Read Mandinka Yesaya 25 Bible Online

Yesaya 25 - Mandinka bible

Yesaya 25

¹Hee Yaawe*, ite le mu n na Alla ti, m be i sikandi la le, m be i too jayi la le, kaatu i ye kaawakuwolu le ke. Biriŋ koomanto, i la feeroolu tilinta le, ì bambanta.

²I ye saatewo ke tumbuŋo le ti, i ye saatee tatariŋo ke bere kutukata sapoo ti. Banku koteŋ moolu la saatee tatariŋo wo maŋ ke saatee ti kotenke, aduŋ a nene te seyinkaŋ loo la.

³Wo to banku sembemaalu be i horoma la le, banku saŋarariŋolu la saatewolu ye sila i la.

⁴I keta tankoo le ti fuwaaroolu ye, boridulaa, fentaŋolu ye ì la niitooroo waatoo, ka ì tanka foño baa ma, aniŋ ka ke ì ye dubeŋo ti, kandoo waatoo. Kaatu moo saŋaroolu la kelendiroo ka munta le ko foño baa meŋ ka sansaŋo busa,

⁵ko keñewuloo* kandoo. Ite Yaawe le ye bantala bankoolu* maakaŋo tenkundi, i ye kañeeri denkiloo bondi sembemaalu daa, ko kandoo ka talaa ñaameŋ, niŋ minaayoo ye dubeŋo dii.

⁶Yaawe Alihawaa Maariyo* be feetoo ke la bankoolu bee le ye konkoo kaŋ. A be ke la subu kendiŋ feetoo le ti, wayini* diimaa feetoo, subu kendiŋo niŋ yuwo, wayinoo niŋ a la timiyaa baa.

⁷Ñiŋ konkoo kaŋ, Maarii Yaawe be kasankewo bondi la le, meŋ be minindiŋ moolu bee la, niikuyaa muurilammaa, meŋ be bitiriŋ bankoolu bee kaŋ.

⁸A be saayaa buruka la le fo abadaa, a ye ñaajiyo fita moolu bee ñaa to, a ye a la moolu la malu kuwo bondi ñiŋ duniyaa kono. Yaawe le ye a fo.

⁹Wo luŋo la, ñiŋ ne be fo la, “A fele, ñiŋ ne mu ǹ na Alla ti, ǹ jikita a la le, aduŋ a ye ǹ tankandi. Ñiŋ ne mu Yaawe ti, ǹ jikita meŋ na. Ali ŋà seewoo, ka jusulaa a la kiisandiroo la.”

¹⁰Yaawe maakoyiri buloo be tara la ñiŋ konkoo kaŋ ne, bari a be Mowabinkoolu la kuwo jindi la le, ì ye ì toñonka ko siimaŋ kaloo meŋ be jambandi dinkoo kono.

¹¹Mowabi ka munta le ko meŋ be newuŋo la, a ka a buloolu wulindi, bari a kalanta ñaa-wo-ñaa, a be tuneŋ na duuma le.

¹²Yaawe be Mowabi tata sansaŋ jaŋolu boyindi la le, a ye ì jindi duuma. A be ì boyindi la banku buutoo le kono.