Read Mandinka Yesaya 23 Bible Online

Yesaya 23 - Mandinka bible

Yesaya 23

¹Kiilaariyaa kumoo fele Tire la kuwo to. Hee Tarisi kulunkononkoolu, ali lemba, kaatu Tire kasaarata le. Hani buŋ ne maŋ tu jee sako tendaa. Ì ye a kibaaroo soto Kitimu[33] le.

²Ali i deyi, alitolu baajooyooto siilaalu, aniŋ alitolu juloolu mennu be Sidoni, baakono taamalaalu ye alitolu mennu fankandi.[34]

³Ka siimaŋo naati niŋ kuluŋo la ka bo Sihori,[35] aniŋ katirifeŋo meŋ ka bo Nayili Boloŋo to, wo ye ali ke jula baa le ti duniyaa daa-wo-daa.

⁴Sidoni, baa daala tata bambandiŋo, malu, kaatu baajiyo le diyaamuta, fankaasoo ye i bo i to le, a ko: “I maŋ ke n diŋ ti! Tiŋ maŋ m maa sako n si wuluu, n nene maŋ kambaane kuluu, sako sunkutundiŋ ye tara m bulu.”

⁵Niŋ Misirankoolu ye ñiŋ moyi, ì be tara la niikuyaa kono le ko, biriŋ ì ye Tire la kuwo kibaaroo moyi.

⁶Alitolu baadaa borindoo siilaalu, ali woosiitoo ye teyi ka taa Tarisi.

⁷Fo ñiŋ si ke noo Tire ti, wo seewoo saatewo, meŋ be nuŋ jaŋ kabiriŋ? Ñiŋ saatewo le ye moolu kii ka taa niŋ baa la, ka sabati dulaa jaŋ.

⁸Jumaa le ye ñiŋ feere Tire kamma, saatewo meŋ ka mansoolu toloo? A la safaarilaalu mu mansariŋolu le ti, a la juloolu keta buuñaa moolu ti duniyaa kono.

⁹Yaawe* Alihawaa Maariyo* le ye a feere. Ì ye horomoo niŋ buuñaa meŋ soto, a be a bee bondi la le, a ye ì darajoo jindi.

¹⁰Alitolu Tarisinkoolu, ali taa ali la bankoo sene ko Nayili Boloŋo to senelaalu. Tendaa te ali bulu kotenke.[36]

¹¹Yaawe ye a buloo wulindi baa kunto le, a ye mansamarali bankoolu jarajarandi. A ye yaamaroo dii le, ka Kanaani tatoolu kasaara.

¹²A ko, “Ite Sunkutundiŋ Sidoni bataariŋ, i te seewoo la kotenke. Wuli, i ye baa teyi ka taa Kitimu, hani jee faŋo, i te dahaa soto la.”

¹³Ali Babiloninkoolu la bankoo juubee, ñiŋ moolu mennu maŋ ke kontitaa ti. Asiriyankoolu ye jee ke wulakono daafeŋolu sabatidulaa le ti. Ì ye seleraŋ sapoo* loo jee le ka saatewo boyinkaŋ, ka a tatoolu bee janjaŋ, ì ye jee ke tumbuŋo ti.

¹⁴Hee Tarisi kulunkononkoolu, ali lemba, kaatu ali la saatee tatariŋo kasaarata le.

¹⁵Wo waatoo le mu, moolu be ñina la Tire la fo sanji taŋ woorowula, mansa siyo daŋo. Bari niŋ sanji taŋ woorowula tambita, a be ke la Tire la le, ko ì ye cakoo la kuwo fo denkiloo kono ñaameŋ.

¹⁶Ite caka sontoriŋo, kontiŋo taa, i ye saatewo muruŋ-muruŋ, kontiŋo taa, i ye julu diimaa kosi, i ye denkiloo laa kotenke, fo kewolu si muruŋ i kaŋ.

¹⁷Niŋ sanji taŋ woorowula kumfaata, Yaawe be Tire bula la le, a ye muruŋ a la safaaroo kaŋ. A be a faŋ dii la duniyaa safaari bankoolu bee la le ko cakoo.

¹⁸Bari a tinewo niŋ a nafaa be landi la Yaawe le ye kara la. Ì te tara la maaboriŋ waraŋ ka nukuŋ. A la tinewo be tara la moolu le ye mennu ka baturoo ke Yaawe ñaatiliŋo la, ka domori jamaa niŋ sitifeŋ ñiimaa soto.