu, aniŋ sunkutoolu, mennu maŋ yaatee soto.

⁹Bari n na puraariŋo mu kilimbaa kiliŋo le ti, n na musu timmariŋo, a maŋ ñoŋ soto. Ate le mu a baamaa jusukuŋo ti, a maŋ ñoŋ soto a ye, meŋ ye a wuluu. Sunkutoolu ye a je le, ì ye a kili seewoo la, mansa la musoolu niŋ kaŋ foroyandi musoolu* ye a je le, ì fanaa ye a jayi.

¹⁰Jumaa le mu ñiŋ ti teŋ, meŋ ka muluŋ naŋ ko siiliŋ boo? A be ñiiñaariŋ ko karoo, a ka malamala ko tiloo, a la kuwo be warariŋ, a kaawakuuyaata ko kelediŋ kafoo niŋ ì la bandeeroo.

¹¹N taata naakoo to, alimondi* yiroolu be daameŋ, ka a juubee fo yiroolu be firi kaŋ wulumbaŋo to le, fo wayini* yiroolu be soroŋ kaŋ ne, aniŋ fo roomaani yiroolu ye firoo dati le.

¹²Janniŋ n ka kuu kalamuta, seewoo ye m futufaa, ko meŋ be siiriŋ mansariŋo[15] fee a la sareetoo kaŋ. Musoolu ko:

¹³Muru naŋ, muru naŋ Sulammiti,[16] muru naŋ, muru naŋ, fo ǹ si i fele. Musoo ko: Ali lafita Sulammiti je la muŋ ne la, ka doŋo je kelediŋ kafu fula teema?