Read Mandinka Yesaya 14 Bible Online

Yesaya 14 - Mandinka bible

Yesaya 14

¹Yaawe* be naa balafaa soto la Yaakuba koomalankoolu ye le. A be Banisirayilankoolu tomboŋ na le kotenke, a ye ì sabatindi ì fansuŋ bankoo kaŋ. Tumarankewolu be kafu la ì ma le, ì niŋ Yaakuba koomalankoolu ye ke kiliŋ ti.

²Banku koteŋolu le be Banisirayilankoolu maakoyi la, ka ì murundi ì la bankoo kaŋ. Banku koteŋolu be ke la ì taa le ti, ì ye ke ì ye jonkewolu niŋ jommusoolu ti bankoo kaŋ, Yaawe ye meŋ dii ì la. Moolu mennu ye Banisirayilankoolu ke ì la mutamoolu ti, saayiŋ itolu le be ke la Banisirayilankoolu la mutamoolu ti, moolu mennu ye ì mantoora, ye tara marariŋ ì bulu.

³Niŋ Yaawe ye dahaa dii ali la luŋo meŋ na, ka bo bataa kono, jaraboo aniŋ joŋyaa koleŋo,

⁴ali be ñiŋ teelindiri denkiloo le laa la Babiloni mansa ma: A juubee, mantooralaa la kuwo danta ñaameŋ a la kelendiroo banta!

⁵Yaawe ye busoo kati moo kuruŋolu bulu le, aniŋ maralilaalu la mansadokoo.

⁶Ì kamfaatoo le ka moolu faa ì la junkuru kuntubaloo la, ì kamfaatoo ka bankoolu la kuwo jindi sabaribaliyaa niŋ fitinoo kono.

⁷Saayiŋ, bankoolu bee be tenkundiŋ, ì be kayiroo kono, ì bee wututa denkiloo ti.

⁸Junipa yiroolu ka seewoo Babiloni mansa kunna le, Libanooni sedari* yiroolu ka a fo ko, “Bayiri ì ye i la kuwo jindi le, moo maŋ naa ka m̀ boyi.”

⁹Kaburu dinkoo maamanta ka i benduŋ, Laakirankoolu wulita ka i kontoŋ. Mennu keta duniyaa ñaatonkoolu ti, mennu keta mansoolu ti bankoolu kaŋ, ì bee wulita ì la mansasiiraŋolu kaŋ.

¹⁰Ì bee be i danku la le, ì ye a fo i ye ko, “I fanaa lamfuta le ko m̀ be ñaameŋ, i keta le ko ntolu.”

¹¹I niŋ i la saña wulindoo taata kaburoo kono, i la kontiŋolu maakaŋolu deyita, tumboolu ye i muuri, cooraŋolu jurumita i koto.

¹²Hee, Subaalooloo, Fanikewo Dinkewo, a juubee, i jolonta ñaameŋ ka bo saŋo santo! I la kuwo jiita le, i boyita duuma, ite meŋ nene ka bankoolu la kuwo jindi.

¹³I ye ñiŋ ne fo i hakiloo kono ko, “M be sele la saŋo santo, m be n na mansasiiraŋo selendi la Alla la looloolu kaŋ santo le, m be tara la siiriŋ konko senuŋo* dulaa jaŋ baalu santo,

¹⁴m be sele la minaayoolu kunto le, m be m faŋo ke la le ko Alla Mansa Tallaa.”

¹⁵Bari ì be i samba la kaburoo dinka jaŋ baa le kono.

¹⁶Mennu be i je la, be ì ñaa feetee la i kaŋ ne, ì ye i miira i ñiŋ labaŋñaa la: “Fo ñiŋ ne mu kewo ti, meŋ ye duniyaa maamandi, a ye mansamarali bankoolu jarajarandi,

¹⁷kewo meŋ ye duniyaa ke keñewuloo* ti, a ye saatewolu turutumbuŋ, a maŋ soŋ a la mutamoolu ye seyi?”

¹⁸Mansoolu mennu bee ye bankoolu mara nuŋ, be laakuuriŋ ì la kaburoolu kono le.

¹⁹Bari ite wo, i maŋ baadee muumeeke, ko ì ye yiribuloo meŋ fayi. Hawusaroo* ye mennu faa, i niŋ wolu le be ñoo kaŋ. Ì ye i niŋ wolu fayi bere dinka baa le kono, ì ye i doriŋ-doriŋ.

²⁰Bayiri i ye i la bankoo kasaara le, i ye i fansuŋ moolu faa, ì te i baadee la ko wo mansa doolu. Allamaa moo kuruŋolu koomalankoolu too ye buruka.

²¹Dulaa parendi ka a dinkewolu kanateyi, ì la alifaa foloolu la junuboolu kamma la. Ì te wuli la muumeeke ka bankoo keetaa, waraŋ ka duniyaa bee fandi ì la saatewolu la.

²²Yaawe Alihawaa Maariyo* ye ñiŋ ne fo ko, “M be wuli la ì kamma le, ka ì boyinkaŋ.” A ko, “M be Babiloni too buruka la le, aniŋ mennu tuta baluuriŋ, ka taa ì ye mennu wuluu, aniŋ wolu koomalankoolu.”

²³Yaawe Alihawaa Maariyo ko, “M be bankoo ñiŋ ke la ballabaariŋo la dulaa le ti, a ye ke lewo ti. M be a fita la niŋ kasaara fitaraŋo le la.”

²⁴Yaawe Alihawaa Maariyo kalita ko: “A te baayi la. Ŋa a feeroo siti ñaameŋ, a be ke la wo le ñaama, ŋa a kuwo nata ñaameŋ, a be loo la wo le ñaama.

²⁵M be Asiriya kelediŋ kafoo kasaara la n na bankoo kaŋ ne, ŋa ì doriŋ-doriŋ n na konkoolu kaŋ. Ì la yookoo* be bo la n na moolu toŋo to le, ì ye dunoo meŋ laa ì sañoolu kaŋ, fanaa ye bo.

²⁶N na ñiŋ feeroo le be laariŋ duniyaa ye, n ñiŋ buloo le be teekariŋ bankoolu bee kamma.”

²⁷Niŋ Yaawe Alihawaa Maariyo ye kuwo hame, jumaa le si a bali noo a la? Niŋ a ye a buloo teeka bankoolu kamma, fo moo si a kebaliyandi noo baŋ?

²⁸Ñiŋ kiilaariyaa kumoo naata le saŋo meŋ na, Mansa Ahasi faata.

²⁹Alitolu Filisitinkoolu, ali kana seewoo ko, dokoo meŋ ka ali buutee, katita le. Ka bo wo dokoo bala, daŋaroo le be wuluu la, niŋ a ye kiloo teyi, capatoo le be finti la.

³⁰Misikiinoolu be daañini dulaa soto la le, sembentaŋolu si sabati kayiroo kono. Bari mennu bota alitolu bala, konkoo le be ì faa la, ali la moolu mennu tuta baluuriŋ, ŋa wolu faa.

³¹Saatee dundaŋ daalu, ali wuuri santo! Saatewo ye lemba! Alitolu Filisitinkoolu, ali bee kijoo ye ali fara! Kankaŋ baa le ka bo naŋ maraa karoo la, aduŋ kelediŋ te wo kafu baa kono meŋ be tu la kooma.

³²Muŋ jaabiri le be dii la kiilaalu la, mennu bota Filisitini bankoo kaŋ? M̀ be a fo la le ko, “Yaawe le ye Siyoni* londi fo a bambanta, aduŋ a la moo toorariŋolu be tankoo soto la jee le.”