Read Mandinka Yesaya 2 Bible Online

Yesaya 2 - Mandinka bible

Yesaya 2

¹Ñiŋ kuwolu le lankenemata Yesaya ye, Amosi dinkewo, Yerusalaamu niŋ Yahuuda muumewo la kuwo to.

²Luŋ be naa le, Yaawe* Batudulaa Buŋo* be konkoo meŋ kaŋ, wo le be tara la konkoolu bee ye santo la, a jamfoo si tambi konko koteŋolu la. Aduŋ bankoolu bee moolu si jee waliŋ.

³Moo jamaa si naa, ka a fo ñoo ye ko, “Ali naa ŋà taa Yaawe la konkoo kaŋ, ka taa Yaakuba la Alla Batudulaa Buŋo to, fo a si ǹ karandi a la siloolu la, fo ǹ si taama noo a la lafoo kaŋ.” Yaamaroo be finti la naŋ Siyoni* le, Yaawe la kumoo be bo la naŋ Yerusalaamu le.

⁴A be kiitiyo kuntu la bankoolu teema le, aduŋ a be fitinoo daa faa la moo jamaa ye. Ì be ì la hawusaroolu* tunkaŋ na le, ka ì ke senedaboolu ti, ì la sooroolu ye ke katirilaŋolu ti. Banku te hawusari sika la banku kamma, sako ì si moo karandi keloo keñaa la kotenke.

⁵Yaakuba koomalankoolu,[4] ali naa ŋà taama Yaawe la maloo kono!

⁶Ite Yaawe, i ñoorita i la moolu, Yaakuba koomalankoolu la le, kaatu ì niŋ banku koteŋ moolu le ka kuu kafu. Tilibolankoolu[5] la batuutaa kuwolu le be faariŋ ì sondomoolu kono, ì ka bitaaroo ke ko Filisitinkoolu.

⁷Ì la bankoo be faariŋ kodiforoo niŋ sanoo le la, aduŋ ì la naafuloo maŋ dandulaa soto. Suwoolu te baŋ na ì la bankoo kaŋ, aduŋ ì la keleraŋ sareetoolu* buka konti noo.

⁸Ì la bankoo be faariŋ jalaŋ fuuriŋolu le la, ì ka sujudi ì la dookuu feŋolu le ye, ì faŋo buloolu ye mennu dadaa.

⁹Wo to, moo bee la kuwo be jindi la le, ì ye tara dooyaa kono. Yaawe, kana yamfa ì ye!

¹⁰Ali taa i maabo bere baalu teema, ali ye duŋ dinkoolu kono, Yaawe la kamfaa baa kamma la, aniŋ a la mansabaayaa la sembe waroo.

¹¹Faŋ wara moolu la kuwo be jindi la le, aduŋ faŋ sikandilaalu be dooyandi la le. Wo luŋo la, Yaawe dammaa le be sikandi la.

¹²Yaawe Alihawaa Maariyo* ye luŋ ne tomboŋ, luŋo meŋ a be faŋ wara moolu, faŋ sikandilaalu, aniŋ kibiri moolu bee la kuwo jindi la.

¹³A be Libanooni sedari* yiri jaŋolu kuntu la le, aniŋ Basani yiri baalu.

¹⁴A be konko jaŋolu jindi la le, aniŋ konkoriŋolu.

¹⁵A be tata jaŋolu bee janjaŋ na le, aniŋ tata sansaŋolu.

¹⁶A be safaari kuluŋolu tunendi la le, aniŋ kuluŋ ñiimaalu bee.

¹⁷Faŋ wara moolu be dooyandi la le, aduŋ faŋ sikandilaalu be jindi la le. Wo luŋo la Yaawe dammaa le be sikandi la.

¹⁸Jalaŋolu bee si yeemaŋ fereŋ.

¹⁹Moolu be bori la le, ka i maabo berehuwolu aniŋ dinkoolu kono, Yaawe la kamfaa baa kamma la, aniŋ a la mansabaayaa sembe waroo, niŋ a wulita ka duniyaa kiitindi.

²⁰Wo luŋo la, moolu be ì la kodiforo jalaŋolu niŋ sani jalaŋolu fayi la ñinoolu niŋ tonsoolu le ye, ì faŋolu ye mennu dadaa ka ì batu.

²¹Ì be bori la le ka i maabo berehuwolu kono, aniŋ konko faroolu teema, Yaawe la kamfaa baa kamma la, aniŋ a la mansabaayaa sembe waroo, niŋ a wulita ka duniyaa kiitindi.

²²Ali kana jiki hadamadiŋo la, bankumunkoo doroŋ ne mu, wo koolaa a mu muŋ ne ti?