Read Mandinka Yesaya 24 Bible Online

Yesaya 24 - Mandinka bible

Yesaya 24

¹Saayiŋ Yaawe* pareeta le, ka duniyaa tumbuŋ aniŋ ka a kenseŋyandi. A be bankoo yelemandi la le, a ye a moolu janjandi.

²Piriisoolu* niŋ moolu bee be kaañaŋ na le, dookuutiyo niŋ dookuulaa, musoo niŋ a la dookuulaa sunkutoo, waafirilaa niŋ sandirilaa, julutiyo niŋ julutaalaa, dontorilaa niŋ fuurilaa.

³Duniyaa bee be kenseŋyaa la le, a ye kasaara fereŋ. Yaawe le ye ñiŋ kumoo fo.

⁴Bankoo si kumboo, a ye jaa, duniyaa si kori, a ye noro, a sembetiyolu ye sembentaŋyaa.

⁵Moolu ye bankoo kosondi, kaatu ì ye Alla la karandiroo soosoo le. Ì maŋ bula a la yaamaroolu nooma, ì ye a la badaa-badaa kambeŋo tiñaa.

⁶Wo ye a tinna le, dankoo boyita duniyaa kaŋ, a moolu ye ì la boyidaalu dunoo taa. Silaŋ duniyaa kono sabatilaalu si talaa,[37] domandiŋ doroŋ ye tu jee.

⁷Wayini* yiroo si jaa, wayinoo ye manki, juuralilaalu ye sunu.

⁸Tambuuroo kumakaŋo si tenkuŋ, bidaŋ maakaŋo ye daŋ, kontiŋ kosi diimaa ye deyi.

⁹Moolu buka wayini miŋo niŋ denkiloo ke kotenke, doloo kuniyaata a minnaalu ye.

¹⁰Saatee kasaarata, a kenseŋyaata. Buŋolu bee daalu soronta, moo buka duŋ noo.

¹¹Moolu be woosii kaŋ mbeedoolu kaŋ, wayinoo la mankoo kamma la. Seewoo bee danta, jusulaa yeemanta duniyaa kono.

¹²Ì be saatee dundaŋ daalu junku la, ka ì tiñaa, saatewo ye kenseŋyaa.

¹³Ñiŋ ne be ke la banku-wo-banku la, duniyaa bee kono. A bankoo la kenseŋyaa be muluŋ na le ko, niŋ ì ye olifu* yiribuloolu busa, ka diŋolu bee joloŋ ì bala, ko niŋ ì ye diŋ labaŋolu kati wayini suŋo bala.

¹⁴Bari moolu mennu tuta baluuriŋ, ì be ì kaŋolu sikandi la le, ka sari seewoo kamma la. Ka bo tilijii maafaŋo la, ì ye Yaawe la mansabaayaa fo.

¹⁵Wo to tilibolankoolu, ali horomoo niŋ buuñaa dii Yaawe la, baadaa borindoo siilaalu, ali Yaawe too horoma, Banisirayila la Alla.

¹⁶Ǹ ka suukuwolu moyi le, ka bo duniyaa daŋolu to, ka Tilindiŋ Baa la kallankeeyaa* horoma. Bari n ko, “N tiñaata le, n tiñaata le! Kooroo boyita n kaŋ! Jamfaalaa ka jamfaa le ke, Jamfaalaa ka jamfaa doroŋ ne ke.”

¹⁷Alitolu duniyaa moolu, kijafaroo, kaburu dinkoo, aniŋ kutindiŋo be ali batu kaŋ ne.

¹⁸Moo-wo-moo be bori kaŋ kijafaroo la, a si taa bula dinkoo kono. Niŋ meŋ fintita wo dinkoo kono, kutindiŋo si a muta. Kaatu saŋo palanteeroolu yeleta naŋ ne, bankoo fondamaŋolu be jarajara kaŋ.

¹⁹Bankoo maamanta le, a farata ka yele, a jarajarata kendeke.

²⁰Bankoo ka fiiloo ko siiratoo, a ka jiijaa ko jembereŋ be foño kono. A la balaŋo ye dunoo kuliyandi a kaŋ, fo a boyita, a maŋ wuli noo kotenke.

²¹Wo waatoo la, Yaawe be saŋo santo sembetiyolu jarabi la le, aniŋ maralilaalu mennu be duniyaa kono.

²²A be ì kafuŋ-kafuŋ na ñoo kaŋ ne, ko ì ye bunjawutonkoolu mennu fayi dinkoo kono. Ì be ì soroŋ na bunjawoo kono le. Niŋ tili jamaa tambita, ì ye ì jarabi.

²³Karoo si dibi, tiloo ye foo a la maloo la, kaatu Yaawe Alihawaa Maariyo* le be maraloo ke la Yerusalaamu Siyoni* Konkoo kaŋ, saatee ñaatonkoolu si a la mansabaayaa je.