Read Mandinka Yesaya 19 Bible Online

Yesaya 19 - Mandinka bible

Yesaya 19

¹Kiilaariyaa kumoo fele Misira la kuwo to. A juubee, Yaawe* tariyaatoo le ka naa Misira, a ka naa niŋ saŋ tawaloo le la. Misira jalaŋolu be jarajara la a ñaatiliŋo la le, Misirankoolu kijoo ye teyi.

²Yaawe ko: “M be Misirankoolu dundi la ñoo la le, ì ye kele. Baadimmaalu si keloo wulindi ñoo kamma, siiñoolu ye a wulindi ñoo kamma, saatee ye a wulindi saatee kamma, kumandaŋ mara bankoolu ye a wulindi ñoo kamma.

³Misirankoolu be jikilateyi la le, ŋa ì la feeroolu ke kenseŋo ti. Ì be taa jalaŋolu yaa le, juubeerilaalu yaa, saabutiyolu ka taa furee kumandilaalu.[23]

⁴M be Misirankoolu duŋ na maralilaa jawoo semboo le koto, mansa saŋarariŋo ye ì mara.” Yaawe Alihawaa Maariyo* le ye a fo.

⁵Nayili Boloŋo si jaa, baa si jaa kawu, jii te soto la jee.

⁶Jiisiloolu si sunkaŋ, Misira la Nayili baa bolondiŋolu si yoora, ì ye jaa. Seyiŋolu niŋ baakintoolu si noro,

⁷fiifeŋolu mennu be Nayili Boloŋo daala, aniŋ a kankuŋolu la, ì be jaa la le, ì ye feŋ-wo-feŋ fii jee, foñoo ye a tindi, a te tara la jee kotenke.

⁸Nayili Boloŋo ñeemutalaalu si woosii, dooliŋ fayilaalu ye sunu, jala fayilaalu ye kori.

⁹Fulakisi* kaloolu dookuulaalu si tara dewuŋo kono, a suusaalaalu aniŋ a daarilaalu ye jikilateyi.

¹⁰Bayi dadaalaalu si jikilateyi, lebereesoolu niyo ye toora.

¹¹Sowani[24] maralilaalu maŋ ke feŋ ti fo toolewolu. Firawoona la moo ñaamendiŋolu ka yaamari nafantaŋo le dii. Ì be a fo la noo Firawoona ye ñaadii le ko, itolu mu moo ñaamendiŋolu la karandiŋolu le ti, mansa foloolu koomalankoolu?

¹²Firawoona, i la moo ñaamendiŋolu lee saayiŋ? Ì si a yitandi i la, ì ye i kalamutandi, Yaawe Alihawaa Maariyo ye meŋ feere Misira kamma.

¹³Sowani maralilaalu keta toolewolu le ti, Memfisinkoolu la ñaatonkoolu ye ì faŋ neenee, siyolu la maralilaalu ye Misira filindi le.

¹⁴Yaawe ye Misirankoolu jakasindi le, a ye a ke, ì tafal-tafalita ì kekuwolu to, ko siiratoolu ka timili-tamali ì la foonoolu kono ñaameŋ.

¹⁵Misira te feŋ-wo-feŋ ne ke noo la, biriŋ kuŋo to fo feñoo to, teŋ buloolu, ka taa baakintoolu bee.

¹⁶Wo luŋo la Misirankoolu be muluŋ na le ko musoo, silaŋo ye duŋ ì la ka jarajara, niŋ Yaawe Alihawaa Maariyo ye a buloo teeka ì kamma.

¹⁷Yahuuda bankoo be Misirankoolu kijoo teyi la le, moo-wo-moo ye a too moyi, wo be sila la le, feŋ te fo Yaawe Alihawaa Maariyo ye meŋ parendi ì kamma.

¹⁸Wo luŋo la, saatee luulu le be tara la Misira bankoo kaŋ, mennu be Kanaaninkoolu la kaŋo[25] fo la, aduŋ ì kalitoo be ì faŋ dii la Yaawe Alihawaa Maariyo la le. Ñinnu kono ì be kiliŋ kumandi la Tiloo la Saatewo le la.

¹⁹Wo luŋo la, sadaabodulaa* le be tara la Yaawe ye Misira bankoo teema, samasiŋo fanaa ye tara a ye naanewo to.

²⁰Ì be ke la taamanseeroo niŋ seedoo le ti Yaawe Alihawaa Maariyo ye, Misira bankoo kaŋ. Niŋ ì kumboota Yaawe ye, ì mantooralaalu la kuwo kamma la, a be kiisandirilaa niŋ tankandirilaa kii la ì ye le, aduŋ a be ì kiisa la le.

²¹Wo to Yaawe be Misirankoolu londi la a faŋo la le, wo luŋo la, ì ye soŋ a ma. Ì be baturoo ke la niŋ beeyaŋ sadaalu* le la, aniŋ siimaŋ sadaalu, ì ye tawoo taa a ye, ì ye a muta.

²²Yaawe be Misira busa la le, bari a be muru la le ka a jaara. Ì be muru la Yaawe kaŋ ne, aduŋ a be ì lamoyi la ì la woosii kaŋo la le, a ye ì jaara.

²³Wo luŋo la, sila fanuŋo le be bo la Misira fo Asiriya. Asiriyankoolu be naa Misira, Misirankoolu ye taa Asiriya. Misirankoolu niŋ Asiriyankoolu be Alla batu la ñoo kaŋ ne.

²⁴Wo luŋo la, Banisirayila be Misira aniŋ Asiriya sabanjaŋ na le, ì ye ke duniyaa bee ye neemoo le ti.

²⁵Yaawe Alihawaa Maariyo be neema la ì ma le ka a fo ko, “Neemoo be Misirankoolu ye, n na moolu, Asiriyankoolu, m faŋo ye mennu daa, aniŋ Banisirayilankoolu, m fansuŋ taalu.”