Read Mandinka Yesaya 11 Bible Online

Yesaya 11 - Mandinka bible

Yesaya 11

¹Yese[16] koomalankoolu keta le ko yirijuu kuntoo, bari maralilaa be soroŋ na a bala le kotenke, a suloolu ye soroŋo fintindi, a ye diŋ.

²Yaawe* la Nooroo be tara la a fee le, ñaameŋo niŋ fahaamuroo nooroo, yaamaroo niŋ semboo nooroo, londoo niŋ Yaawe ñaasilaŋo nooroo.

³Yaawe ñaasilaŋo, wo le be ke la a la kontaani kuwo ti. A buka kiitiyo kuntu ka bo niŋ moo muluŋo la, waraŋ moyilaa moyi kumoo.

⁴A be fentaŋolu la kiitiyo kuntu la tiliŋo le kono, a ye bankoo fuwaaroolu la kuwo kiitii niŋ tooñaa siloo la. A la kumoo be banku moolu kuluu la le, a la yaamaroo ye suŋ moo kuruŋolu la saayaa la.

⁵Tiliŋo le be ke la a la teesitiraŋo ti, tooñaa ye tara minindiŋ a tewo bala.

⁶A la waatoo la, suluwo niŋ saajiiriŋo be sabati la ñoo kaŋ ne, soloo niŋ baariŋo ye tara laariŋ dulaa kiliŋ. Ninsiriŋo niŋ jatoo be domoroo ke la ñoo kaŋ ne, dindiŋ mereŋo ye ì kenkeŋ.

⁷Ninsoo niŋ daafeŋ saŋarariŋo* be domoroo ke la ñoo kaŋ ne, ì diŋolu ye i laa ñoo daala, jatoo ye ñaamoo ñimi ko ninsoo.

⁸Dindiŋ mereŋo si tuluŋ biidaa la dinka daa to le, bondi diŋo ye a buloo bula daŋaroo la laadulaa kono.

⁹Feŋ te tara la Alla la konko senuŋo* kaŋ, meŋ si moo mantoora, waraŋ ka moo kasaara, kaatu duniyaa bee be faa la moolu le la, mennu ye Yaawe loŋ, ko baa ka tara faariŋ jiyo la ñaameŋ.

¹⁰Wo luŋo la, maralilaa meŋ be bo la Yese bala ko yirisuloo, be loo la moolu ye bandeeriyaa le daa to. Bankoolu bee be tara la ate le kooma, aduŋ a sabatidulaa be faa la niŋ neemoo le la.

¹¹Wo luŋo la, Maariyo be a bulu sembemaa taa la le kotenke, ka moo toomaalu kaniŋ mennu tuta a la moolu kono, ka bo Asiriya, ka taa fo Misira bankoo bulubaa niŋ maraa la, ka bo Kusi*, Elamu, Babiloni, Hamati, aniŋ ka taa fo Baa Baa* borindoo la.

¹²A be bandeeroo wulindi la bankoolu ye le, a ye Banisirayila mutamoolu bendi, a ye Yahuuda moo janjandiŋolu kafu ñoo kaŋ, ka bo duniyaa tonkoŋ naanoo to.

¹³Efurayimu* la kiiliyaa maañaa be yeemaŋ na le, aduŋ Yahuuda la jarinteeyaa be daŋ na. Banisirayila te kiiliyaa tiliŋ na Yahuuda la, sako Yahuuda si jarinteeyaa tiliŋ Banisirayila la.

¹⁴Ì be Filisitinkoolu boyinkaŋ na ñoo la tilijii karoo la le, ì ye tilibolankoolu fanaa ñapinkaŋ. Ì si ì buloo laa Edomu niŋ Mowabi kaŋ, Ammoninkoolu ye soŋ ì ma.

¹⁵Yaawe be Misira baajiyo buruka la le, a be a buloo finjaŋ na Yufurati Boloŋo kunto le, a ye a jandi niŋ foño kandi baa la. A be a talaŋ-talaŋ na woyindiŋ woorowula le ti, fo moolu niŋ samatoolu si kuntu noo jee.

¹⁶Sila baa le be tara la a la moo toomaalu ye jee, mennu bota Asiriya, ko a be nuŋ Banisirayila ye ñaameŋ, kabiriŋ ì bota naŋ Misira.