Read Mandinka Yesaya 28 Bible Online

Yesaya 28 - Mandinka bible

Yesaya 28

¹Kooroo be boyi la saatewo[42] kaŋ ne, meŋ be looriŋ konkoo kaŋ, wulumbaŋ jambandiriŋo daala, Efurayimu siiratoolu la kibirilaŋo, doloo ye mennu futufaa. A la ŋaañaaraŋo be bo kaŋ ne ko firi nororiŋo.

²Ali a juubee, Maariyo ye moo le tomboŋ meŋ ye semboo soto, aduŋ a bambanta komeŋ samberoo, aniŋ ko foñoo meŋ ka kasaaroo ke, komeŋ sanji baa niŋ waamoo. A be ali la saatewo foriseetoo busandi la bankoo to.

³Ŋaañaaraŋo meŋ keta Efurayimu* siiratoolu la kibirilaŋo ti, bee be doriŋ-doriŋ na siŋo le la.

⁴Saatewo la sapuraŋo meŋ be looriŋ konkoo kaŋ, wulumbaŋ jambandiriŋo daala, be ke la le ko firi nororiŋo. A be muluŋ na le ko sooto juunoo, niŋ moolu ye a je doroŋ, ì ka tariyaa le ka a kati.

⁵Wo luŋo la, Yaawe* Alihawaa Maariyo* faŋo be ke la le ko mansanaafa ñiimaa, ko kuŋ ñarandiraŋ firi ñiimaa a la moolu ye, mennu tuta baluuriŋ.

⁶A be tiliŋo dii la kiitiikuntulaa la le, ka semboo dii moolu la, mennu ka saatee dundaŋ daa tanka keloo ma.

⁷Doloo ka ñinnu le siirisaarandi, ka ì timili-tamalindi, niŋ ì ye wayinoo* miŋ: A ka piriisoolu* niŋ annabiyomoolu le siirisaarandi. Wayinoo ka ì bondi ì noo to le, a ka ì timili-tamalindi. Ì la jeroo ka fili ì ma le, aduŋ niŋ ì be kiitiyo kuntu la, ì ka boyi le, ì buka a kuntu kuu.

⁸Taabuloo bee ka ke foonoo le ti, dulaa senuŋ te jee.

⁹Ì ko, “Wo Yesaya ka a kata ka jumaa le karandi? A ka a la kiilaariyaa kumoo bondi jumaa le ye ñoo to? Fo a ka a fo dindiŋolu le ye baŋ, mennu bondita sunjoo to?

¹⁰A ka tara balabala, balabala, balabala kuma kenseŋo la doroŋ.”

¹¹Yaawe be banku koteŋo moolu le kii la, ka diyaamu ñiŋ moolu ye niŋ diyaamu siifaa doo la, aniŋ kaŋ siifaa doo la, ì te meŋ fahaamu noo la.

¹²A ye a fo ì ye le nuŋ ko, a be kayiroo niŋ dahaa dulaa dii la ì la le. Bari ì maŋ soŋ na i lamoyi la a la.

¹³Wo to, Alla la kumoo be ke la itolu fee le komeŋ, balabala, balabala, balabala kuma kenseŋ. Wo be a tinna le, ì ye boyi ì koo la, ì ye barama, ì siŋo ye duŋ kutindiŋo daa, ì jawoolu ye ì muta.

¹⁴Wo to saayiŋ, alitolu ñaawalilaalu, alitolu mennu marata ñiŋ Yerusalaamunkoolu ma, ali Yaawe la kumoo moyi.

¹⁵Ali kibirita le ka a fo ko, ali niŋ saayaa ye kambeŋo le siti, ali niŋ kaburoo fanaa denta kaŋ na. Niŋ kasaaroo feeneeta naŋ, ali be tanka la a la le, kaatu ali ye faniyaa le ke ali la tuukuraŋo ti, tooñaafobaliyaa le keta ali la semberaŋo ti.

¹⁶Bituŋ Maarii Yaawe ko, “A juubee, ŋa beroo le laa Siyoni* Konkoo kaŋ, bere kende baa, tonkonna bere buuñaariŋo, meŋ be ke la fondamaŋ bambandiŋo ti. Moo meŋ ye lannoo soto, wo maarii te jiijaa la.

¹⁷M be tiliŋo le ke la sumandaŋ juloo ti, tooñaa ye ke buŋ looraŋ juloo ti. Samberoo be ali la tuukuraŋo tiñaa la le, meŋ mu faniyaa ti, aduŋ ali be semberiŋ meŋ na, waamoo le be jee samba la.”

¹⁸Ali niŋ saayaa ye kambeŋo meŋ siti, wo si buruka, ali niŋ kaburoo denta kaŋo meŋ na, te loo la. Niŋ kasaaroo feeneeta naŋ, ali te kana la.

¹⁹A feeneeta naŋ tuma-wo-tuma, a be ali koora la le. Tooñaa, naa luŋ te a la, tiloo waati-wo-waati, waraŋ suutoo waati-wo-waati. Niŋ ali ye ñiŋ kibaaroo fahaamu, ali kijoo si teyi.

²⁰Ko ì ka a fo ñaameŋ, laaraŋo deteta ka i janjaŋ a kaŋ, muurilaŋo dooyaata ka i muuri a la.

²¹Yaawe be wuli la le, ko a ye a ke nuŋ ñaameŋ Perasimu Konkoo kaŋ, a saŋaratoo, ko a keta Kibeyoni Wulumbaŋo kono ñaameŋ. A be a la dookuwo ke la le, a la dookuu kaawakuuyaariŋo, ka a la dookuwo taamandi, a la dookuwo moo maŋ meŋ loŋ.

²²Saayiŋ ali i foño ñaawaliroo la, niŋ wo nte ali la joŋyaa joloo la kuliyaa si lafaa. Yaawe Alihawaa Maariyo ye a fo n ye le, a ye kasaaroo meŋ parendi bankoo bee ye.

²³Ali i lamoyi, n ka meŋ fo, ali ali hakiloo tu kumoo to, m be meŋ fo la ali ye.

²⁴Niŋ senelaa ye kunkoo sene ka fiiroo ke, a ka tu tenteŋ na senoo la le baŋ? Fo a ka tu bankoo kobi la le ka a denkundi baŋ?

²⁵Niŋ a ye bankoo santoo tembendi, fo a buka dilli kesoo sari, a ye kummini fii, a ye wiiti* fii borindoolu ti, a ye baali* siimaŋo fii a jooyi doo to, a ye siimaŋ kese doo fii naanewo to?

²⁶A la Alla le ka a yaamari, a ye a karandi a la a ñaama.

²⁷Dilli buka toñonka niŋ toñonkarilaŋo* la, sako sareeti siŋo si bori kummini kaŋ. Dilli ka lipa niŋ dokoo le la, kummini ka busa niŋ busaraŋo la.

²⁸Siimaŋ kesoo ka juru domoroo le ti, wo to moo buka tu a toñonka la fo fawu. Niŋ a maarii be a la suwoolu niŋ sareeti siŋo borindi la a kaŋ, a buka a juru.

²⁹Ñiŋ ñaameŋo bee ka bo Yaawe Alihawaa Maariyo le bulu, meŋ na yaamaroo maŋ ñoŋ soto, a la ñaameŋo timmata.