Read Mandinka Yesaya 13 Bible Online

Yesaya 13 - Mandinka bible

Yesaya 13

¹Kiilaariyaa kumoo fele Babiloni la kuwo to, meŋ lankenemata Yesaya Amosi dinkewo ye.

²Yaawe* ko: “Ali bandeeroo wulindi konko turoo kaŋ, ali ye kelediŋolu lenka, ka a fo ì ye naa duŋ, niŋ moo kummaalu la dundaŋ daalu la.

³Ŋa n na moo kerekereriŋolu yaamari le, ŋa n na kelejawaroolu kumandi, n na kandaa sikandiriŋolu, fo ì si n na kamfaa taamandi.”

⁴Ali i lamoyi, maakaŋo le be konkoolu kaŋ, ko niŋ moo jamaalu le be jee. Ali i lamoyi, wuurikaŋo le ka kuma mansamarali bankoolu kaŋ, ko niŋ bankoolu le ka beŋ. Yaawe Alihawaa Maariyo* le be a la kelediŋ kafoolu parendi kaŋ keloo ye.

⁵Ì bota naŋ dulaa jaŋ baa le to, ka bo saŋ fatoolu daŋo to. Yaawe niŋ a la kamfaa le naata ka naa bankoo bee kasaara.

⁶Ali wuuri, kaatu Yaawe la luŋo sutiyaata naŋ ne, a luŋo niŋ kasaaroo le be naa kaŋ ka bo ate Alla Tallaa bulu.

⁷Ñiŋ be a tinna le, moolu bee buloo ye lamfu, ì kijoo ye ì fara.

⁸Silaŋ baa be duŋ na ì la le, dimiŋo niŋ niitooroo ye i miniŋ ì la. Ì be ŋuntaŋ na le ko, niŋ musoo be tiŋo to. Ì kija kuntutoo be ñoo juubee la le, ì ñaadaa ye yelema silaŋo kamma.

⁹A juubee, Yaawe la luŋo ka naa le, luŋ koleŋ baa, jusukandoo aniŋ kamfaa koleŋo naa luŋo, ka duniyaa kenseŋyandi, ka junubelaalu kasaara jee.

¹⁰Saŋo looloolu niŋ ì la maloo te je la. Niŋ tiloo be wuli la, a si dibi, aduŋ karoo te mala la.

¹¹Yaawe ko, “M be duniyaa mantoora la a la kuu jawu kewo la le, ŋa moo kuruŋolu jarabi ì la junube kuu kewo la. M be faŋ wara moolu la faŋ wara maañaa daŋ na le, ŋa moo tooralaalu la faŋ sikandoo jindi.

¹²M be moolu yaatewo dooyandi la le ko saniforoo, ì sotoo ye koleyaa ko Ofiri tundoo sanoolu.

¹³Wo luŋo la, m be a ke la le saŋ fatoolu ye jarajara, duniyaa ye maamaŋ a noo to, nte Yaawe Alihawaa Maariyo la kamfaa kaŋ, niŋ n na kamfaa baa luŋo siita.

¹⁴“Moo-wo-moo boritoo be muruŋ na a la moolu yaa le, a wuluu bankoo kaŋ, ko ì ka minaŋo meŋ deema, ko saajii janjandiŋolu mennu maŋ kantarilaa soto.

¹⁵Ì ye moo-wo-moo muta, ì be a soo la niŋ sooroo le la, ì ye mennu bee muta, hawusaroo* le be ì faa la.

¹⁶Ì be ì la dindiŋolu busa la ka ì janjaŋ ì faŋolu ñaa la le, ì ye ì la bunkono feŋolu fuufuu, ì ye ì la musoolu ñapinkaŋ.

¹⁷“A juubee, m be Midiyaninkoolu wulindi la ì kaŋ ne, mennu daa te sani la kuu to, waraŋ ka haaji soto kodiforoo to.

¹⁸Ì la kaloolu be fondinkewolu faa la le, ì te balafaa soto la deenaanoolu ye, sako ka hiinoo yitandi dindiŋolu la.

¹⁹Babiloni keta mansamarali bankoolu bee kono ñaroo le ti, a moolu ka tintiŋ wo kuwo le la, bari Alla le be ì la bankoo kasaara la ko Sodomu niŋ Komora.[17]

²⁰Moo te sabati la jee kotenke, moo te tara la jee jamaani naalaalu bee kono. Araabu yaayilaa te a la tiriliisoo* loo la jee, sako kantarilaa la saajii si i foñondiŋ jee.

²¹Bari wulakono daafeŋolu le be i laa la jee, moolu la buŋolu ye faa kiikiyaŋolu la, suruntu kunoolu si baluu jee, minaŋolu ye tuluŋ jee.

²²Suluwolu si kuma ì la saatee tatoolu to, kunkuwuloolu, ì la mansabuŋ ñiimaalu kono. A waatoo sutiyaata naŋ ne, a luŋolu maŋ jamfa.”