Read Mandinka Yesaya 1 Bible Online

Yesaya 1 - Mandinka bible

Yesaya 1

¹Ñiŋ kuwolu le lankenemata Yesaya ye, Amosi dinkewo, Yerusalaamu aniŋ Yahuuda muumewo la kuwo to. A keta ñiŋ Yahuuda mansoolu la jamaanoolu le la: Usiya,[1] Yotamu, Ahasi aniŋ Hesekiya.

²Saŋ fatoo, i lamoyi! Bankoo, i tuloo loo! Kaatu Yaawe* le ka naa diyaamu. A ko, “Ŋa dindiŋolu kuluu le fo ì menta, bari ì ye balaŋo le tiliŋ n na.

³Ninsoo ye a loŋ ne, meŋ taa mu a ti, faloo ye a loŋ ne, a maarii ka a daañini daameŋ, bari n na moolu Banisirayilankoolu maŋ a loŋ, ì maŋ a fahaamu.”

⁴Kooni, banku junubelaa baa, moolu, junuboo dunimaa be mennu kunto! Ali bota kuu kuruŋ kelaalu le bala, ali ka sila kuruŋo le taama, ali ye ali ñaa kaasi Yaawe la, ali jututa Banisirayila la Senuŋ Baa la, ali ye ali koo dii a la.

⁵Muŋ ne ye a tinna ali tententa ka balaŋ? Fo ali lafita le Yaawe ye tu la ali mantoora la baŋ? Ali kuŋo bee niŋ baramoo le mu, aduŋ ali sondomoo naasita le.

⁶Ka bo ali siŋ teetewo to, ka taa fo ali kunteemoo to, kereyaa te jee, baramoolu niŋ warasoolu dammaa le be jee, aniŋ namaroolu. Ì maŋ ì kuu, waraŋ ka booroo ke ì bala, sako ka ì siti.

⁷Jawoolu ye ali la bankoo kasaara, ì ye ali la saatewolu jani. Ì ye ali la katirifeŋolu bee domo ali ñaa koto, ali la kunkoolu kenseŋyaata, ko niŋ ñapinkannaalu ye dulaa meŋ boyinkaŋ.

⁸Dimmusuriŋ* Siyoni* le tuta jee ko jembereŋo, yiri kankaŋo kono, ko ñantaŋ buŋo, kunkoo kono, ko niŋ ì ye saatewo meŋ suki.

⁹Niŋ Yaawe Alihawaa Maariyo* maŋ doolu tu ǹ ye jee nuŋ, ì ye baluu, m̀ be ke la le ko Sodomu niŋ Komora saatewolu.[2]

¹⁰Alitolu Yerusalaamunkoolu, ali niŋ ali la maralilaalu ka munta le ko Sodomu niŋ Komorankoolu! Ali ali tuloo loo Yaawe la kumoo la! Ali ali hakiloo tu ǹ na Alla la luwaa to!

¹¹Yaawe ko, “Ali la ñiŋ sadaa* bambaloo ye muŋ nafaa le soto nte ye? Jani sadaalu ye m pasi le, ka taa saajiikotoŋolu aniŋ beeyaŋ nunkuriŋ keŋolu. M maŋ lafi ninsoolu yeloo la, saajiiriŋolu aniŋ baalu.

¹²Jumaa le ye ali kumandi ka naa n ñaatiliŋo la, fo ali ka n na luwo doriŋ-doriŋ teŋ?

¹³Ali i foño ka sadaa kuntaŋo naati. Ali la cuuraayi siisiyo mu n tanoo le ti. Ali la ñiŋ kuruŋyaa beŋolu, ali la Kari Kuta Juuraloo*, Loobula Luŋo, aniŋ diina beŋ koteŋolu, n te ì muña noo la.

¹⁴Ŋa ali la Kari Kuta Juuraloolu koŋ ne, aniŋ ali la diina beŋ koteŋolu. Ì keta n ye duni baa le ti, m muñata ì la le fo m bataata.

¹⁵Ali ye moolu mennu faa, ì yele noo be faariŋ ali buloolu bala le. Wo le ye a tinna niŋ ali ye ali buloolu wulindi ka duwaa, n te ali maafaŋo juubee la. Hani a ye a tara ali ye duwaa jamaa le ke, n te n lamoyi la.

¹⁶Ali i kuu, ali ye ali faŋolu seneyandi. Ali ali la kuu kuruŋ kewolu bondi n ñaa koto, ali i foño kuu kuruŋ kewo la.

¹⁷Ali kuu kendoo baara. Ali a je ko tiliŋo ye taama, ali ye moolu maakoyi mennu be mantooroo kono. Ali aliyatiimoolu la hakoo dii ì la, ali ye furuyaamusoolu la boloo dii ì la.”

¹⁸Yaawe ko, “Ali naa saayiŋ, ŋà kuwo fo ñoo kaŋ. Ali la junuboolu finta le ko kemboo, bari ì be koyi la le ko perekaanoo. Hani a ye a tara ì be findiŋ ne nir, ì be koyi la le ko kotondi buunaa.

¹⁹Niŋ ali wakiilita ka n na yaamaroolu muta, ali be fiifeŋ kendoo le domo la, meŋ falinta bankoo kaŋ.

²⁰Bari niŋ ali maŋ soŋ, ali tuta balandiŋ, hawusaroo* le be ali faa la. Nte Yaawe faŋo le ye a fo.”

²¹A juubee, saatewo meŋ be tilindiŋ nuŋ, naata ke ko cakoo.[3] A nene keta saatewo le ti, meŋ ka a je ko luwaa ka taama a ñaama. Tiliŋo tarata faariŋ a kono le nuŋ, bari saayiŋ moofaalaalu le be sabatiriŋ jee.

²²Yerusalaamu, i keta kodiforoo le ti nuŋ, bari saayiŋ i yelemata nee fiŋo le ti, i keta miŋ feŋ diimaa le ti nuŋ, bari i cuntita jiyo le la.

²³I la maralilaalu mu balannaalu le ti, aduŋ suŋolu le ka ke ì taañoolu ti. Ì bee lafita duku mutoo la le, aduŋ ì ka tara soorifeŋolu le nooma. Ì buka loo aliyatiimoolu la kuwo la, ì buka hani i lamoyi furuyaamusoolu la kiitiyo la.

²⁴Silaŋ Yaawe Alihawaa Maariyo, Banisirayila la Alla Tallaa, ye ñiŋ ne bankee ko, “N jawoo, m be n na kamfaa jindi la i kaŋ ne, m be n na juloo joo la i to le!

²⁵Yerusalaamu, m bulu be laa la i kaŋ ne. M be i seneyandi la le ko dimbaa ka kodiforoo seneyandi ñaameŋ, i si a je i la kuu kuruŋolu bee ye bo.

²⁶M be kiitindirilaalu dii la i la le ko i la folooto taalu. M be yaamarilaalu dii la i la le, ì ye ke ko mennu be jee nuŋ. Wo koolaa le, ì be i kumandi la saatee tilindiŋo la, aniŋ saatee foroyaariŋo.”

²⁷Ka luwaa taamandi a ñaama, wo le be Siyoni* kiisa la, aduŋ moolu mennu tuubita, tiliŋo le be ì kanandi la.

²⁸Bari balannaalu niŋ junubelaalu bee be halaki la le, aduŋ moolu mennu ye ì koo dii Yaawe la, be kasaara la le.

²⁹Ali kontaanita le ka jalaŋolu batu yirisuŋ baalu koto, bari ali be naa malu la jee le. Ali ye naakoolu tomboŋ ne ka ì batu jee, bari ali be dooyaa soto la ì la kuwo to le.

³⁰Ali be ke la le ko yiri baa meŋ jamboo norota, aniŋ naakoo meŋ maŋ jii soto.

³¹Sembemaalu be ke la le ko ñaama jaaroo, ì la dookuwo ye ke ko dimbaa feremetoo, ì niŋ ì la dookuu kuruŋo bee be jani la ñoo la le, aduŋ moo te ì maakoyi noo la ka dimbaa faa.