Read Mandinka Yesaya 20 Bible Online

Yesaya 20 - Mandinka bible

Yesaya 20

¹Saŋo meŋ na Asiriya mansa Sarikoni ye kelediŋ ñaatonka baa kii Filisitinkoolu la saatewo to, Asidodi, ka taa jee boyinkaŋ aniŋ ka a muta,

²wo waatoo le mu, Yaawe* diyaamuta Amosi dinkewo Yesaya ye. A ko a ye ko, “Booto funtoo bondi i bala, aniŋ samatoo meŋ be i siŋo la.” A ye wo le ke, a kenseŋo tarata yaayi la aniŋ a siŋ kenseŋo.

³Bituŋ Yaawe ko, “N na dookuulaa Yesaya ye a ke ñaameŋ, sanji saba a kenseŋo be yaayi la, a siŋ kenseŋo, wo keta taamanseeroo le ti, Misirankoolu niŋ Kusinkoolu* be meŋ taki la.

⁴Asiriya mansa be Misirankoolu niŋ Kusinkoolu samba la mutoo kono le, dindiŋ, keebaa, ì bala kenseŋo niŋ ì siŋ kenseŋo, ì juwo ye tara banta. Wo be ke la Misira la maloo le ti.

⁵Mennu laata Kusinkoolu la, aniŋ ka kibiri Misira la kuwo la, si jikilateyi, ì ye duŋ maloo kono.

⁶Wo luŋo la, baadaa borindoo siilaalu[26] be a fo la le ko, ‘A juubee meŋ keta moolu la, m̀ be jikiriŋ mennu la, ǹ ka bori mennu yaa maakoyiroo la, ka ǹ tanka Asiriya mansa bulu. Saayiŋ ntolu be kana la ñaadii le?’ ”