Read Mandinka Yesaya 26 Bible Online

Yesaya 26 - Mandinka bible

Yesaya 26

¹Wo waatoo la moolu be ñiŋ suukuwo le laa la Yahuuda: Ŋà saatee bambandiŋo le soto. Alla ye a konoto niŋ a banta tata sansaŋolu londi le, ka tankoo dii ǹ na.

²Ali saatee dundaŋ daalu yele, bankoo moo tilindiŋolu ye duŋ mennu ye lannoo soto.

³Ite Yaawe* ka kayira baa dii moolu le la, mennu hakiloo ka tu sabatiriŋ i kaŋ, ì ye ì jikoo loo i kaŋ.

⁴Ali ali jikoo sembe Yaawe la fo fawu, kaatu Yaawe le mu ǹ na Alla ti, ǹ na badaa-badaa semberaŋ beroo.

⁵Kaatu a ye faŋ wara moolu jindi le, ì niŋ ì la faŋ wara saatewo. A ye a jindi le, a ye a jindi duuma le, a ye a fayi buutoo kono.

⁶Siŋolu le doriŋ-dorinta a bee kaŋ, fuwaaroolu sindafatoo, sembentaŋolu siŋ teetewo.

⁷Moo tilindiŋolu la siloo ka tembe le. Ite Yaawe le ka moo kendoo la siloo deerandi.

⁸Hee Maariyo, i la kuwo ye ǹ loo le, ka bula i la yaamaroo nooma. Ŋà ite le too horoma, ǹ sondomoo be hameriŋ ne ka i too jayi.

⁹I la kuwo ka n sondomoo loo le suutoo, n niyo meŋ be n kono ka tara suulariŋ i la le seyila juunoo, kaatu niŋ i la luwaalu lonta ñiŋ duniyaa kono, duniyaa moolu be tiliŋo karaŋ na le.

¹⁰Niŋ kuruŋolu ka hiinoo soto, ì buka tilimmaañaa karaŋ. Hani bankoo meŋ ka tiliŋo taamandi, itolu ka tu kuu kuruŋ kewo doroŋ ne la, ì buka ite Yaawe la mansabaayaa muta feŋ ti.

¹¹Hee Yaawe, i buloo be teekariŋ ne, ka ì mantoora, bari ì maŋ a je. Allamaa ì ye i hamoo je, i ye meŋ soto i la moolu ye, ì ye malu. Allamaa dimbaa meŋ be pareeriŋ i jawoolu kamma, ye ì jani.

¹²Hee Yaawe, kayiroo naati ǹ ye, kaatu ŋà feŋ-wo-feŋ ke noo, ite le ye a ke ǹ ye.

¹³Hee Yaawe, ǹ na Alla, mansa koteŋolu le ye m̀ mara nuŋ bari ntolu be soŋ na ite too dammaa le ma.

¹⁴Wo mansoolu faata le, ì te wuli la kotenke. Ì keta laakirankoolu le ti, ì te wuli la ka baluu kotenke. Kaatu i ye ì jarabi le ka ì kasaara, moo hakili te bula la ì la kotenke.

¹⁵Hee Yaawe, i ye ǹ na bankoo warandi le, i ye ǹ na bankoo warandi, ka buuñaa naati i faŋo ye, i ye bankoo naanewolu bee lafaa le.

¹⁶Hee Yaawe, biriŋ i la moolu be niitooroo kono, ì ye ì ñaa tiliŋ i la le, fo i si ì maakoyi. Biriŋ i ye ì jarabi, ì naata duwaa kendeke.

¹⁷Hee Yaawe, ko musukonomaa meŋ pareeta wuluu la, ka ŋaara ñaameŋ, ka dimoo kumboo, ntolu be wo le ñaama i ñaatiliŋo la.

¹⁸Ǹ ka munta le ko musukonomaa meŋ pareeta wuluu la, m̀ maŋ naa moo wuluu, ŋà foño kenseŋo le wuluu. M̀ maŋ ñaatotaa soto noo bankoo kaŋ.

¹⁹Hee Yaawe, i la furewolu ye wuli, n na moo faariŋolu ye wuli. Yaawe, i la komboo meŋ ka baluwo dii, a ye feenee bankoo kaŋ, ì ye furewolu baadee daameŋ. Alitolu mennu be laariŋ bankoo kono, ali wuli, ali ye suukuwo laa seewoo kono.

²⁰N na moolu, ali taa ali ye duŋ ali la buŋolu kono, ali ye bundaalu soroŋ ali faŋ ma. Ali ali faŋo maabo domandiŋ, fo Yaawe la kamfaa ye tambi.

²¹A juubee, Yaawe be finti la naŋ a sabatidulaa kono le, ka moolu jarabi ì la junube kewo la. Bankoo be moo faariŋolu waañaari la le, ì ye mennu faa, a te ì maabo la kotenke.