Read Mandinka Yesaya 10 Bible Online

Yesaya 10 - Mandinka bible

Yesaya 10

¹Kooroo be wo moolu ye, mennu ka luwaa jenkeriŋolu dadaa, aniŋ ka luwaa koleŋolu safee,

²ka fuwaaroolu bali ì la hakoo la, ka fentaŋolu la tooñaa nakari, ka furuyaamusoolu la feŋolu ñapinkaŋ, aniŋ ka aliyatiimoolu le feŋolu suuñaa.

³Ali be muŋ ne ke la mantooroo luŋo, niŋ kooroo bota naŋ dulaa jaŋ? Ali be taa jumaa le yaa ka maakoyiroo ñini? Ali be ali la naafuloo tu la mintoo le?

⁴Feŋ te tu la ali ye, fo ka tara motomotoriŋ mutamoolu kono, waraŋ ali ye tara moo faariŋolu kono. Ñiŋ bee koolaa, Yaawe* la kamfaa maŋ jii, a buloo be teekariŋ ne ka ali mantoora.

⁵Yaawe ko, “Kooroo be Asiriya mansa ye, n na kamfaa busamaa, aniŋ n na liparilaŋ dokoo be meŋ buloo kono.

⁶Ŋa a kii banku le kaŋ, meŋ ye a koo dii n na. Ŋa a kii moolu le kaŋ, mennu ka n kamfandi, ka i tuu ì kaŋ ko potoo meŋ be mbeedoolu kaŋ, ka ì ñapinkaŋ ka ì la feŋolu taa.

⁷Bari ñiŋ maŋ ke kuu ti, ate mansa ye meŋ ŋaniya, aduŋ ñiŋ maŋ tara a hakiloo kono. A hamoo mu ñiŋ ne ti, ka banku jamaa kasaara, ka ì la kuwo daŋ.

⁸A ko, fo a la ñaatonkoolu bee maŋ ke mansoolu le ti baŋ?

⁹Fo a te Kalino noo la baŋ komeŋ Karikemisi, aniŋ Hamati, ko Aripadi, Samariya fanaa, ko Damasiku?[14]

¹⁰A ko, mansamarali bankoolu mennu ka jalaŋolu batu, a buloo siita ì ma le. Ñiŋ jalaŋolu le semboo warata Yerusalaamu niŋ Samariya la jalaŋolu ti.

¹¹A ko, a niŋ Yerusalaamu niŋ a jalaŋolu be janjuŋ na le, ko a niŋ Samariya niŋ a jalaŋolu janjunta ñaameŋ.”

¹²Niŋ Maariyo pareeta a la dookuwo bee la, Siyoni* Konkoo niŋ Yerusalaamu kamma, a be Asiriya mansa mantoora la a la faŋ sikandoo niŋ a la faratoo kaŋ ne.

¹³Kaatu mansa ko le ko: “Ŋa a ke m bulu sembemaa le la, aniŋ ka bo n na ñaameŋo la, kaatu ŋa fahaamuroo soto le. Ŋa bankoolu la naanewolu bondi le, ŋa ì la naafuloolu kasaara. N keta le ko tuuraa saŋarariŋo, ŋa ì la mansoolu bee dimbaa faa.

¹⁴M buloo siita bankoolu la naafuloolu ma, ko moo si futa noo kunu ñaŋo ma ñaameŋ. Ŋa bankoolu bee kafuŋ-kafuŋ ne, ko moo ka kiloolu kafuŋ-kafuŋ ñoo kaŋ ñaameŋ, kunoo ye mennu tu jee. Hani kiliŋ ne maŋ a dampaŋo jiijaa waraŋ ka a daakaloo yele ka kuma.”

¹⁵Bari, fo teeraŋo si a faŋo sikandi noo a maarii bulu, meŋ ka a sawundi, waraŋ seeroo ye a faŋo kibirindi a maarii ye, meŋ ka dookuwo ke a la? Fo dokoo si moo firifiri meŋ ye a sika, waraŋ babara kuntoo ye moo finjaŋ-finjaŋ?

¹⁶Wo to, Yaawe Alihawaa Maariyo* be kuuraŋ jawoo le jindi la naŋ Asiriya mansa la kelejawara bambandiŋolu kaŋ. Dimbaa le be duŋ na a jikiraŋ semboo la, a bee ye kasaara.

¹⁷Yaawe, Banisirayila la Maloo be ke la dimbaa le ti, a la Senuŋ Baa, dimbaa wuleŋo. Tili kiliŋ wucoo kono, Asiriya ñaamoo aniŋ a ŋaniŋ kuroo be jani la le, fo a ye nunku.

¹⁸A yiri sutoo niŋ a kunku jambandiriŋolu neemoo, a bee be kasaara la le fereŋ, a ye ke ko niŋ kuurantoo alihaaloo bota.

¹⁹Yiroolu mennu be tu la sutoo kono, be dooyaa la le, fo dindiŋo faŋo si ì yaatee noo.

²⁰Wo luŋo la, moo toomaalu mennu be Banisirayila, Yaakuba koomalankoolu mennu tuta baluuriŋ, te jiki la Asiriya la kotenke, ate meŋ ye ì noo keloo kono, bari ì be ì jikoo sembe la Yaawe doroŋ ne la, Banisirayila la Senuŋ Baa.

²¹Moo toomaalu be muruŋ na le, moo toomaalu mennu tuta Yaakuba koomalankoolu kono, be muruŋ na Alla Sembemaa kaŋ ne.

²²Hee Banisirayila, i la moolu be siyaariŋ ko bankumunkoo ñaa-wo-ñaa, domandiŋ dammaa le be muruŋ na. Alla ye a kankulaa le ko, a be bankoo kasaara la le fereŋ, kaatu a waajibiyaata le.

²³Yaawe Alihawaa Maariyo le be ñiŋ kasaara kuwo bee taamandi la bankoo bee kaŋ.

²⁴Wo to, Yaawe Alihawaa Maariyo ye ñiŋ ne fo ko, “Hee n na moolu, alitolu mennu be sabatiriŋ Siyoni, ali kana sila Asiriyankoolu la, mennu ye ali buutee busoo la, ì ye dokoo sika ali kamma, ko Misirankoolu ye a ke nuŋ ñaameŋ.

²⁵A te mee la, n na kamfaa ali kamma be daŋ na, n na kamfaa ye naa tiliŋ itolu la ka ì kasaara.”

²⁶Yaawe Alihawaa Maariyo be ì lipa la busoo la le, ko a ye Midiyaninkoolu busa ñaameŋ Orebu Bere Konkoo to. A be a la dokoo wulindi la baa kunto le, ko a ye a ke nuŋ ñaameŋ Misira.

²⁷Wo luŋo la, ì la dunoo be bo la ali sañoolu kaŋ ne, ì la yookoo* ye bo ali toŋo to. Yookoo be kati la le, kaatu a be a tara la le, ali nunkujawuta.

²⁸Asiriya kelediŋ kafoolu dunta Ayati, ì tambita Mikironi la, ì ye ì la jooraŋ doolu maabo Mikimasi.

²⁹Ì tambita niŋ siloo la meŋ ka taa konkoolu teema, ì ko, “Bii suutoo m̀ be daakaa loo la Keba le.” Ramankoolu jarajarata, Kibeya moolu borita, Sawulu la saatewo.

³⁰Hee Kallimu, maakoyiroo kumboo! Hee Layisa, i lamoyi! Hee Anatoti, i danku!

³¹Madimenankoolu borita le, Kebimunkoolu borita ka tanka.

³²Wo luŋo la, ì be loo la Nobu le, ì ye Yerusalaamunkoolu silandi, Siyoni Konkoo moolu.[15]

³³A juubee, Yaawe Alihawaa Maariyo be ì kuntu la le ko yiribuloolu ka bo niŋ a sembe baa la. Moo baalu la kuwo be jii la le, moo kummaalu ye boyi bankoo to.

³⁴A be sutu ñunkoolu teyi la niŋ teeraŋo le la. Libanooni sutoo be boyi la Sembetii Baa ñaatiliŋo la le.