Read Mandinka Yesaya 21 Bible Online

Yesaya 21 - Mandinka bible

Yesaya 21

¹Kiilaariyaa kumoo fele keñewuloo* ye baa maafaŋo[27] la. Ko saafoñotoo niŋ semboo ka naa Nekefu* tundoo to ñaameŋ, kasaaroo ka bo naŋ keñewuloo kono wo le ñaama, ka bo bankoo to meŋ silaŋñaa warata.

²Jeri koleŋ ne yitandita n na. Jamfaalaa ka jamfaa ke le, kasaaralaa ka kasaaroo ke. Elamu, taa boyinkaŋo la! Mediya, taa dulaa suki![28] Yaawe* be daŋ ke la woosiyo la le, Babiloni ye meŋ laa bankoolu kaŋ.

³Ñiŋ jeroo le ye a tinna dimiŋo dunta m balajaatoo la, dimiŋo ye m muta ko niŋ musoo be tiŋo to. Ŋa meŋ moyi, a ye m bondi n noo to le, ŋa meŋ je, a ye n jaakalindi.

⁴N kijoo teyita le, n ka jarajara, silaŋo kamma la. M be lafiriŋ wulaarandiŋ sumaa la, bari a maŋ feŋ naati n ye fo silaŋ baa.

⁵Ì ye taabuloolu parendi le, ì ye basoolu feenee, ì ye domoroo niŋ miŋo ke. Kele ñaatonkoolu, ali wuli, ali ye koteeroolu* parendi keloo ye!

⁶Bituŋ Maariyo ko n ye ko: “Taa koroosirilaa ke jee, a ye a fo i ye, a ye meŋ je.

⁷Niŋ a ye keleraŋ sareetoolu* je, aniŋ ì borindilaa fula, waraŋ fali borindilaalu, waraŋ ñonkome borindilaalu, a si a hakilitu, a ye a hakilitu kendeke.”

⁸Koroosirilaa sarita, “M maariyo, suuto tili n ka loo kantari buŋo santo le. N ka sabati n na kantari dulaa to le.

⁹Saayiŋ, a fele! Keleraŋ sareetoo niŋ a borindilaa fula be naa kaŋ!” Kiilaa ye a kankulaa le ko, “A boyita le! A boyita le! Babiloni boyita le! A jalaŋolu bee be teleŋ-telendiŋ ne, ì be fayiriŋ bankoo to.”

¹⁰Hee, n na moolu, Banisirayilankoolu, ì ye ali juru le ko munkoo. Ŋa a kankulaa ali ye le, ŋa meŋ moyi Yaawe Alihawaa Maariyo* la, Banisirayila la Alla.

¹¹Kiilaariyaa kumoo fele Duma[29] la kuwo to. Doo le be n kumandi kaŋ ka bo Seyiri,[30] a ko, “Kantarilaa, suutoo be tembe jumaa le to? Kantarilaa, suutoo be temberiŋ miŋ?”

¹²Kantarilaa ye jaabiroo ke ko, “Soomandaa siita naŋ ne, aduŋ suutoo fanaa be naa le. Niŋ a diyaata i ye, ñaato i si ñininkaaroo ke. I si naa kotenke.”

¹³Kiilaariyaa kumoo fele Araabuduu la kuwo to. Alitolu Dedaninkoolu, ali la juloolu la taama kafoo be jiyaa la yiri ñunkoo le kono, Araabuduu.

¹⁴Tema bankoo sabatilaalu, ali jiyo naati mindootoolu ye, ali ye domoroo dii keleborilaalu la.

¹⁵Ì borita hawusaroo* le la, hawusaroo meŋ buusita ì kamma, kaloo meŋ sabata ì kamma, aniŋ keloo la kandoo.

¹⁶Maariyo ko n ye le ko: “M be luŋolu konti la le, ko lebereesoo ka a la luŋolu konti ñaameŋ. Sanji kiliŋ bandulaa, Kedari la jikiraŋ semboo bee be daŋ na le.

¹⁷Too meŋ be tu la kala fayilaalu kono, aniŋ Kedari la kelejawaroolu, be dooyaa la le.” Yaawe Banisirayila la Alla le ye a fo.